Ko e Kaveingá mo Au

Ko e vahevahe ʻe he toʻutupú ʻa e founga ʻoku nau moʻui ʻaki ai e ngaahi lea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné

Tuʻu Maʻu ʻi he Totonú

“Te u tokoni ke teuteuʻi ʻa e māmaní ki he liuaki mai ʻa e Fakamoʻuí”

Fai ʻe Justin Chancellor

ʻI ha ʻaho ʻe taha, naʻá ku maʻu meʻatokoni ai mo haku kaungāmeʻa ʻi ha falekai, ʻi he taimi ne ma fanongo atu ai ki he talanoa ʻa ha kakai ʻe niʻihi naʻe ofi mai pē fekauʻaki mo e tui fakalotú. Naʻe pehē ʻe ha taʻahine naʻá ne fetaulaki mo ha ongo tangata ʻi ha pasikala naʻá na loto ke talanoa ange fekauʻaki mo e ʻOtuá. Hili ʻene fakataha mo kinaua ʻi ha ngaahi uike siʻi, naʻá ne tali ʻena fakaafe ke papitaiso ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe kamata ke fai ʻe ha kaungāmeʻa ʻe taha ha ngaahi fehuʻi faingataʻa mo tapou kiate ia ke liliu ʻene fakakaukaú. Naʻá ne fotu taʻefiemālie, ʻo ne talaange naʻe ʻikai ke ne ʻilo kotoa e ngaahi talí, ka naʻá ne pehē naʻe kei ongo tonu pē ke ne papitaiso. Naʻá ne talaange ko e meʻa pē naʻá ne fiemaʻú ko ʻenau poupoú.

Naʻe lava ke u tala mo hoku kaungāmeʻá ʻokú ne hohaʻa he taimí ni. Ne ʻikai ke ma lava ʻo tukunoaʻi ʻa e ueʻi ke ma lea atú.

Kimuʻa peá ma mavahé, ne ma lue atu ʻo pehē ange, “ʻOku ʻikai ke ma fie kaunoa atu, ka ne ma fanongo mai ki hoʻo fakakaukau ke papitaisó! Ko ha mēmipa kimaua ʻo e Siasí pea ʻokú ma fakaʻamu ke ke ʻiloʻi ʻokú ke fakahoko ʻa e fili lelei taha ʻo hoʻo moʻuí. Hokohoko atu hoʻo lau mo lotua e Tohi ʻa Molomoná.”

Hili ha taʻu ʻe taha mei ai, naʻá ku fanongo ki ha lēsoni ʻi he lotú pea naʻe vahevahe ʻe he faiakó ha talanoa fekauʻaki mo hono ʻofaʻanga ne na teu malí. ʻI ha ʻaho ʻe taha, naʻá ne lotua ke ʻiloʻi pe ʻoku totonu ke ne papitaiso. ʻI he pō tatau pē, naʻá ne ʻalu ai mo hano ngaahi kaungāmeʻa ki ha falekai. Naʻe kamata ke nau talanoa kau ki he tui fakalotú mo ʻene fili ke papitaisó. Naʻe talaange ʻe hono ngaahi kaungāmeʻá ke fakaʻehiʻehi mei he ongo faifekaú pea ʻoua ʻe papitaiso.

Naʻá ne ongoʻi loto-foʻi ʻi he ʻikai ke nau poupoú. Naʻe haʻu kiate ia ha toko ua ʻo talaange ko ha ongo mēmipa kinaua ʻo e Siasí. Ne na poupouʻi ia ke papitaiso pea ke hokohoko atu ʻene lau [folofolá] mo e lotú. Naʻe talaange ʻe he taha ne teu mali mo e faiakó naʻe tali ʻene lotú ʻi he ʻalu ange ʻa e ongo tangata ko iá ʻo vahevahe loto-toʻa ange ʻena fakamoʻoní.

ʻOku ou houngaʻia moʻoni ʻi heʻeku fakafanongo mo hoku kaungāmeʻá ki he ueʻi ke ma lea pea mo taukaveʻi ʻa e totonú.

ʻOku nofo ʻa e tokotaha naʻá ne faʻú ʻi Arizona, USA.