“Kon Kini Nga Pasko Lahi,” Alang sa Kalig-on sa mga Kabatan-onan, Dis. 2022.
Kon Kini Nga Pasko Lahi
Kalinaw panahon sa Pasko, o sa bisan kanus-a nga panahon sa tuig, sa kasagaran magdepende sa tumong.
Mga paghulagway pinaagi ni Jim Madsen
Nagsubli sa mga pulong sa usa ka apostol, si David miingon, “Ang kahadlok usa ka punoang hinagiban ni Satanas sa paghimo sa katawhan nga dili magmalipayon.”1
Si David Ikegami, usa ka deacon gikan sa Oahu, Hawaii, gitahasan sa pagpakigpulong atol sa Dominggo nga komperensiya sa misyon. Pito ka bulan ang milabay iyang nasinati ang usa sa labing lisod nga Pasko sukad—dili lamang alang sa iyang pamilya, apan sa tibuok nasod. Gipili niya nga magpahayag sa iyang opinyon batok sa kahadlok.
Siya pamilyar kaayo kabahin sa kahadlok. Tuig kadto sa 1942. Sa mga bulan nga milabay, ang maanindot og talan-awon nga isla diin nagpuyo ang pamilya ni David nagusbat tungod sa pagkagun-ob samtang ang Japan mibomba sa Pearl Harbor. Sa sunod adlaw human niadtong makapukan nga pag-atake, ang Estados Unidos misulod sa Ikaduhang Gubat sa Kalibotan.
Ang kahadlok alang sa umaabot sa gihapon mitabon sa kayutaan sama sa usa ka habol. Ang nakapasamot sa kalisod, mao nga ang mga Japanese-American, sama sa pamilya Ikegami, nakasinati og grabe nga pagsaway sa kaliwatan human sa pagbomba sa Pearl Harbor. Ang kinabuhi dili simple ug dili pud sayon alang niini nga batan-ong lalaki.
Nan giunsa man niya pagkaplag og kalinaw? Sa usa ka butang, iyang gitutokan ang pagserbisyo. Siya miapil sa usa ka grupo kinsa mitabang sa paghimo og mga dalan ug paghawan sa tunokon nga mga kahoy nga kiawe gikan sa mga dalan alang sa mga kampo sa militar. Sa kasamtangan, ang iyang pamilya miapil sa mga paningkamot sa pagkolekta og pundo aron itabang sa mga sundalo sa U.S. Kini nga mga pundo gigamit alang sa tanan gikan sa pagpalit og mga basahon ngadto sa mga tilon sa sine ug mga projector aron makatabang sa pagpausbaw sa ilang kadasig.
Si David dayon miingon, mikutlo og usab gikan sa mao gihapon nga Apostol, si Elder John A Widtsoe, “Adunay kahilwasan bisan asa nga ang mga katawhan sa Ginoo magpuyo sa hilabihang katakos aron makaangkon sa sagradong ulohan sa pagkalungs[o]ranon diha sa Zion sa atong Ginoo.”2
Si David nakakaplag og kalinaw pinaagi sa pagtumong sa hunahuna ngadto ni Jesukristo.3
Kalinaw panahon sa Pasko
Ang pagkaplag og kalinaw importante bisan kanus-a sa tibuok tuig. Apan adunay piho nga mga panahon sa tuig nga kasagaran adunay daghang mga tradisyon, mga gilaoman nga hitabo, ug mga kalingawan nga makabalda sa kalinaw nga atong gilaoman. Pananglitan, tingali aduna kamoy lista sa mga buluhaton alang sa ting-init [summer], tingali adunay lista alang sa tingtugnaw [winter], ug halos sigurado lista alang sa panahon sa Pasko. Unsa ang atong buhaton niana nga mga lista kon ang kinabuhi malisod?
Atol sa mga holiday, ilabi na gayod, dali kaayong mamatikdan kon dili maayo ang dagan sa atong kinabuhi. Bisan gani ang mga panghitabo nga nahitabo sa mas sayo nga bahin sa tuig, sama sa kamatayon diha sa pamilya, mahimong makapasakit og usab sa panahon sa mga holiday. Sa tuig nga sama niana, klaro kaayo nga adunay usa ka importanting butang nga lahi panahon sa Pasko.
Si Maria, usa ka 16 anyos ang pangidaron gikan sa Brazil, nanglimbasog usa niana ka Pasko human ang pagkamatay sa ikaduha nga minahal nga apohan. Pipila ka tuig ang milabay ang pagkamatay sa iyang lolo sa habig sa iyang inahan, ug karon nawala na usab ang iyang lain nga lolo.
“Nakahinumdom ko nga ang Pasko kanunay nga malipayon ug talagsaon nga kasinatian,” miingon si Maria. “Nakahinumdom ko nga nagkanta og mga himno uban sa akong pamilya, mibangon sa pagkagabii aron makakita sa akong regalo sa Pasko, miapil sa pasundayag sa pagkatawo ni Kristo didto sa eskuwelahan sa elementarya, ug uban pang mga butang nga nakapahimong halandomon sa akong pagkabata.”
Si Maria kanunay nga malingaw uban sa iyang pamilya. Apan karon, sa pagkamatay sa iyang ikaduha nga lolo, ang ubang kamaya nawala gikan kaniya sa panahon sa Pasko. Ang iyang paagi sa pagbuntog sa kagul-anan, sama sa kang David, naglakip sa pagpunting sa hunahuna ngadto kang Kristo.
“Ang pagpunting sa hunahuna ngadto ni Jesukristo, labi na panahon sa Pasko, naghatag kanako og kasigurohan nga kini nga mga pagbati sa kagul-anan ug kamingaw dili magpadayon sa hangtod,” miingon si Maria. “Ako nasayod nga ang Dios kanunay nga nag-uban kanako. Sa paglabay sa panahon akong gibati kining kahaw-ang nga napuno sa gugma sa Manluluwas.”
Si Maria aduna pay usa ka buhi nga apohan—ang iyang lola sa habig sa iyang inahan. “Ako malipayon sa tanang panahon nga akong gikauban ang akong lola,” siya miingon. “Bisan kon ang akong uban nga mga apohan ug mga kaliwat wala na nako ikauban, nakahibalo ko nga ako silang igkita og usab sa umaabot nga adlaw. Kami adunay gipaabot nga kahangtoran nga kami magkauban.”
Ang Tinubdan sa Kalinaw
Ang Unang Kapangulohan bag-ohay lang nga mipakigbahin niini nga mensahe ngadto sa kalibotan: “Kita nasayod nga ang makanunayon nga kalinaw makaplagan pinaagi ni Jesukristo. Siya makapakalma ug makahupay sa atong mga kalag bisan sa taliwala sa ngilngig nga mga kagubot.”4
Kon ang inyong kaugalingong kalibotan mora og nagkaun-ob sa personal o sa tibuok kalibotan nga kahimtang, ang solusyon parehas ra. Ipunting ang hunahuna ngadto ni Jesukristo. Ang kalinaw mosunod.