“Dan-agi ang Kalibotan sa Serbisyo sa Pasko,” Alang sa Kalig-on sa Kabatan-onan, Dis. 2022.
Dan-agi ang Kalibotan sa Serbisyo sa Pasko
Ang mga Kabatan-onan sa tibuok kalibotan nagpaambit kon sa unsang paagi ang pagserbisyo sa uban nakahimo og usa ka espesyal nga panahon sa Pasko.
Adunay gamay lang nga maayong paagi sa paghinumdom sa Manluluwas atol sa Kapaskohan kay sa pagsunod sa Iyang ehemplo sa pagserbisyo sa uban. Kamo mobati sa kalinaw ni Kristo ug gugma samtang kamo mohatag sa inyong panahon ug mga talento. Aniay pipila ka mga batan-on gikan sa tibuok kalibotan kinsa napanalanginan pinaagi sa serbisyo nga ilang gihatag atol sa Kapaskohan.
Pasko sa Bag-ong Dapit
Si Brandon (16), Jake (15), Melissa (12), ug Grace (9) mibalhin ngadto sa Uruguay sulod sa tulo ka tuig dihang ang ilang mga ginikanan gitawag isip mga lider sa Uruguay Montevideo Mission. Ang Disyembre init ug dagaang didto sa Uruguay, lahi ra kaayo sa bugnaw, daghang snow nga mga Pasko nga ilang naandan. Bisan tuod ang pagkalayo gikan sa ilang puluy-anan ug pamilya sa tulo ka Kapaskohan lisod, sila nakakaplag og kalipay samtang sila nagserbisyo sa mga tawo sa ilang palibot. Matag panahon sa Pasko, ang pamilya ug mga misyonaryo magsul-ob og pula nga “Light the World” nga mga shirt samtang sila magserbisyo libot sa ilang nasod.
“Miadto mi sa mga plaza ug mga baybayon sa Montevideo kuyog sa mga misyonaryo ug naglimpyo sa mga basura ug mga gapnod gikan sa mga bagyo sa ting-init,” miingon si Jake. Si Brandon nakahinumdom, “Sa unang Pasko nga didto mi sa Uruguay, nagpapilit mi og mga kendi sa ‘Light the World’ nga pang-apod-apod nga mga card aron ipanghatag. Sa pagsalop sa adlaw, daghang mga tawo magpundok subay sa baybayon, busa tukma kadto nga dapit aron maghatag kanila og mga kendi ug card, bisan dili kaayo mi makaistorya og Spanish nga pinulongan.”
Litrato pinaagi ni Julie Olsen
Alang niini nga mga managsuon, ang pagserbisyo nakahatag kanila og pagbati nga wala sila malayo sa ilang puluy-anan ug nakatabang nila sa pagtumong sa ilang hunahuna ngadto sa Manluluwas ug sa tinuod nga kahulogan sa Pasko.
Si Jake miingon, “Ang paghimo og serbisyo alang sa Light the World nakatabang sa paghimo sa pagbati sa Pasko nga espesyal. Bisan tuod naanad mi nga adunay white Christmas [puno sa snow nga Pasko], ang pagserbisyo nakahimo sa init nga summer sa Uruguay nga mora og Pasko.” Miuyon si Melissa. “Ang paghimo og serbisyo nakapalimot nako kon unsa ang akong napaltahan nga mga kalihokan sa amoa,” siya miingon. “Ang pagpalipay sa uban nakapahimo namo nga malipayon ug nakatabang namo nga mobati nga morag naa lang gihapon sa amoa.”
Pagpakaylap sa Hingpit nga Kalipay ni Kristo
Si Jana B. gikan sa Baden-Württemberg, Germany, ganahan usab nga mosangyaw sa hingpit nga kalipay sa Pasko pinaagi sa simple nga mga buhat sa serbisyo.
“Sa sinugdanan, mihatag mi sa among mga silingan og mga gasa sama sa sabon, mga kandila, o mga cookie,” miingon si Jana. “Dayon, sa hinayhinay, ang mga silingan nagsugod usab sa pagpanghatag og mga gasa sa Pasko. Karon nahimo na kini nga tradisyon. Karong tuiga nagluto mi og mga cookie para sa among mga silingan kuyog sa mga misyonaryo ug nakig-istorya sa among mga silingan aron dad-an sila og kalinaw ug hingpit nga kalipay. Dili mi kanunay mohimo og mga butang sa among mga silingan ug usahay makalimot mi nga anaa ra sila permi para namo. Kon mohatag mi nila og mga gasa sa Pasko, sama ra kini sa pasalamat sa pagtabang kanamo sa tibuok tuig.”
Si Jana nakakaplag usab og oras alang sa pagserbisyo sa iyang pamilya.
“Ang akong lola 90 anyos ug nagpuyo nga nag-inusara,” siya miingon. “Maglisod siya og adto bisan asa. Sa miaging Pasko daghan mi og gibuhat aron sa pagserbisyo niya, ilabi na nga mao kadto ang iyang unang Pasko nga wala si Lolo. Ang akong lola kanunay nga malipay kaayo kon moduaw mi. Kini nagpakita niya nga amo siyang gihigugma.”
Labaw nga importante sa tanan, si Jana nasayod nga ang pagserbisyo makatabang niya sa pagsunod sa ehemplo sa Manluluwas ug mahinumdom sa tinuod nga kahulogan sa Pasko.
“Kon kamo magsaulog sa Pasko pinaagi sa pagdala og hingpit nga kalipay sa mga tawo, kamo mapahinumdoman bahin ni Jesukristo, ug kamo makapaambit sa hingpit nga kalipay sa Iyang mensahe ngadto sa uban,” miingon si Jana.
Inyong Kaugalingong Serbisyo sa Pasko
Karon nga Pasko, paghunahuna og mga tawo sa inyong palibot kinsa nagkinahanglan og gamay nga kamabination. Puwede kamo nga magluto og pagkaon para sa imong pamilya o mag-imbita og usa ka higala ngadto sa kalihokan sa kabatan-onan. Pwede mong magbantay og bata sa silingan, moggahin og oras uban sa inyong higala sa pagbuhat sa ilang paborito nga mga butang, magdala og pampainit nga habol ngadto sa ospital sa mga bata, o magdonar og mga dulaan ug mga sinina sa lokal nga charity.
Sa dili madugay inyong mahibaloan nga ang paghimo sa uban nga malipayon sa kasagaran mao ang mahimong labing maayo nga gasa nga imong mahatag ngadto usab sa imong kaugalingon! Kon sa pisikal dili kamo duol ngadto sa tawo nga inyong gihigugma, hinumdomi nga ang teknolohiya makatabang gihapon ninyo sa pagserbisyo kanila. Sulayi sa pag-post diha sa social media kon ngano nga gihigugma ninyo sila, panaygon ngadto kanila pinaagi sa video nga tawag, or pagpadala og makalingaw nga package sa mga sulat ug snowflakes nga hinimo sa papel pinaagi sa koreyo. Ang inyong serbisyo makapalipay sa kinabuhi sa usa ka tawo.