“Usa ka Kinabuhi nga Puno sa Hingpit nga Kalipay,” Alang sa Kalig-on sa mga Kabatan-onan, Dis. 2022.
Usa ka Kinabuhi nga Puno sa Hingpit nga Kalipay
Si Caroline nakahibalo sa iyang katuyoan, ug siya mahinamon kaayo nga tumanon kini.
Mga litrato pinaagi ni Christina Smith
Si Caroline M. gikan sa Tennessee, USA, ganahan nga mopakatap og kalipay. “Ako ganahan kon ang mga tawo malipayon,” siya miingon. “Ang akong katuyoan sa kinabuhi mao ang pagtabang sa mga tawo nga makahibalo kon unsa kadako ang gugma ni Jesus nila. Ang akong katuyoan dinhi sa kalibotan mao ang pagpakatap sa paglaom, kalipay, ug gugma.”
Si Caroline nalingaw nga nagkat-on sa ebanghelyo ni Jesukristo, mosunod sa unsay iyang nakat-onan, ug mopaambit sa ebanghelyo ngadto sa uban. Siya nakahibalo nga ang ebanghelyo magdala og dakong kalipay tungod kay nasinati niya kini sa iyang kaugalingon.
Ang Hingpit nga Kalipay sa Pagkat-on sa Ebanghelyo
Si Caroline nakakaplag og hingpit nga kalipay diha sa ebanghelyo ni Jesukristo tungod kay “kini nagdala og hilabihan nga gugma ngadto sa tanan.” Siya miingon: “Gisunod nako si Jesukristo pinaagi sa pagkamasulondon. Siya mao ang tinubdan sa kalinaw ug kalipay ug gugma—mao kana kon kinsa si Jesukristo ngari kanako. Siya namatay alang kanato ug mibayad alang sa atong mga sala aron nga kita mahimong sama Kaniya.”
Ang seminary mao ang usa ka paagi nga si Caroline nakakat-on sa ebanghelyo, ug kini maayo nga kasinatian alang kaniya. “Ganahan ko sa sayo sa buntag nga seminary. Ako usa ka buntagon nga tawo.” Ang mga estudyante moadto sa iyang balay tungod kay ang iyang mama mao ang magtutudlo sa seminary. “Dili daghan nga tawo ang mga miyembro sa Simbahan diin ako nagpuyo. Apan pipila ka miyembro ang nag-eskwela sa akong hayskul ug moadto sa seminary kauban nako.”
Siya nalingaw sa pagkat-on sa Daang Tugon diha sa seminary karong tuiga. Usa sa iyang paborito nga mga istorya mao ang saysay kabahin sa Paglalang diha sa libro sa Genesis. “Ganahan ko nga mobasa kabahin sa Paglalang tungod kay nagpakita kini nga gilalang ni Jesus kini nga kalibotan alang kanako. Nakapalipay gayod kanako nga maghunahuna nga Siya mihimo niana alang kanako.”
Ang Hingpit nga Kalipay sa Pagsunod sa Ebanghelyo
Ang pagsunod sa ebanghelyo nakahatag usab ni Caroline og hingpit nga kalipay. Siya nahigugma ni Jesukristo ug gusto nga mosunod Kaniya, nga nakatabang niya nga masabtan ang kamahinungdanon sa pagpabunyag. “Nakahibalo ko nga kinahanglan ko nga motuman sa mga sugo sa Dios, nga kinahanglan ko nga mohimo og mga pakigsaad uban Kaniya ug mosunod sa sakto nga dalan.”
Pinaagi sa pagpabunyag, siya nakahibalo nga siya magsunod sa sakto nga dalan—ang dalan nga gipakita ni Jesus kanato. Alang kaniya, ang pagpabunyag “mabati nga nindot kaayo.” Pinaagi sa iyang kagustohan nga mohimo ug motuman sa mga pakigsaad ug sa iyang kagustohan nga moserbisyo sa uban ug magdala kanila og hingpit nga kalipay, siya nagpakita nga gusto niya nga sundon si Jesukristo.
Lain pa nga paagi nga si Caroline nakasinati kanunay og hingpit nga kalipay sa ebanghelyo mao ang pinaagi sa mga kalihokan sa Simbahan. Ganahan sya nga moadto sa mga klase ug mga kalihokan sa Young Women tungod sa kalipay nga iyang nakaplagan didto. “Ang Young Women nakahimo nako nga mopahiyom ug mokatawa.”
Malingaw usab siya nga moadto sa Young Women camp. “Kon ako anaa sa Young Women camp, ang tanan anaa sa akong palibot ug mabati nako ang Espiritu. Nakapahinumdom kini nako sa dihang ako gibunyagan.”
Nasinati usab ni Caroline ang hingpit nga kalipay sa ebanghelyo sa iyang inadlaw-adlaw nga kinabuhi. “Matag higayon nga motugtog ko sa piano o sa guitar, matag higayon nga mohangyo ko sa Dios nga tabangan ang usa ka tawo, bisan kanus-a nga ako nag-inusara, bisan kanus-a nga ako maminaw og makapabayaw nga musika—kana tanan nagpakita kanako nga ang Manluluwas nahigugma kanako tungod kay madungog nako Siya.”
Ang Hingpit nga Kalipay sa Pagpakigbahin sa Ebanghelyo
Dihang si Caroline anaa sa Young Women camp, siya mihatag sa iyang pagpamatuod sa kamatuoran nga siya anak nga babaye sa Dios, nga Siya adunay katuyoan alang kaniya niini nga kinabuhi, ug nga ang iyang katuyoan mao ang pagdala og hingpit nga kalipay ug gugma ngadto sa uban. “Daghan nga tawo ang miingon nako nga ganahan sila sa akong pagpamatuod.”
Usa ka espesyal nga butang kabahin niini nga partikular nga pagpamatuod mao nga ang tanan klaro nga nakadungog niya ug nakasabot unsa ang iyang gisulti. Kini nakapalipay ni Caroline kay dili ingon ana kanunay ang mahitabo. Si Caroline adunay Down syndrome, ug siya miingon nga komon lang sa mga tawo nga maglisod og sabot sa tanan nga isulti sa tawo nga adunay Down syndrome.
Ang Espiritu kusog kaayo samtang siya mihatag sa iyang pagpamatuod, ug pagkahuman daghang tawo ang miingon nga ang pagkadungog sa pagpamatuod ni Caroline usa sa labing sagrado nga mga kasinatian sa ilang kinabuhi. Siya nakahibalo nga ang Espiritu klaro nga mikompirmar sa kamatuoran sa iyang gisulti.
Si Caroline nakakat-on sa iyang kaugalingon nga ang pagserbisyo sa uban magdala og hingpit nga kalipay! Ang Espiritu Santo nakatabang niya nga mobati sa hingpit nga kalipay sa ebanghelyo ug ang hingpit nga kalipay sa pagsunod ni Jesukristo, ug gusto niya nga ang uban makasinati nianang sama nga pagbati. Pinaagi sa pagpakatap og kalipay ug gugma ngadto sa uban, siya nagdala sa Espiritu ngadto sa ilang kinabuhi. Ug pinaagi sa pagpakigbahin sa unsay nagdala niya og hingpit nga kalipay, siya nagdapit kanila nga moduol ngadto ni Kristo.