“Nganong importante man ang mga sumbanan sa Simbahan? Unsaon nako sa pagkuha og pagpamatuod niini?,” Alang sa Kalig-on sa mga Kabatan-onan, Dis. 2022.
Mga Pangutana ug Mga Tubag
“Nganong importante man ang mga sumbanan sa Simbahan? Unsaon nako sa pagkuha og pagpamatuod niini?”
Kini Mobayaw ug Molamdag Kanato
“Ang mga sumbanan importante tungod kay kini mobayaw ug molamdag kanato. Kini mogiya usab kanato sa paghimo og matarong nga mga pagpili, nga makatabang kanato nga mahimong mas mapaduol kang Kristo. Kita makabaton og pagpamatuod sa mga sumbanan pinaagi sa pagbasa ug pagtuon sa Alang sa Kalig-on sa mga Kabatan-onan nga booklet, nga nagpakita og importante nga mga baroganan ug mga sumbanan nga angay natong sundon.”
Samuel C., 15, Brazil
Ang Ginoo Moatiman Kanato
“Ang mga sumbanan sa Simbahan importante kaayo sa atong pisikal ug mental nga kahimsog. Ang Ginoo gusto nga kita mahimong himsog ug malipayon, ug Siya mihimo og mga sumbanan aron sa pag-atiman kanato! Aron makabaton og pagpamatuod niini nga mga kamatuoran, kinahanglan kitang mag-ampo aron makahibalo kon tinuod ba kini, mobasa sa mga kasulatan, ug mosunod sa mga sugo. Ang Ginoo gusto nga kita makabaton og pagpamatuod niini nga mga kamatuoran.”
Dana S., 12, Argentina
Pangitaa ang mga Panalangin
“Ang mga sumbanan sa Simbahan importante tungod kay kini motabang kanato nga mapalambo ang atong kaugalingon ug mahimong sama ni Ginoong Jesukristo. Ako nakabaton og pagpamatuod niini samtang gipangita nako ang mga panalangin nga resulta sa pagsunod sa mga sumbanan sa Simbahan. Kini nagpahinumdom kanako sa balaanong katuyoan sa matag sumbanan ug miawhag kanako sa pagpabilin sa dalan sa pakigsaad.”
Christian R., 18, Utah, USA
Ang mga Sumbanan Magdala og Kalipay
“Ang mga sumbanan sa Simbahan mas mopaduol kanato ngadto ni Kristo. Motabang kini kanato nga mapahiangay ang atong kaugalingon ngadto sa plano sa Langitnong Amahan, nga magdala kanato og walay kataposan nga kalipay. Kon kita mopili sa pagsunod niini nga mga sumbanan, atong mapalig-on ang atong pagtuo diha ni Kristo ug mahimong mas mahisama Kaniya.”
Kenison M., 17, Virginia, USA
Pagpakita og Hugot nga Pagtuo, ug Salig sa Kabubut-on sa Dios
“Kon ako mopili sa paghupot sa mga sumbanan sa Simbahan, ako makaangkon og pagpamatuod niini pinaagi sa Espiritu Santo. Atong nahibaloan gikan sa Ether 12:6 nga kita ‘dili makadawat og saksi hangtod human sa pagsulay sa [atong] hugot nga pagtuo.’ Kon kita adunay igo nga pagtuo nga mosalig nga kini nga mga sumbanan kabubut-on sa Dios alang kanato, kita makadawat og pagsaksi kabahin niini sa panahon sa Dios.”
Camilla P., 17, Hawaii, USA
Motuman ug Mosalig
“Ang mga sumbanan sa Simbahan anaa aron sa pagtabang kanato nga magpabilin sa dalan sa pakigsaad. Bisan kon kita dili kanunay nga makasabot ngano nga ang usa ka piho nga sumbanan importante, kita makabaton og pagpamatuod kabahin niini pinaagi sa pagtuman niana nga sumbanan ug pinaagi sa pagsalig diha sa atong Langitnong Amahan, ni Jesukristo, ug sa atong mga lider sa Simbahan.”
Anwyn T., 16, Florida, USA