“Ang mga Tamboanan sa Langit,” Alang sa Kalig-on sa mga Kabatan-onan, Dis. 2022.
Dali, Sunod Kanako
Ang mga Tamboanan sa Langit
Ako napanalanginan sa tibuok nakong kinabuhi pinaagi sa pagsunod sa balaod sa ikapulo.
Mga litrato gikan sa Getty Images ug sa maayong kabubut-on ni Elder Revillo
Dihang ang akong mga ginikanan nakabig ngadto sa Ang Simbahan ni Jesukristo sa mga Santos sa Ulahing mga Adlaw, ang akong amahan walay klaro nga pangita. Niadtong panahona, sama sa karon, nagdagsang ang kapobre sa Pilipinas. Lisod pangitaon ang trabaho.
Busa nag-ampo siya og miingon sa Dios nga siya adunay pagpamatuod sa balaod sa ikapulo apan nagkinahanglan nga makakaplag og trabaho aron makasunod niini. Misaad siya sa Langitnong Amahan nga siya mobayad og matinud-anon nga ikapulo sa tibuok niya nga kinabuhi.
Nan, ang akong amahan nakakita gyod og trabaho. Nakatrabaho siya isip tiglimpyo sa lokal nga buhatan nga planta sa Coca-Cola. Samtang siya nagsugod sa pagbayad og ikapulo, ang iyang kinabuhi nagsugod og kausab.
Napanalinginan sa dili Masukod nga Panalangin
Naandan namo sa una nga maglakaw padulong sa simbahan kay wala kami igo nga kwarta aron ipliti sa pampubliko nga transportasyon. Kana nagsugod sa pagkausab. Ang akong papa naningkamot og maayo sa iyang ubos nga trabaho ug hinayhinay nga mitaas ang ranggo, sa kataposan nahimong usa ka sales manager. Aduna na kami igong kwarta sa transportasyon agig dugang sa pagkaon. Usa ka tinuod nga milagro mao nga ang tanang unom ka anak sa among mga ginikanan nakatungha ug nakahuman og kolehiyo.
Kabahin niana nga milagro, bisan ang mga kauban sa akong amahan sa trabaho nasurprisa. “Unsaon nimo pagpa-eskuwela sa tanan nimong mga anak sa kolehiyo?” nangutana sila. “Pareha ra ka dako ang atong kinitaan. Di ni masabtan!”
Ang akong amahan kanunay nga mopahiyom ug moingon, “Napanalanginan ko tungod sa pagsunod sa ebanghelyo. Napanalanginan ko tungod kay nagbayad ko sa ikapulo.”
Mga Saad ug Proteksiyon
Ang propeta sa Daang Tugon nga si Malachi nagtudlo, “Dad-a ninyo ang tibuok ikapulo ngadto sa balay nga tipiganan … ug pinaagi niini sulayi ako karon … kon dili ba buksan ko kaninyo ang mga tamboanan sa langit, ug bu-boan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10).
Akong nasaksihan kon sa unsang paagi ang akong pamilya ug ako napanalanginan sa temporal ug espiritwal nga paagi pinaagi sa pagsunod niini nga sugo. Nakasinati ko og pipila ka mga hitabo sa akong kinabuhi diin ako gipanalipdan gikan sa pisikal o espirituhanon nga mga piligro. Nagtuo ko nga ang Ginoo nanalipod nako tungod kay matinud-anon ko nga nagbayad sa akong mga ikapulo.
Kon ang Pagbayad sa Ikapulo Malisod
Sa Pilipinas, nakita nako ang kapobre bisan asa. Akong gitambagan ang daghang mga miyembro sa Simbahan mahitungod sa importansiya sa pagbayad sa ikapulo ug mga halad, bisan kon dili kini sayon.
Nakahinumdom ko sa usa ka tawo nga bag-o lang mipasakop sa Simbahan. Ako ang iyang stake president niadtong panahona. “President, unsaon man nako pagbayad sa ikapulo?” nangutana siya. “Ang akong kinitaan dili na gani paigo aron ipalit og igo nga pagkaon.”
Kini nga igsoon usa ka driver sa traysikol. Iyang gitrabahoan og maayo ang tanan niya nga kinitaan. “Nagkinahanglan kini og hugot nga pagtuo,” ako siyang gitubag. “Apan mosaad ko nga samtang ikaw mosunod sa balaod sa ikapulo, ang Ginoo mopanalangin nimo.”
Gibuhat niya kini. Pipila ka bulan ang milabay, naghimamat na usab nako kini nga igsoon. Gisultihan ko niya nga ang Ginoo sa tinuod mipanalangin niya sa tanan niya nga gikinahanglan.
Si Presidente Gordon B. Hinckley (1910–2008) kausa mibisita sa Pilipinas ug nahasol sa kakabos nga iyang nakita didto. “Nagtuo ko sa tibuok nakong kasingkasing,” si Presidente Hinckley miingon “nga kon sila modawat sa ebanghelyo ug mosunod niini, mobayad sa ilang mga ikapulo ug mga halad, bisan kon kini gamay ra kaayo, ang Ginoo motuman sa Iyang karaan nga saad alang kanila, ug sila adunay kan-on sa ilang mga panaksan ug panapot sa ilang buko-buko ug kapasilongan sa ilang mga ulo.”1
Ako nakakita sa katumanan niana nga saad.
Ang Dakong Epekto sa mga Halad
Gusto ko nga mopakigbahin og usa ka hunahuna kabahin sa mga halad. Ang ubang mga batan-on tingali dili makaamgo sa hilabihan nga kaayohan nga magagikan sa mga halad sa puasa, makitawhanon nga mga halad, ug ubang mga donasyon. Apan ako mismo nakasaksi sa dakong epekto niini nga mga donasyon sa Pilipinas.
Nakakita ko og mga pamilya nga naluwas sa kagutom tungod sa mga halad sa puasa. Dugang pa, daghang kaayohan ang nahimo pinaagi sa makitawhanon ug ubang mga halad. Ang paghatag og kantidad alang sa usa ka kan-anan ngadto sa humanitarian aid [makitawhanon nga panabang], pananglitan, tingali makapakaon og usa ka pamilya sa lain nga bahin sa kalibotan sulod sa usa ka adlaw o dugang pa.
Samtang kamo mosunod sa balaod sa ikapulo ug mga halad, ako mopamatuod uban ni Malachi nga ang Ginoo moabli sa mga tamboanan sa langit ug “buboan kamo og panalangin.”
Nagkinahanglan kini og hugot nga pagtuo ni Jesukristo.