“Paggahin og Panahon alang ni Kristo sa Pasko,” Alang sa Kalig-on sa mga Kabatan-onan, Dis. 2022.
Kataposang Pulong
Paggahin og Panahon alang ni Kristo sa Pasko
Gikan sa debosyonal nga pakigpulong sa Brigham Young University, Dis. 7, 2021.
Mga paghulagway pinaagi ni Emily Jones
Unsa kanindot nga saulogon ang pagkatawo sa atong Manluluwas, ang Ginoong Jesukristo. Uban kaninyo, ako mosaksi nga Siya ang Anak sa Dios.
Kanunay kitang magmaisogon sa yano nga pagtuo nga Siya kinsa atong giangkon nga Siya mao: ang Tiglalang, ang dugay na nga gihulat nga Mesiyas, ang Prinsipe sa Kalinaw, ang Hari sa mga Hari, atong Manluluwas, ug atong Manunubos.
Ang propeta sa Ginoo, si Presidente Russell M. Nelson, nangamuyo kanato sa “[paggahin] og panahon alang sa Ginoo diha sa inyong kinabuhi—matag adlaw.”1
Naggahin kita og panahon alang sa Ginoo matag adlaw kon kita mohimo sa pag-ampo nga usa ka bahin sa atong matag adlaw. Atong giamuma ang atong mga espiritu sa pulong sa Ginoo diha sa mga kasulatan. Mangita kita og dugang nga oras alang sa balaan nga templo. Andamon nato ang atong mga kaugalingon matag adlaw aron ang Ginoo makagiya kanato sa pagtabang niadtong kinsa nanginahanglan sa atong atensiyon ug atong gugma. Ang panahon sa Pasko usa ka maanindot nga panahon sa paglig-on niini nga mga gawi diha sa atong kinabuhi.
Ako mopanalangin kaninyo isip usa ka Apostol ni Ginoong Jesukristo nga samtang inyong hulmahon ang inyong inadlaw-adlaw nga mga gawi nga maglakip sa Ginoo, inyong mabati ang gugma ug pag-uyon sa Manluluwas. Ako mopanalangin kaninyo nga samtang inyong dugangan ang inyong mga paningkamot sugod karon hangtod sa Pasko, ang tinguha sa pagpadayon niini nga mga gawi lapas sa Pasko magpabilin diha kaninyo, ug ang inyong paglambo isip usa sa mga disipulo sa Manluluwas motubo.