“Te U Lava Fēfē ʻo Vahevahe e Tohi ʻa Molomoná?,” Ki Hono Fakamālohia ʻo e Toʻutupú, Tīsema 2022.
Te U Lava Fēfē ʻo Vahevahe e Tohi ʻa Molomoná?
Ko e founga ʻeni ne fakataha mai ai e toʻutupu he funga ʻo e māmaní ke faʻufaʻu ha ongo foʻou ki he Tohi ʻa Molomoná.
ʻOkú ke manatuʻi hono tā ʻe Palesiteni Nalesoni e foʻi hiva ko e “ʻE Kāinga Kuo Hao” ʻi he pianó ʻi he Kātoanga Hiva ʻa e Toʻutupú ʻi he ʻaho 17 ʻo Māʻasi 2021? ʻI heʻene ui kitautolu ko e kongakau kei talavou ʻa e ʻEikí, naʻá ne fakaafeʻi kitautolu ke tuku ke tataki kitautolu ʻe he Laumālié ʻi heʻetau tokoni ke tānaki fakataha ʻa ʻIsileli ʻi he ngaahi ʻaho kimui ní.
Mahalo ʻo hangē ko ha tokolahi ʻo kimoutolu, naʻá ku fifili pe ko e hā te u lava ʻo fai ʻi hoku taʻu 15 ke muimui ki he fakaafe ʻa e palōfitá, tautautefito ʻi he lotolotonga ʻo ha mahaki fakaʻauha fakaemāmani lahi.
ʻI he taʻu ʻe taha kimuʻá, naʻe fakaafeʻi foki ʻe Palesiteni Nalesoni ʻa e māmaní ke #HearHim, ʻo ʻuhinga ke fanongo ki he ngaahi folofola ʻa e ʻEiki ko Sīsū Kalaisí. Ne u ʻilo ko e Tohi ʻa Molomoná ko ha fakamoʻoni ia ʻe taha ʻo Sīsū Kalaisi. Naʻe haʻu ha fakakaukau kiate au ke tokoniʻi e kakaí ke nau fanongo ki he leʻo ʻo e ʻEikí ʻaki ʻenau vahevahe e Tohi ʻa Molomoná ʻi ha founga foʻou: hangē ko ha podcast naʻe lekooti ʻe he toʻutupú.
Makehe mei hono hiki fakapalōfesinale ʻo e Tohi ʻa Molomoná ʻe he Siasí, naʻá ku fakakaukau ʻe lelei ke fanongo ki hono lau ʻo e tohí ʻe he toʻutupu fakaʻaho hangē ko kitauá, ʻa e founga ʻoku tau lau ai iá. ʻOku ʻikai haohaoa maʻu pē ʻetau laukongá, pea ʻoku ʻikai ʻilo ʻe he tokotaha kotoa pē ʻa e founga ke puʻaki tonu ai e foʻi lea kotoa pē. Ka ʻoku sai pē ia he ʻoku ʻikai ha taha ʻiate kitautolu ʻe haohaoa. Hangē ʻoku ou saiʻia he ʻikai fuʻu haohaoa e ngaahi meʻá ʻi ha konga ʻo e ngaahi hiki ne fakahokó—ʻokú ne ʻai ke u ongoʻi hangē haʻaku fanongo ki he laukonga ʻa ha taha ʻo hoku ngaahi kaungāmeʻá.
Naʻe fiemaʻu ha ngāue lahi ki ai. Naʻe iku ia ki ha ngāue lahi ʻa hono kole, ʻētitaʻi, fakatahatahaʻi, pulusi, mo fakahoko ha podcast ʻaki ha ngaahi lekooti mei ha kakai kehekehe ʻe toko 250. Ko hono olá ko ha lekooti kakato ia ʻo e Tohi ʻa Molomoná ʻo kau ki ai ha kau laukonga mei ha ngaahi siteiti ʻe 15 ʻo ʻAmelika pea mo ha fonua ʻe 10 mei he funga ʻo e māmaní. Te ke lava ʻo fanongo ki he ngaahi lekōtí ʻi he uepisaiti www.teensreadthebook.com pea ʻi he ngaahi podcast lalahi kotoa pē ʻi lalo ʻi he Teens Read the Book.
Ko e fakataha ʻa Makei (lotomālie ʻi he sote engeengá) mo ha toʻutupu kehe ne nau tokoni ʻi he podcast. Ne nau fiefia ʻi he faingamālie ke talanoa fekauʻaki mo e podcast mo fakakaukau ki he tāpuaki ʻo ʻenau kau ki aí.
ʻOku ou saiʻia he fanongo ki he ngaahi leʻo mo e ngaahi founga lea kehekehe ʻa e toʻutupu ne nau hiki e ngaahi lekōtí. ʻI heʻenau ʻiloʻi ʻe ongona honau leʻó ʻi he funga ʻo e māmaní, naʻe ngāue mālohi ʻaupito ha kau laukonga tokolahi ke tonu ʻenau ngaahi lekōtí. Naʻe akoako ha niʻihi, hangē ko Tōmasi mei Nuʻu Silá (ʻa ia naʻá ne lau ʻa e 3 Nīfai 20) pe ko Hōsea mei Pelū (ʻa ia naʻá ne lau ʻa e 3 Nīfai 23), ʻi ha ngaahi houa pe ʻaho lahi kimuʻa pea toki lekōtí. Naʻe fehangahangai ha toʻutupu ʻe toko 10 mei Kōlea Tonga mo e pole ʻo e ʻikai hoko e lea faka-Pilitāniá ko ʻenau fuofua lea fakafonuá. Naʻe iku ʻo nau ngāue fakataha, ʻo takitaha lekooti ha ngaahi veesi ʻe niʻihi pea toki fakatahatahaʻi kinautolu ʻo hoko ko e 2 Nīfai 28 mo e 29.
Ko ʻeku taumuʻa ʻi heʻeku kamata e ngāué ke tokoniʻi e kakaí ke nau ongoʻi e Laumālié pea nau toe ofi ange ai kia Sīsū Kalaisi. Naʻe fakahaaʻi mai ʻe heʻeku vakai ki hono tali ʻe he toʻutupú ʻeku fakaafé, ko honau tokolahi tahá ʻoku ʻikai te u ʻiloʻi, ʻa e loloto ʻo e ongo ne nau maʻu fekauʻaki mo e Tohi ʻa Molomoná. Kuo tuʻo lauafe ʻeni hono download mo e fanongoa ʻenau ngaahi leá. ʻOku nau tokoniʻi e kakaí ke nau ongoʻi e Laumālie ʻo e ʻOtuá.
Ne tohi mai ha taha ʻosi ngāue fakafaifekau ʻo pehē naʻá ne “lotua ha founga foʻou ʻi he ngaahi māhina kimui ní ke ne lau [e Tohi ʻa Molomoná] pe ko ha founga foʻou ke ako ai ia. Kuo hoko ʻa e ngāué ni ko ha tali ki heʻeku ngaahi lotú.”
ʻOku ou fakamālō kianautolu naʻe tokoni ki he ngāué ni mo e founga ne u ongoʻi ai e tokoni ʻa e ʻEikí ʻi hono fai iá. ʻOku ou lāngilangiʻia ke hoko ko ha konga ʻo e kongakau kei talavou ʻa e ʻEikí, ʻo tuʻu fakataha mo e niʻihi kehe ʻoku nau ʻofa ʻi he Tohi ʻa Molomoná. Kuó u ako foki ʻi he taimi ʻoku tau tali ai e ngaahi fakaafe mei he palōfita ʻa e ʻEikí, ʻe tataki ʻe he Laumālié ʻetau ngaahi feingá.
ʻOku ou ʻiloʻi ʻe lava ke tokoniʻi kitautolu ʻe he Tohi ʻa Molomoná ke tau ongoʻi e Laumālié mo ʻunu ke ofi ange ki he Tamai Hēvaní mo Sīsū Kalaisi. Ko e taha ʻo e ngaahi taimi fakafiefia taha ʻo ʻeku moʻuí ʻa e taimi ko ia kuó u toutou lau ai e Tohi ʻa Molomoná. ʻOku ou fakatauange te tau fanongo kotoa ʻo fakafou ʻi he kongakau kei talavou ʻa e ʻEikí, ki he leʻo ʻo e ʻEikí mo ongoʻi Hono mālohí ʻi he ngaahi lea ʻo e Tohi ʻa Molomoná.
ʻOku nofo ʻa e taha naʻá ne faʻú ʻi California, USA.