“Ang Gisaad Kaninyo nga Mesiyas,” Alang sa Kalig-on sa Kabatan-onan, Dis. 2022.
Ang Gisaad Kaninyo nga Mesiyas
Ang mga propeta misaad nga si Jesukristo moanhi aron magdala og hingpit nga kalipay ug paglaom nganha kaninyo.
Families of Bethlehem [Mga Pamilya sa Bethlehem], ni Kelsy ug Jesse Lightweave
Ang Pasko usa ka maanindot kaayo nga panahon sa tuig. Samtang nagsingabot ang panahon sa Pasko, kita nagpaabot sa nindot nga mga suga, masadya nga mga dekorasyon, ug lamian nga mga pagkaon. Ang Pasko usa ka panahon nga puno sa pamilya ug mga higala, mga kanta ug mga istorya, ug pagpanghatag ug pagdawat og mga gasa.
Bisan asa kamo nagpuyo, ang maanindot kaayo ug talagsaon nga mga tradisyon sa Pasko nga inyong gisaulog adunay espesyal nga diwa niini tungod kay ang Pasko usa ka pagsaulog sa usa sa labing malipayon nga mga panghitabo sa tanan nga kasaysayan—ang pagkatawo sa atong Manluluwas, si Jesukristo.
Ang Mensahe sa mga Propeta
Sa dugay nang panahon sa wala pa matawo ang Manluluwas, ang mga propeta mipamatuod nga si Jesukristo mao ang gisaad nga Mesiyas, “ang usa nga dinihogan,” ug nga ang Iyang maulaon nga sakripisyo motubos sa kalibotan gikan sa sala ug kamatayon ug moabli sa pultahan ngadto sa imortalidad ug kinabuhing dayon.
Ang kinabuhi ug misyon ni Jesukristo mao kanunay ang labing mahinungdanon nga mensahe sa mga propeta. Si Abinadi mitudlo: “Wala ba si Moises managna … mahitungod sa pag-anhi sa Mesiyas, ug nga ang Dios motubos sa iyang mga katawhan? Oo, ug gani tanan nga mga propeta kinsa nakapanagna sukad ang kalibotan nagsugod—sila wala ba makapamulong og kapin o kulang mahitungod niini nga mga butang?” (Mosiah 13:33).
Karon, kita naghinumdom uban sa mapasalamaton nga mga kasingkasing sa pagkatawo sa bata nga gipanganak didto sa ubos og kahimtang nga kuwadra, giputos sa mga panapton, ug gipahiluna sa pasongan. Ang Iyang pagkatawo walay kinutoban ang kamakahuloganon tungod sa mga butang nga Iyang masinati ug antoson aron dili lang Niya maluwas ang kalibotan gikan sa sala ug kamatayon apan usab magdala og hingpit nga kalipay ug paglaom nganha kaninyo.
Mga Panagna ug mga Saad
Ang mga kasulatan puno sa maanindot kaayo nga mga panagna mahitungod sa pagkatawo sa Manluluwas ug sa mga saad kon si kinsa Siya ug unsa ang Iyang buhaton para kanatong tanan.
Si Adan gisugo sa paghalad og mga sakripisyo, isip “usa ka pagkasama sa sakripisyo sa Bugtong Anak sa Amahan, nga puno sa grasya ug kamatuoran” (Moises 5:7). Kini nga mga sakripisyo “nagtudlo ngadto niana nga mahinungdanon ug kataposan nga sakripisyo [sa] … Anak sa Dios” (Alma 34:14).
Mga paghulagway pinaagi ni Apryl Stott
Si Isaias nanagna: “Kay alang kanato ang usa ka bata natawo, alang kanato ang usa ka anak nga lalaki gihatag … ug ang iyang ngalan pagatawgon og Kahibulongan, Magtatambag, Dios nga Makagagahum, Amahan nga walay Kataposan, Prinsipe sa Pakigdait” (Isaias 9:6).
Unom ka gatos ka tuig sa wala pa matawo ang Manluluwas si Lehi mitudlo nga ang Dios moandam og “usa ka Mesiyas, o, sa lain nga mga pulong, usa ka Manluluwas sa kalibotan” (1 Nephi 10:4).
Usa ka anghel mipakita kang Nephi og usa ka panan-awon diin siya “mitan-aw ug nakakita sa birhen … [nga] nagkugos og bata diha sa iyang mga bukton.
“Ug ang anghel miingon ngari kanako: Tan-awa ang Kordero sa Dios, oo, gani, ang Anak sa Amahan sa Kahangtoran!” (1 Nephi 11:20–21).
Si Hari Benjamin, 124 ka tuig sawala pa matawo ang Manluluwas, mitudlo mahitungod sa kaimportante sa Iyang misyon dinhi sa yuta:
“Kay tan-awa, ang panahon moabot, ug dili kini layo, nga uban sa gahom, ang Ginoo … manaog gikan sa langit …ug makig-uban taliwala sa mga tawo, magbuhat og kahibulongan nga mga milagro, ingon sama sa pag-ayo sa mga masakiton, pagbuhi sa mga patay, paghimo sa mga bakol nga molakaw, ang mga buta sa pagdawat sa ilang panan-aw, ug ang bungol sa pagkadungog, ug mang-ayo sa tanan nga matang sa sakit” (Mosiah 3:5).
Si Abinadi mipahayag: “Siya mao ang kahayag ug ang kinabuhi sa kalibotan; oo, usa ka kahayag nga walay kataposan, nga dili gayod mahimo nga mongitngit; oo, ug usab usa ka kinabuhi nga walay kataposan, nga wala na ang kamatayon” (Mosiah 16:9).
Usa ka anghel mihimo niini nga saad nagdto ni Maria:“Ikaw … manganak og usa ka batang lalaki ug nganlan mo siyag Jesus.
“Mahimo siyang inila ug tawgon siya nga Anak sa Dios nga Labing Halangdon” (Lucas 1:31–32).
Mga Saad Gituman alang Kaninyo
Sa atong pagsaulog sa pagkatawo ni Jesukristo, ato usab nga gisaulog ang tanang mga propetikanhong mga saad nga gituman ni Jesukristo pinaagi sa Iyang mga patulon-an ug sa Pag-ula.
Ang Manluluwas nagtudlo kanato sa paghigugmaay ug pagbuhat og maayo sa usag usa. Siya mihatag kanato og mga sugo, ug kon kita mosunod niini, kita makabati sa Iyang hingpit nga gugma sa mas hingpit ug makahuloganon nga paagi ug sa umaabot nga adlaw makadawat og kinabuhing dayon. Ang Iyang mga pagtulon-an ug ehemplo mogiya ug molig-on kanato sa paagi nga kita angay nga magpakabuhi.
Dayon si Jesus mihatag sa Iyang maulaon nga sakripisyo. Siya andam nga mipaagas sa Iyang dugo alang sa kapasayloan sa atong mga sala (tan-awa sa Doktrina ug mga Pakigsaad 27:2), nagdalit sa gasa sa paghinulsol ug mga panalangin sa pagpasaylo (tan-awa sa Alma 34:15–17; 42:22–24). Ug pinaagi sa Iyang Pag-ula, Siya mihatag kanato sa gasa sa pagka-imortal. Isip kabahin sa Iyang Pag-ula, si Jesukristo “[nag]-antos sa mga sakit ug mga kasakit ug mga pagtintal sa matag matang” (Alma 7:11). Siya mibuhat niini aron Siya sa personal makabati ug makahibalo sa atong mga tintasyon, atong mga pakigbisog, atong mga pag-antos, ug unsaon sa pagtabang kanato.
Hinumdomi kanunay nga ang Manluluwas andam nga misinati sa tanan niini alang kaninyo tungod kay Siya naghigugma kaninyo. Siya ang inyong Manluluwas. Bisan unsa ang inyong giatubang, Siya anaa aron motabang ug molig-on kaninyo. Pinaagi ni Isaias, ang Manluluwas miingon, “Ayaw kahadlok kay mag-uban ako kanimo: … lig-onon ug tabangan ko ikaw” (Isaias 41:10).
On Earth as It Is in Heaven [Dinhi sa Yuta Maingon sa Langit], ni Justin Kunz
Pangitaa ang Mesiyas
Uban sa karaan ug moderno nga mga propeta, ako nagmaya sa pagpamatuod sa pagkatawo, kinabuhi, kamatayon, ug Pagkabanhaw ni Jesukristo. Siya mao ang gisaad nga Mesiyas ug kanunay sukad pa kaniadto, ug hangtod sa hangtod “ang kahayag, ang kinabuhi, ug ang paglaom sa kalibotan.”1
Uban ni Moroni, ako modapit “[kaninyo] sa pagpangita niini nga Jesus diin ang mga propeta ug mga apostoles misulat, nga ang grasya sa Dios nga Amahan, ug usab ang Ginoong Jesukristo, ug sa Espiritu Santo, nga nagpamatuod kanila, mahimo unta nga mag-uban diha kaninyo sa kahangtoran” (Ether 12:41).
Hinumdoman natong tanan kon unsay nahimo sa atong Manluluwas alang kanato ug mohigugma ug moalagad Kaniya niini nga Pasko ug sa kanunay.