“Fakaʻatā ha Taimi maʻa Kalaisi ʻi he Kilisimasí,” Ki Hono Fakamālohia ʻo e Toʻutupú, Tīsema 2022.
Lea Fakaʻosí
Fakaʻatā ha Taimi maʻa Kalaisi ʻi he Kilisimasí
Mei ha fakataha lotu ʻa e ʻUnivēsiti Pilikihami ʻIongí naʻe fai ʻi he ʻaho 7 ʻo Tīsema, 2021.
Ngaahi tā fakatātā ʻa Emily Jones
Meʻa fakaʻofoʻofa moʻoni ko hono fakamanatua e ʻaloʻi hotau Fakamoʻui, ko e ʻEiki ko Sīsū Kalaisí. ʻOku ou fakamoʻoni fakataha mo kimoutolu ko e ʻAlo Ia ʻo e ʻOtuá.
Tau loto-toʻa maʻu pē ʻi he tui faingofua ko Ia ʻa ia ʻokú Ne folofolá: ko e Tupuʻangá, ko e Mīsaia ne tatali fuoloa ki aí, ko e Pilinisi ʻo e Melinó, ko e Tuʻi ʻo e Ngaahi Tuʻí, ko hotau Fakamoʻuí, mo hotau Huhuʻí.
Kuo kole mai ʻe he palōfita ʻa e ʻOtuá, Palesiteni Lāsolo M. Nalesoni, ke tau “[fakaʻatā] ha taimi maʻá e ʻEikí ʻi [heʻetau] moʻuí—ʻi he ʻaho kotoa pē.”1
ʻOku tau fakaʻatā ha taimi maʻá e ʻEikí he ʻaho kotoa pē ʻi heʻetau ʻai e lotú ko ha konga ʻo e ʻaho takitaha. ʻOku tau lehilehiʻi hotau laumālié ʻaki e folofola ʻa e ʻEikí ʻi he ngaahi tohi folofolá. ʻOku tau maʻu ha taimi lahi ange ki he temipalemāʻoniʻoní. Tau teuteuʻi muʻa kitautolu ʻi he ʻaho takitaha koeʻuhí ke tataki kitautolu ʻe he ʻEikí ʻi hono tokoniʻi ʻa kinautolu ʻoku nau fiemaʻu ʻetau tokangá mo ʻetau ʻofá. Ko e taimi Kilisimasí ko ha taimi fakaʻofoʻofa ia ke fakamālohia ai e ngaahi tōʻonga moʻui ko ʻení ʻi heʻetau moʻuí.
ʻOku ou tāpuakiʻi kimoutolu ko e ʻAposetolo ʻa e ʻEiki ko Sīsū Kalaisí, ʻi hoʻomou fulifulihi hoʻomou tōʻonga moʻui fakaʻahó ke fakakau ai ʻa e ʻEikí, te mou ongoʻi ʻa e ʻofa mo e hōifua lelei ʻa e Fakamoʻuí. ʻOku ou tāpuakiʻi kimoutolu ʻi hoʻomou fakatupulaki hoʻomou ngāué he taimí ni ʻo aʻu ki he Kilisimasí, ʻe nofoʻia kimoutolu ʻe he holi ke hokohoko atu e ngaahi tōʻonga ko ʻení ʻi he Kilisimasí, pea ʻe tupulaki hoʻomou fakalakalaká ʻi hoʻomou hoko ko e taha ʻo e kau ākonga ʻa e Fakamoʻuí.