Ang Tema ug Ako

Kabatan-onan mipakigbahin kon giunsa nila pagsunod ang mga pulong sa mga Tema sa Young Women ug sa Korum sa Aaronic nga Pagkapari

Naningkamot nga Mahimong Sama ni Kristo sa sulod ug gawas sa Dulaanan

“Isip usa ka disipulo ni Jesukristo, ako naningkamot nga mahimong sama Kaniya.”

Ni Carolyn Esplin

Niadtong nagdako ko, ang pagdula og soccer nakahatag kanako og pagsalig ug kalipay. Busa malisod kadto dihang ang akong team sa soccer nagsugod na og kapildi sa mga dula. Kami nailhan nga mananaog, apan karon ang among pagsalig isip usa ka team nagkahuyang. Ako usab nasamdan ug nakapalta sa ubang mga dula ug mga pagbansay. Nasagmuyo ko sa akong kaugalingon tungod kay wala nako nahimo ang lebel sa pagdula nga gilaoman sa uban kanako.

Usa ka gabii sa wala pa ang dula, ang mga coach misulti nako nga ang usa ka kauban sa team maoy modula sa akong posisyon. Wala ko masurprisa, apan gibati ko og kaluya. Kini nga kauban sa team ug ako nagkompetensiya sa sama nga posisyon ug nakaugmad og hilom ug dili mahigalaon nga pag-indigay.

Samtang nagsud-ong sa akong team nga nanglimbasog, akong nakita ang kauban sa team nga nagdula sa akong posisyon gipaundang sa dula. Mibiya siya sa dulaanan, nga nasagmuyo kaayo nga tan-awon. Gibati nako nga kinahanglang magkig-istorya kaniya. Miduol ko ug mitanyag og mga pulong sa pagdasig. Nasurprisa siya, tungod kay dugay nang dili maayo ang among pagtagad sa usag usa. Samtang milakaw ko, gibati nako ang hingpit nga kalipay ug kalinaw nga misanap kanako. Sukad niadtong adlawa, dili na mi kompetensiya apan managhigala.

Akong gibati nga bisan sa soccer, ako maningkamot sa pagsunod sa ehemplo sa Manluluwas. Isip usa ka atleta, dili gayod nako makontrol ang pagkasamad, oras sa dula, mga kadaogan, og mga kapildihan. Apan akong makontrol ang akong kinaiya ug kon unsaon nako pagtagad ang uban. Ang ehemplo sa Manluluwas kanunay nga makatabang, ug ako mahimong mopili sa pagsunod Niya. Ang pagkahimong usa ka disipolo ni Jesukristo kanunay nga magkinahanglan og kakugi sa trabaho, sakripisyo, ug pasalig. Apan kon kita mopasalig sa pagsunod ni Kristo, adunay dugang nga kalinaw, hingpit nga kalipay, ug tumong sa kinabuhi.

Ang tagsulat nagpuyo sa Colorado, USA.