“Barogan kon Unsa ang Sakto,” Alang sa Kalig-on sa mga Kabatan-onan, Disyembre. 2022.
Ang Tema ug Ako
Kabatan-onan mipakigbahin kon giunsa nila pagsunod ang mga pulong sa mga Tema sa Young Women ug sa Korum sa Aaronic nga Pagkapari
Barogan kon Unsa ang Sakto
“Ako makapangandam sa kalibotan alang sa pagbalik sa Manluluwas”
Usa ka adlaw, usa ka higala ug ako nangaon sa usa ka kan-anan sa dihang among nadungog ang ubang mga tawo sa among duol nga naghisgot bahin sa relihiyon. Usa ka babaye naghisgot nga siya nakahimamat og duha ka lalaki nga nagbisikleta kinsa midalit sa pagpakig-istorya kaniya mahitungod sa Dios. Human makighimamat kanila sa pipila ka semana, iyang gidawat ang ilang imbitasyon nga magpabunyag sa Ang Simbahan ni Jesukristo sa mga Santos sa Ulahing mga Adlaw.
Usa ka higala misugod sa pagsukna kaniya og malisod nga mga pangutana ug miawhag niya sa pag-usab sa iyang hunahuna. Dili siya komportable, miangkon nga wala siya mahibalo sa tanan nga tubag, apan misulti nga gibati niya nga sakto ang pagpabunyag. Siya misulti kanila nga ang iya lang gikinahanglan mao ang ilang suporta.
Ang akong higala ug ako nakamatikod nga nabalaka na siya. Kami wala makabaliwala sa pag-aghat nga motingog.
Sa wala pa kami mibiya, mipaduol kami ug miingon, “Pasayloa mi sa pagsagbat, apan nadungog namo nga nakadesider ka nga magpabunyag! Mga miyembro kami sa Simbahan ug gusto nga masayod ka nga imong gihimo ang labing maayo nga desisyon sa imong kinabuhi. Padayon sa pagbasa ug pag-ampo mahitungod sa Basahon ni Mormon.”
Usa ka tuig ang milabay, naminaw ko sa usa ka leksiyon didto sa Simbahan ug ang magtutudlo mipakigbahin mahitungod sa istorya sa iyang pangasaw-onon. Usa ka adlaw, nag-ampo siya kon angay ba siyang magpabunyag. Sa samang gabii, miadto siya sa usa ka kan-anan kuyog sa pipila ka mga higala. Misugod sila sa paghisgot bahin sa relihiyon ug sa iyang desisyon nga magpabunyag. Ang iyang mga higala misulti kaniya sa paglikay sa mga misyonaryo ug dili magpabunyag.
Nasubo siya sa ilang kakulang og suporta. Dayon dunay duha ka tawo nga miduol kaniya ug miingon nga sila mga miyembro sa Simbahan. Sila midasig kaniya sa pagpabunyag ug pagpadayon sa pagbasa ug pag-ampo. Ang pangasaw-onon sa magtutudlo misulti kaniya nga ang pagduol niadtong duha ka estranghero ug maisogon nga mipakigbahin sa ilang mga pagpamatuod maoy usa ka tubag sa mga pag-ampo.
Ako mapasalamaton kaayo nga ang akong higala ug ako naminaw sa pag-aghat sa pagsulti ug pagbarog kon unsa ang sakto.
Ang tagsulat nagpuyo sa Arizona, USA.