Unsaon Nako sa Pagpaambit sa Basahon ni Mormon?

Ni McKay N.

Ania kon sa unsang paagi ang kabatan-onan sa tibuok kalibotan magkahiusa aron sa paghatag sa Basahon ni Mormon og bag-o nga tingog.

Nakahinumdom ba kamo ni Presidente Nelson nga mitugtog sa awit nga “Paglaom sa Israel” diha sa piyano atol sa tibuok kalibotan nga Music Festival sa Kabatan-onan niadtong Marso 17, 2021? Mitawag kanato isip ang batalyon sa kabatan-onan sa Ginoo, siya midapit kanato sa pagtugot sa Espiritu nga mogiya kanato samtang kita motabang sa pagpundok sa Israel niining ulahing mga adlaw.

Tingali sama sa kadaghanan ninyo, ako naghunahuna kon unsay mahimo nako isip usa ka 15-anyos aron makasunod sa pagdapit sa propeta, ilabi na sa tunga-tunga sa tibuok kalibotan nga pandemya.

Sa miaging tuig, si Presidente Nelson midapit usab sa kalibotan sa #PagpaminawKaniya, buot ipasabot nga maminaw sa mga pulong ni Ginoong Jesukristo. Nakahibalo ko nga ang Basahon ni Mormon laing tugon ni Jesukristo. Ang ideya miabot kanako nga motabang sa katawhan nga makapaminaw sa tingog sa Ginoo pinaagi sa pagpaambit sa Basahon ni Mormon sa bag-o nga pamaagi: isip podcast nga girekord sa mga tinedyer.

“Naghunahuna ko nga tingali nindot nga makadungog sa basahon nga gibasa sa ordinaryo nga mga tinedyer sama nimo ug nako.”

Isip dugang sa mga rekording sa Basahon ni Mormon nga gihimo sa mga propesyonal nga gikan sa Simbahan, tingali nindot nga makadungog sa basahon nga gibasa sa ordinaryo nga mga tinedyer sama nimo ug nako, sa paagi nga kini nasinati namo. Kita dili kanunay nga hingpit nga mobasa, ug dili tanan nakahibalo unsaon sa paglitok sa matag pulong og insakto. Apan OK ra kana tungod kay wala bitaw bisan usa nato nga hingpit. Sa pagkatinuod mora og ganahan gani ko sa mga sayop sa pipila ka rekording—kini nakapahimo nako nga mobati nga mora og naminaw ko sa usa sa akong mga higala nga nagbasa.

Ang proyekto dako gayod nga gimbuhaton. Makita nga ang paghangyo, pag-edit, pagpundok, pagmantala, ug pag-host sa usa ka podcast nga adunay mga rekording gikan sa 250 nga nagkalin-laing tawo medyo dako gayod nga gimbuhaton. Ang resulta mao ang rekording sa tibuok teksto sa Basahon ni Mormon nga naglakip sa mga magbabasa gikan sa 15 ka estado sa U.S. ug 10 ka nasod gikan sa tibuok kalibotan. Ang mga rekording madungog diha sa website nga www.teensreadthebook.com ug sa tanang nag-unang mga plataporma sa pagpaminaw sa podcast ubos sa Teens Read the Book [Ang mga Tin-edyer Nagbasa sa Basahon].

Si McKay (sa tunga nga nagsul-ob og yellow shirt) nakig-uban sa laing mga kabatan-onan nga mitabang sa podcast. Nalingaw sila sa kahigayonan nga mag-istoryahanay kabahin sa podcast ug maghunahuna nga usa ka panalangin ang motrabaho niini.

Ganahan ko nga maminaw sa nagkadaiyang mga tingog ug tonada sa kabatan-onan nga nagpadala sa mga rekording. Sa pagkahibalo nga ang ilang mga tingog madungog sa tibuok kalibotan, daghang magbabasa ang naningkamot og maayo aron matarong gayod ang ilang mga rekording. Ang uban, sama ni Thomas gikan sa New Zealand (kinsa mibasa sa 3 Nephi 20) o si José gikan sa Peru (kinsa mibasa sa 3 Nephi 23), nagbansay og pila ka oras o mga adlaw sa dili pa magrekord. Usa ka grupo sa 10 ka batan-on nga gikan sa South Korea ang nag-atubang og hagit sa Inenglis kay kini dili ang ilang nag-unang pinulongan. Ang ilang solusyon mao ang magtinabangay, matag rekording pipila ka bersikulo sa matag higayon ug sumpayon kini ngadto sa unsay nahimong 2 Nephi 28 ug 29.

Ang akong tumong sa dihang gisugdan nako ang proyekto mao ang pagtabang sa katawhan nga mobati sa Espiritu ug mas mopaduol ni Jesukristo. Ang pagkakita sa kabatan-onan, kadaghanan kinsa wala ko makaila, nga motubag sa akong pagdapit nagpakita nako kon unsa kalawom ang ilang pagbati kabahin sa Basahon ni Mormon. Ang ilang mga pulong na-download na karon ug gipaminaw na sa liboan ka higayon. Sila mitabang sa katawhan nga mobati sa Espiritu sa Dios.

Usa ka misyonaryo nga nakauli na ang misulat kanako nag-ingon nga sa bag-o lang nga mga bulan siya “nag-ampo alang sa bag-o nga pamaagi sa pagbasa sa [Basahon ni Mormon] o usa ka presko nga pamaagi sa pagtuon. Kini nga proyekto mao ang tubag sa akong mga pag-ampo.”

Ako mapasalamaton niadtong kinsa adunay kontribusyon niini nga proyekto ug sa paagi nga akong nabati ang tabang sa Ginoo sa pagbuhat niini. Ako mapasigarbohon nga nahimong kabahin sa batalyon sa kabatan-onan sa Ginoo, nagbarog tupad sa uban nga nahigugma sa Basahon ni Mormon. Ako usab nakat-onan nga kon kita motubag sa mga pagdapit gikan sa propeta sa Ginoo, ang Espiritu mogiya sa atong mga paningkamot.

Sa akong kaugalingon, nakahibalo ko nga ang Basahon ni Mormon makatabang kanato nga mabati ang Espiritu ug mas makapaduol ngadto sa Langitnong Amahan ug ni Jesukristo. Pipila sa labing malipayon nga mga higayon sa akong kinabuhi mao ang kon ako makanunayon nga nagbasa sa Basahon ni Mormon. Nanghinaot ko nga tanan nato nga naa sa batalyon sa kabatan-onan sa Ginoo maminaw sa tingog sa Ginoo ug makabati sa Iyang kalig-on pinaagi sa mga pulong sa Basahon ni Mormon.

Ang tagsulat nagpuyo sa California, USA.