“Ang Manluluwas Makapalingkawas Kanato,” Alang sa Kalig-on sa mga Kabatan-onan, Dis. 2022.
Ang Manluluwas Makapalingkawas Kanato
Ikaw mag-atubang og daghang problema sa kinabuhi. Apan ang Langitnong Amahan mihatag sa Iyang Anak, si Jesukristo, aron motabang kanimo.
Ang Kahayag ni Kristo, ni Regan Reichert
Ikaw ba adunay problema nga gibati nimo nga lisod kaayo nga sagubangon? Tingali kini mora og imong sayop—o gani mora og mas labaw pa. Tingali kini tungod sa usa ka tawo nga imong gipangga. O tingali naggikan lang gayod kini sa dili hingpit nga kalibotan. Sa kinabuhi, walay kakulangan sa mga problema. Usahay, kana mabati nga sobra, sobra ka lisod.
Ang maayong balita mao nga kita dili kinahanglang mag-inusara nga mosagubang sa atong mga problema. Ang Manluluwas midala diha sa Iyang Kaugalingon sa atong mga sala, atong mga kagul-anan, ug atong mga kahuyang (tan-awa sa Alma 7:11–13). Siya nakahibalo kon unsa ang atong mga naagian ug unsa ang atong gikinahanglan. Samtang kita mosalig Kaniya ug modawat sa Iyang kabubut-on, Siya mopalingkawas kanato gikan sa bisan unsang problema nga atong giatubang.
Siya Mopalingkawas Kanato …
Gikan sa Sala
Usa ka batan-ong babaye nga ginganlan og Thricia mibati og mga pagbati sa pagkasad-an, kaulaw, ug pagkadili takos human makahimo og usa ka sayop nga butang. Siya misugod sa pagpaminaw og musika sa Simbahan, mitan-aw og mga video sa Simbahan, ug nagtuon og mga pakigpulong sa ebanghelyo nga mas tinuyo, apan ang mga pagbati wala mawagtang. Sa kataposan nakadesisyon siya nga makig-istorya sa iyang presidente sa branch. Sa iyang pagpakigkita kaniya, siya mibati sa gugma sa Langitnong Amahan ug ni Jesukristo alang kaniya. Karon siya mibati og pasalamat nga pinaagi sa Pag-ula sa Manluluwas, siya mapasaylo sa iyang mga sala ug makadawat og tabang nga makabangon gikan sa iyang mga kahuyang. “Ang akong gihuptan og maayo karon mao nga Siya anaa kanunay uban kanako niini nga panaw,” siya miingon.
Matag usa kanato mapakyas ug makasala. Apan ang Manluluwas makatabang. Siya dili kinahanglan nga mowagtang sa tanan nga mga sangpotanan sa atong mga gibuhat, apan Siya makatabang nato samtang kita mag-ampo sa Langitnong Amahan alang sa kapasayloan ug maningkamot nga tarongon ang mga butang.
Ang Manluluwas mipaagas og dugo ug namatay tungod sa imong mga sala didto sa Getsemani ug sa krus. Kon ikaw mopili nga maghinulsol ug mosunod Kaniya, “bisag unsa ka pula ang inyong sala, maputi kini kaayo” (Isaias 1:18).
Neither Do I Condemn Thee [Bisan Ako Dili Usab Mosilot Kanimo], ni Eva Timothy
Gikan sa Kasuko
Usahay kita mag-atubang og mga problema tungod sa dili maayo nga mga pagpili sa ubang mga tawo. Usa ka suod nga higala sa usa ka batan-ong babaye nagsugod og istorya og mga bakak kabahin niya ngadto sa ubang mga babaye sa iyang ward. Ang batan-ong babaye masabtan gayod nga nasuko, apan gipili niya nga magmabination, ug ang Langitnong Amahan ug ang Manluluwas mitabang kaniya.
Tingali ikaw adunay mga higayon usab nga nasuko ka. Tingali ang imong manghod nga lalaki “nanghulam” og mga butang nga dili iyaha o ang imong magulang nga babaye walay hunong sa pagsungog nimo. O tingali nakasinati ka og mas seryoso nga mga butang nga angay nga kasuk-an, sama sa pagpasagad o pang-abuso.
Kon mobati ka og kasuko, pag-ampo sa Langitnong Amahan. Paminaw sa mga pag-aghat nga imong madawat, ug salig sa gahom sa Manluluwas nga mopalingkawas nimo. Sama nga gidala Niya sa Iyang Kaugalingon ang imong mga sala, Siya nagbayad sa presyo alang sa mga binuhatan sa uban nga mipasakit kanato. Siya makatabang kanato nga kalimtan ang atong kasuko ug makakita og kalinaw sa tukmang higayon.
Gikan sa Kahadlok
Usa ka bag-o nga sister nga misyonaryo nahadlok sa daghang butang—pag-adto og bag-ong dapit, pakig-istorya ni bisan kinsa nga tawo kabahin sa ebanghelyo—bisan ang pagsakay og mga eroplano. Mao nga nahadlok siya sa dihang nakasugat sila og kusog nga hangin sa ilang flight usa ka adlaw niana. Apan niana nga higayon iyang nahinumdoman ang Manluluwas, ug bisan tuod og nahadlok pa siya, ang iyang hugot nga pagtuo Kaniya nagdala og pagbati sa kalinaw. “Si Jesukristo mipakalma sa kadagatan, ug Siya siguradong mopakalma sa akong kahadlok sa mga eroplano,” miingon siya.
Tingali ikaw nahadlok sa mga butang sama sa mga taas nga lugar, mga kaka, o maghatag og pakigpulong sa Simbahan. O tingali nag-atubang ka og kahingawa o nahadlok sa seryoso nga mga isyu sama sa mga sakit, panagbangi sa pamilya, o mga kalisod diha sa imong komunidad.
Bisan unsa pa man ang hinungdan sa imong mga kahadlok, hinumdomi nga ang Manluluwas nahigugma ug nakasabot kanimo. Ikaw tingali mobati gihapon og kahadlok usahay, apan ang imong hugot nga pagtuo ni Jesukristo makatugot Kaniya sa pagpakalma sa imong baloron nga kadagatan ug mopalingkawas nimo gikan sa kahadlok.
Gikan sa Kaguol
Si Chase naguol kaayo sa dihang ang iyang mga ginikanan nagdiborsyo. Usa ka adlaw, siya naghilak ug nag-ampo sa Langitnong Amahan. Samtang siya nag-ampo, gibati niya ang kalinaw ug nakahibalo nga si Jesukristo nag-atiman kaniya ug nakahibalo unsa ang iyang giagian.
Kitang tanan adunay mga higayon sa kaguol. Apan ang Manluluwas midala diha sa Iyang Kaugalingon sa mga sakit, mga kasakit, mga pagtintal, mga balatian, ug kamatayon aron nga Siya “masayod sumala sa unod unsaon sa pag-agak [o pagtabang] ang iyang katawhan” (Alma 7:11–12). Siya nakahibalo gayod kon unsa ang imong gibati ug unsaon ka sa pagtabang.
Ang imong mga problema tingali dili mawala, apan Siya “mopagaan sa mga alantoson diin anaa gitungtong sa diha sa [inyong] mga abaga” ug “[mo]palig-on [kaninyo] nga [kamo] makadaog sa [inyong] mga alantoson uban sa kasayon” (Mosiah 24:14–15).
Nabanhaw Siya, ni Dan Wilson
Gikan sa Kamatayon
Si Cherry 12 anyos pa lamang sa dihang namatay ang iyang mama. Si Cherry dili pa miyembro sa Simbahan ug mibati nga ang iyang kinabuhi wala nay kahulogan. Mibati siya nga naguba ug naguol ug nag-inusara. Naghunahuna gani siya nga kutloon ang iyang kaugalingong kinabuhi. Dayon nakakat-on siya kabahin sa ebanghelyo, ug siya karon nag-andam na aron mabunyagan alang sa iyang mama didto sa templo. Siya nakahibalo nga tungod kay ang Manluluwas namatay ug nabanhaw, kitang tanan mabanhaw sa umaabot nga adlaw. Ang kamatayon dili mao ang kataposan.
Ang mawad-an og usa ka minahal mao ang usa sa labing lisod nga butang nga atong maagian. Apan ang Manluluwas naghatag og paglaom. Samtang kita mosalig Kaniya, kita makalaom alang sa kahangtoran nga mas malipayon kay sa atong gihunahuna.
Oo, ang kinabuhi puno sa mga problema—mga gagmay, mga dagko, ug ang pipila nga mora og lisod kaayo nga sagubangon. Apan ang Langitnong Amahan mihatag sa Iyang Anak isip solusyon niining tanan. Samtang ikaw maningkamot sa pagsunod ni Jesukristo, Siya mohatag kanimo og kalig-on nga makalahutay ug mopalingkawas nimo sa matag higayon.