“Ko e hā ʻoku tau ʻilo fekauʻaki mo Mele, ko e faʻē ʻa e Fakamoʻuí,” Ki Hono Fakamālohia ʻo e Toʻutupú, Tīsema 2022.
ʻAi Hangatonu
Ko e hā ʻoku tau ʻilo fekauʻaki mo Mele, ko e faʻē ʻa e Fakamoʻuí?
Be It unto Me [Ke Hoko Mai Kiate Au], tā fakatātaʻi ʻe Liz Lemon Swindle
Ko e finemui ko Mele, ʻa ia naʻe fili ke hoko ko e faʻē ʻa Sīsū Kalaisí, naʻe haʻu ia mei Nāsaleti pea ko ha hako ia ʻo Tēvita. Naʻe kikiteʻi ʻe he kau palōfita ʻi he Fuakava Motuʻá ʻe hāʻele mai ʻa e Mīsaiá ʻi he hako fakatuʻi ʻo Tēvitá (hangē ko ʻení, vakai ki he ʻĪsaia 11:1). ʻI he hoko ʻa Mele ko e mātuʻa fakamāmani pē ʻa Sīsuú, naʻá ne ʻoange kiate Ia e hako ko iá.
Pea hangē ko hono tala ʻe he ʻāngelo ko Kepalelí kia Melé, “[ʻOku] … ʻofeina lahi [koe], ʻoku ʻiate koe ʻa e ʻEikí: ʻokú ke monūʻia ʻi he fefine fulipē” (Luke 1:28). Naʻe hōifua e ʻEikí kia Mele koeʻuhí naʻá ne moʻui taau, loto fakatōkilalo, loto-toʻa mo faivelenga. Pea naʻá ne fakahaaʻi e ngaahi ʻulungaanga ko ʻení ʻi he kotoa ʻo ʻene moʻuí.
Naʻe tali loto fakatōkilalo ʻe Mele ʻa e meʻa naʻe kole ange ʻe he ʻOtuá ke ne faí (vakai, Luke 1:38). Pea naʻá ne laka ki muʻa ʻi he loto-toʻa mo falala ki he ʻOtuá, neongo naʻe mei hoko e ngaahi tūkunga ʻo ʻene feitamá ke ne ongoʻi mā ai koeʻuhí naʻe teʻeki ai ke ne mali (vakai, Luke 1:46–55). Naʻá ne talangofua faivelenga foki ki he ʻOtuá. Naʻá ne fāʻeleʻi ʻa Sīsū, ohi hake Ia, mo akoʻi Ia. ʻI he fakaʻosinga ʻo ʻEne moʻui fakamatelié, naʻá ne ʻi ai mo Ia. Naʻá ne nofo mo ʻEne kau ʻAposetoló hili ʻEne toe tuʻu ʻo hāʻele hake ki he langí (vakai, Ngāue 1:14). Naʻe fakahōifua moʻoni ʻene ngaahi leleí.