“4 ka Paagi nga si Jesukristo Nagpalig-on Kaninyo,” Alang sa Kalig-on sa mga Kabatan-onan, Ene. 2023.
4 ka Paagi nga si Jesukristo Nagpalig-on Kaninyo
Mahimo ko ang tanang butang pinaagi kang Kristo.
Mga Taga-Filipos 4:13
Sa tibuok kalibotan, ang mga Kristiyano nalipay niini nga kasulatan: “Mahimo ko ang tanang butang pinaagi [kang Kristo] nga nagapalig-on kanako” (Mga Taga-Filipos 4:13).
Sa dihang ang mga tawo nakadungog niini, pipila kanila tingali naghunahuna nga nagpasabot kini nga sila makalingkawas sa bisan unsang pagsulay, makadaog sa bisan unsang dula, ug matinuod ang tanang gipangandoy. Apan dili kana mao ang unsay gitudlo niini nga kasulatan.
Kini gisulat ni Apostol Pablo samtang siya diha sa bilanggoan. Isip usa ka binilanggo, adunay daghan nga si Pablo dili makahimo, apan siya nasayod nga si Jesukristo makapalig-on kaniya sa paghimo kon unsa ang labing importante.
Mao usab kini kanimo!
1 Si Kristo Molig-on Kaninyo aron Mahibalo
Si Jesuskristo naghatag kaninyo og pipila ka importanting mga paagi nga kamo makahibalo kon unsa ang tinuod. Siya nagtudlo kanatong tanan sa pag-ampo kanunay (tan-awa sa 3 Nephi 18:18) ug mangutana aron masayod kon unsa ang tinuod (tan-awa sa Moroni 10:4–5). Kamo makakaplag usab ug masayod unsa ang tinuod pinaagi sa inyong pagtuon sa mga kasulatan.
Ang pag-ampo ug pagtuon sa kasulatan magdala sa Espiritu diha sa inyong kinabuhi. Ang Espiritu mahimong mamulong diha sa “imong hunahuna ug … sa imong kasingkasing” (Doktrina ug mga Pakigsaad 8:2), “mopuno sa imong kalag uban sa hingpit nga kalipay,” ug “mohatag og kahayag sa imong hunahuna” (Doktrina ug mga Pakigsaad 11:13).
Niining mga paagiha, kamo “[ma]minaw Kaniya”—makadungog sa mga pulong sa Manluluwas ug mosunod kon unsa ang Iyang gisulti. Si Presidente Russell M. Nelson nagtudlo nga kini mao “ang sundanan alang sa kalamposan, ug hingpit nga kalipay niini nga kinabuhi.”1
2 Si Kristo Molig-on Kaninyo aron Makahimo
Ang kalig-on moabot kaninyo kon kamo maningkamot sa pagtuman sa mga sugo ug mohimo og maayo nga mga pagpili nga mosangpot sa kalinaw ug kalipay. Si Jesukristo molig-on kaninyo sa pagbuhat niini bisan kon kadtong mga pagpili malisod himoon. Usahay tingali kamo makahimo og dautan nga pagpili. Salamat nalang nga, ang Pag-ula sa Manluluwas nakapahimo sa paghinulsol nga posible. Tungod ni Jesukristo, kamo mahimong limpyo ug makakaplag og hingpit nga kalipay. Siya makapalig-on kaninyo sa “pagbuhat og mas maayo ug mahimong mas maayo”2 sa matag adlaw.
3 Si Kristo Molig-on Kaninyo aron Makabuntog
Samtang diha sa bilanggoan, si Pablo misulat “nakat-onan ko ang pagkatagbaw sa bisan unsay ania kanako.
“Nasinati ko ang pagpuyo diha sa kawad-on ug sa kahamugaway. Nakat-onan ko na ang pag-atubang sa bisan unsang kahimtang sa kinabuhi” (Mga Taga-Filipos 4:11–12).
Sa laing pagkasulti, si Pablo nakat-on nga, pinaagi ni Kristo, siya nakabuntog ug nakakat-on gikan sa iyang mga pagsulay ug mga hagit. Si Jesukristo makapalig-on kaninyo aron sa pagbuhat sa ingon.
Ang Manluluwas miantos sa “mga sakit ug mga kasakit ug mga pagtintal sa matag matang.” Siya midala diha Kaniya sa atong mga kahuyang, “nga siya mahimo nga masayod … unsaon pagtabang [nga nagpasabot sa pagtabang] ang iyang mga katawhan sumala sa ilang mga kahuyang” (Alma 7:11–12). Bisan unsa pa ang inyong gisagubang, si Jesukristo makapalig-on kaninyo aron makalahutay ug makatuman sa mga butang nga dili ninyo mahimo sa inyong kaugalingon.
4 Si Kristo Molig-on Kaninyo aron Mamahimo
Si Jesukristo mihimo sa pagkabanhaw nga usa ka reyalidad alang kanatong tanan, ug Iyang gihimong posible ang kinabuhing dayon alang niadtong kinsa maghinulsol, modawat sa mahinungdanong mga ordinansa, ug mohimo ug motuman sa mga pakigsaad nga kauban niini. Kon wala si Kristo, kita dili makatuman sa unsa ang gusto kaayo sa Langitnong Amahan—alang kanato nga mamahimong mas mahisama Kaniya ug sa Iyang Anak, si Jesukristo, ug aron makapuyo uban Kanila sa kahangtoran.
Kamo mamahimong mas mahisama ni Jesukristo kon kamo magkat-on diha Kaniya, mosandig ug mosalig diha Kaniya, ug mosunod sa Iyang ehemplo. Kini modala kaninyo sa pagpakabuhi inubanan sa dugang nga pagtuo, paglaom, gugma nga putli, pailob, kamapaubsanon, kaputli, ug kamasulundon. Kining tanan mao ang mga hiyas sa Manluluwas.
Samtang kamo maningkamot sa pagsunod ni Jesukristo, Siya mamahimo ninyong paglaom ug inyong kahayag nga mogiya kaninyo nga kamo mamahimo sumala sa tanan niyang nahibaloan nga kamo mahimo. Ug, uban ni Pablo, kamo makahimo sa pag-ingon nga, “Mahimo ko ang tanang butang pinaagi [kang Kristo] nga nagapalig-on kanako.”