“Ang mga Ngalan ni Kristo,” Alang sa Kalig-on sa mga Kabatan-onan, Dis. 2022.
Ang mga Ngalan ni Kristo
Ang Manluluwas adunay daghang ngalan ug mga titulo nga gihatag Kaniya.
Ania ang pipila lamang niadto nga mga ngalan ug unsa ang gihunahuna sa kabatan-onan sa tibuok kalibotan—kabatan-onan nga sama kaninyo—kabahin niini:
Alpha ug Omega
Tan-awa sa Pinadayag 1:8.
“Ganahan ko sa Alpha ug Omega tungod kay Siya mao ang atong sinugdanan ug kataposan sa atong panaw.”
Ang Maayong Magbalantay
Tan-awa sa Juan 10:11–14.
“Siya moabot aron mangita kanako ug makahibalo kon ako mawala, ug Siya kanunay nga mohigugma kanako.”
Prinsipe sa Kalinaw
Tan-awa sa Isaias 9:6.
“Kini nagpahinumdom kanako kon unsa kakalma ug kamalinawon ang mokanta diha sa Primary.”
“Ang kinabuhi mahimong puno sa kagubot, apan anaa Siya kanunay aron sa pagpakalma sa bagyo.”
Manluluwas
Tan-awa sa Isaias 43:11.
“Tungod kay kini nagpahinumdom kanako nga Siya miluwas kanako.”
“Ang Manluluwas nagpahinumdom kanako nga tungod sa gugma alang kanatong tanan siya mianhi sa kalibotan ug misakripisyo sa iyang kaugalingon tungod sa gugma ug pagkamasulondon.”
Tighupay ug Tigpalingkawas
Tan-awa sa Salmo 144:2; Isaias 49:13.
“Siya mohupay ug mopalingkawas kanato sa mga higayon sa personal nga pagkabilanggo.”
“Nakita nako nga sa matag higayon nga ako kapoyon, si Jesukristo kanunay nga naghulat nako nga modangop ngadto Kaniya.”
Manunubos
Tan-awa sa Isaias 47:4.
“Siya daghan kaayo og nahimo aron sa pagbayaw kanako.”
“Ang Iyang gugma ug grasya mitubos kanako gikan sa akong mga sala.”
“Ako nakabuhat og daghang sayop sa akong kinabuhi, ug nakahibalo ko nga Siya makatubos kanako basta maghinulsol lang ko.”
Kahayag sa Kalibotan
Tan-awa sa Juan 8:12.
“Siya sa literal nga paagi usa ka naggiya nga kahayag sa akong kinabuhi.”
Tawo sa Kagul-anan
Tan-awa sa Isaias 53:3.
“Siya nakasabot kanato sa hingpit. Ako mapasalamaton kaayo niana.”
“Ako wala mag-inusara sa akong kaguol.”
“Siya nakasabot gayod kon unsa ang akong gisinati.”
Bato
Tan-awa sa Deuteronomio 32:4.
“Siya mao ang akong bato tungod kay sa matag higayon nga gubot ang akong kinabuhi, ako makadangop kaniya ug Siya motabang nga ako magpadayon!”
“Ang bato nagpasabot sa iyang suporta alang kanato ug nagpahinumdom kanako nga kon Siya mao ang akong sukaranan ako dili mapukan.”
Tigpanalipod
Tan-awa sa Salmo 91:2.
“Siya mao ang akong tigpanalipod tungod kay Siya mao ang usa ka butang nga gikinahanglan kaayo nako.”
Hari sa mga Hari, Ginoo sa mga Ginoo
Tan-awa sa Isaias 9:6.
“Usa ka adlaw ang tanan makaila Kaniya isip ang Hari sa tanang kanasoran ug katawhan.”
Dios sa Israel
Tan-awa sa 2 Samuel 23:3.
“Ang ngalan nga Israel nagsilbi isip kanunay nga pahinumdom nga ipatigbabaw ang Dios.”
Immanuel
Tan-awa sa Isaias 7:14.
“Kini nagpasabot nga ‘ang Dios nag-uban kanato,’ ug kana nagdala og tumang kalinaw ug kahupayan!”
Kordero sa Dios
Tan-awa sa Juan 1:29.
“Kordero sa Dios. Siya nakaila kanato sa tibuok gayod ug sa hingpit.”
Magtatambag
Tan-awa sa Isaias 9:6.
“Ang mga magtatambag nakahibalo sa inyong mga panglimbasog. Sila motabang ninyo nga mabuntog kini.”
Katingalahan
Tan-awa sa Isaias 9:6.
“Siya mao ang usa ka tawo nga kinahanglan nakong daygon ug sundon.”
Higala
Tan-awa sa Doktrina ug mga Pakigsaad 93:45.
“Kini usa ka milagro nga maadunay ingon ana nga makaayo, manggihatagon nga Higala!!”
“Nakahibalo ko nga Siya akong Higala. Kini nakapahimong sayon nga mag-ampo diha sa Iyang ngalan.“
“Usa sa mga kahulogan sa higala mao ang ‘usa ka tawo nga anaa sa sama nga habig,’ ug ganahan ko niana!”