“Ko e Fāifeinga ke Hangē ko Kalaisi ʻi loto mo tuʻa Malaʻé,” Ki Hono Fakamālohia ʻo e Toʻutupú, Tīsema 2022.
Ko e Kaveingá mo Au
Ko e vahevahe ʻe he toʻutupú ʻa e founga ʻoku nau moʻui ʻaki ai e ngaahi lea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné
Ko e Faifeinga ke Hangē ko Kalaisi ʻi loto mo tuʻa Malaʻé
“ʻI heʻeku hoko ko ha ākonga ʻa Sīsū Kalaisí, ʻoku ou fāifeinga ke hoko ʻo hangē ko Iá.”
ʻI heʻeku kei tupu haké, naʻe ʻomi ʻe he vaʻinga soká ha loto-falala mo ha fiefia kiate au. Ko ia naʻe faingataʻa e taimi ne kamata foʻi ai e vaʻinga ʻeku timi soká. Ne mau ʻiloa ʻi heʻemau faʻa ikuná, ka ko ʻeni kuo hōloa ʻemau loto-falala ko ha timí. Ne u kafo foki peá u liʻaki ʻi ha ngaahi vaʻinga mo ha ngaahi ako vaʻinga ʻe niʻihi. Naʻá ku ongoʻi loto-mamahi ʻiate au pē koeʻuhí naʻe ʻikai ke u vaʻinga ʻi he tuʻunga naʻe ʻamanaki mai ki ai e niʻihi kehé.
ʻI ha efiafi ʻe taha kimuʻa ʻi ha vaʻinga, naʻe talamai ʻe he kau faiakó ʻe kamata haku kaungā-vaʻinga ʻi hoku tuʻungá. Naʻe ʻikai ke u ʻohovale, ka naʻá ku ongoʻi loto-foʻi. Naʻá ku feʻauhi mo hoku kaungā vaʻinga ko ʻení ki he tuʻunga tatau pea kuó ma fakatupulaki ha fetuʻotuʻani felongolongoi mo feʻiteʻitangi.
ʻI heʻeku sio ki he faingataʻaʻia ʻeku timí, ne u fakatokangaʻi hano tuku mai ki tuʻa hoku kaungā vaʻinga ʻi hoku tuʻungá. Naʻá ne lue ki tuʻa mei he malaʻé, ʻi ha fofonga mamahi moʻoni. Naʻe ueʻi au ke u talanoa ki ai. Naʻá ku ʻalu atu ʻo fai ange ha fakalotolahi. Naʻá ne ʻohovale he naʻe ʻikai ke ma feangaʻofaʻaki kimuʻa. ʻI heʻeku mavahé, ne u ongoʻi ha fiefia mo ha nonga. Talu mei he ʻaho ko iá mo e ʻikai ke ma toe feʻauʻauhi ka ma hoko ko ha ongo kaungāmeʻa.
Naʻá ku ako naʻa mo e vaʻinga soká, te u lava ʻo feinga ke muimui ki he sīpinga ʻa e Fakamoʻuí. ʻI heʻeku hoko ko ha tokotaha sipotí, ʻoku ʻikai ke u lava ʻo mapuleʻi e ngaahi laveá, taimi vaʻingá, mālohí, pe ulungiá. Ka te u lava ʻo mapuleʻi ʻeku tōʻonga fakakaukaú mo e anga ʻeku feohi mo e niʻihi kehé. ʻE lava ke tokoni maʻu pē e sīpinga ʻa e Fakamoʻuí, pea te u lava ʻo fili ke muimui kiate Ia. Ke hoko ko ha ākonga ʻa Kalaisí, ʻe fiemaʻu maʻu pē ʻa e ngāue mālohí, feilaulaú, mo e moʻui haʻisiá. Ka ʻi heʻetau tukupā ke muimui ʻia Kalaisí, ʻoku lahi ange ai ʻa e nongá, fiefiá, mo e taumuʻa ʻo e moʻuí.
ʻOku nofo ʻa e tokotaha naʻá ne faʻú ʻi Colorado, USA.