“Pagpadayon ngadto sa Mas Malipayon nga mga Adlaw,” Alang sa Kalig-on sa mga Kabatan-onan, Ene. 2023.

Tabang sa Kinabuhi

Pagpadayon ngadto sa Mas Malipayon nga mga Adlaw

Ni Marissa Widdison

Mga Magasin sa Simbahan

Paglaom, tabang, ug pagkaayo anaa ra alang niadtong kinsa nakalahutay sa pag-abuso.

Sa higayon nga mibiyahe ko sakay sa eroplano sa dapit nga puno sa aso gikan sa dakong sunog [wildfire]. Samtang ang eroplano naglupad, migawas kami agi sa abuhon nga gabon ngadto sa tin-aw, hayag nga kalangitan. Akong naamgohan nga ang hayag nga adlaw ug limpyo nga hangin anaa ra gayod, apan ang akong abilidad sa pagtagamtam niini nasalipdan sa usa ka butang nga dili nako makontrolar. Ang dakong sunog dili akong sayop, apan kini nakaapekto kini sa akong kinabuhi.

Ang pag-abuso sama niana. Kadtong kinsa nakasinati og pag-abuso dili gayod basulon, apan sila magsagubang gayod gihapon sa linugdangan. Ang pag-abuso mahimong makapalubog sa atong pagbati sa kaugalingong bili ug makapalisod niini sa pagbati sa gugma sa Dios. Tingali modangat pa kini og dugay alang sa mga nakalahutay nga makalingkawas sa impluwensiya sa mga bakak ni Satanas aron makakonektar og balik sa mahangtoron nga mga kamatuoran. Apan ang paglaom, tabang, ug ang pagkaayo anaa ra sa matag lakang!

Usa ka Istorya

Ang papa ni Stacie¹ abusado. Gisultihan siya sa iyang papa nga siya walay ayo kon siya modako na. Siya mihimo ni Stacie nga mobati nga walay pulos.

Sa dihang mibalhin si Stacie sa layo alang sa kolehiyo, nakahimo siya sa paghunahuna og mas klaro. Misugod siya sa pagsimba og usab ug mibati sa gugma sa Dios alang kaniya ug sa iyang pamilya. Paglabay sa panahon, nakakaplag siya og nagkadako nga kalinaw diha sa ebanghelyo ug sa iyang relasyon uban sa Manluluwas.

Gibanabana nga usa ka bilyon ka mga bata sa tibuok kalibotan ang makasinati og pipila ka matang sa pag-abuso niining tuiga.² Tingali kamo o ang uban nga inyong nailhan nakasinati usab og sama kang Stacie. Ang mosunod nga mga kapanguhaan makatabang.

Kon Ikaw Nakasinati og Pag-abuso

Kon ikaw nasakitan, palihog sultihi ang usa ka tawo kabahin sa unsay nahitabo kanimo. Hibaloi nga ang Dios nagmahal kanimo! Ug ang matarong nga mga sakop sa pamilya, mga higala, ug mga miyembro sa Simbahan diha sa imong kinabuhi nagmahal usab. Sila moalalay kanimo ug motabang kanimo nga makalahutay niini.

Ug palihog hinumdomi, “Ang pag-abuso dili kaniadto, dili karon, ug dili gayod inyong sala. … Dili kamo ang kinahanglang maghinulsol; dili kamo ang responsable.”³

Si Dr. Sheldon Martin, usa ka therapist sa Family Services sa Simbahan, miingon nga makatabang alang sa mga nakalahutay ang pagtutok diha sa mahangturon nga mga kamatuoran sa ilang nangagi, kasamtangan, ug sa umaabot.

Nangagi: “Mas daghang tawo kay sa imong nahibaloan ang nagpakabana kanimo,” miingon si Dr. Martin, nagpasabot nga ikaw una sa tanan usa ka anak sa langitnong mga ginikanan. Ang imong mahangturon nga pamilya molugway lapas pa sa imong yutan-ong mga relasyon. Ug agig dugang ngadto sa kalig-on ug kahupay gikan sa Langitnong Amahan, si Jesukristo, ug ang Espiritu Santo, ikaw adunay mahigugmaong mga katigulangan sa pikas habig sa tabil kinsa napakabana kanimo ug mahimong mangalagad nganha kanimo.
Kasamtangan: “OK ra na nga imong mahalon ang imong kaugalingon,” miingon si Dr. Martin, bisan asa man kamo dapit diha sa proseso sa pagkaayo. Normal ra ang mobati og kasuko, kaguol, o kalibog. Pagmapailubon sa imong kaugalingon.
Umaabot: “Ang mga butang mas moarang-arang,” miingon si Dr. Martin. “Nasayod ko niini tungod kay ako nasayod sa Manluluwas. Siya nagpakabana kanimo.” Buhata kutob sa imong mahimo nga magbilin nga duol ngadto Kaniya. Sa imong pagbuhat sa ingon, makahimo ka sa pagpalayo sa imong kaugalingon gikan sa makadaot nga mga relasyon ug mahimong magkadako ang imong abilidad sa pagbati sa Iyang kalinaw ug gugma.

Kon sa Imong Hunahuna ang usa ka Higala Nagsinati og Pag-abuso

Direktang mangutana kanila, “Aduna bay tawo nga nanakit nimo?”
Paminawa og maayo unsa ang ilang isulti. Ipakita kanila ang pagkamabination ug kalooy.
Sultihi ang usa ka tawo kinsa makatabang, sama sa usa ka magtutudlo, ginikanan, magtatambag sa eskwelahan, o lider sa Simbahan.
Ipadayon ang pagpakighigala nila. Tagda sila sa normal nga paagi. Tabangi sila nga makahimo og ubang himsog nga panaghigalaay.

Padayon sa Unahan

Karon, si Stacie usa na ka malamposon nga propesyonal nga adunay kaugalingon nga mahigugmaong pamilya. Ang uban nga mga panahon lisod gihapon, apan siya mobati nga adunay daghang kalipay ug pagpasaylo sa uban.

“Ako nasayod nga si Jesukristo makaayo sa tanan sa atong mga samad,” miingon si Stacie. Kon adunay usa ka butang nga iyang ikapaambit ngadto sa ubang mga nakalahutay, mao ang pagpabilin nga malaomon.

“Kanunayng adunay paglaom diha ni Kristo,” miingon siya, “bisan diha sa taliwala sa mga pagsulay nga ingon og wala na gayoy kataposan.”

Bisan unsa pa nga mga hagit ang inyong gisagubang, padayon sa unahan. Pun-a ang inyong kinabuhi sa kamaayo ug sa hugot nga pagtuo sa bisan unsang paagi kutob sa inyong mahimo. Ang mas maayong panahon anaa sa unahan kaninyo!