“Unsa man ang atong nahibaloan bahin ni Maria, ang inahan sa Manluluwas?,” Alang sa Kalig-on sa mga Kabatan-onan, Dis. 2022.
Direkta sa Punto
Unsa man ang atong nahibaloan bahin ni Maria, ang inahan sa Manluluwas?
Be It unto Me [Matuman Unta Kanako], pinaagi ni Liz Lemon Swindle
Ang batan-ong babaye nga si Maria, kinsa gipili nga mahimong inahan ni Jesukristo, nagagikan sa Nazareth ug usa ka kaliwat ni David. Ang mga propeta sa Daang Tugon nanagna nga ang Mesiyas magagikan sa harianong kaliwatan ni David (tan-awa, pananglit sa Isaias 11:1). Isip ang bugtong yutan-ong ginikanan ni Jesus, si Maria mihatag Kaniya niana nga kaliwatan.
Usab, sama sa gisulti ni anghel Gabriel ngadto ni Maria, “Kumusta ka, babayeng hinatagan sa grasya, ang Ginoo anaa uban kanimo: Dalaygon ikaw diha sa mga kababayen-an” (Lucas 1:28). Si Maria nakaangkon sa pagdapig sa Ginoo tungod kay siya takos, mapaubsanon, may kaisog, ug matinud-anon. Ug iyang gipakita kini nga mga kalidad sa tibuok niya nga kinabuhi.
Si Maria mapaubsanong midawat sa unsa nga gihangyo sa Dios nga iyang buhaton (tan-awa sa Lucas 1:38). Ug siya maisogon nga mipadayon ug misalig sa Dios, bisan kon ang mga sirkumstansiya sa iyang pagpanamkon mahimong hinungdan sa iyang kaulawan tungod kay wala pa siya maminyo (tan-awa sa Lucas 1:46–55). Siya usab matinud-anong misunod sa Dios. Siya nanamkon ni Jesus, nagpadako Kaniya, nagtudlo Kaniya. Sa kataposan sa Iyang mortal nga kinabuhi, siya nagauban Kaniya. Nakig-uban siya sa Iyang mga Apostoles human Siya mibangon pag-usab ug miadto sa langit (tan-awa sa Mga Buhat 1:14). Pinaagi sa iyang pagkamaayo, siya tinuod nga gidapigan pag-ayo.