“Atong Saad nga Mahimong usa ka Kahayag,” Alang sa Kalig-on sa mga Kabatan-onan, Ene. 2023.
Dali, Sunod Kanako
Atong Saad nga Mahimong usa ka Kahayag
Si Jesukristo mao ang Kahayag sa Kalibotan. Atong buhaton ang tanan natong mahimo sa pagpaambit sa Iyang kahayag.
Pundok sa mga tawo nga naggikan sa tanang dapit aron sa pagtan-aw sa tawo diha sa kamingawan nga nagsul-ob og sapot nga ginama sa balhibo sa kamelyo ug lukton ug dugos ang kinaon. Sila interesado sa pagpaminaw sa iyang mga pagtulon-an kabahin sa Manluluwas, paghinulsol, ug bunyag. Human makadungog kaniya, daghang mga tawo nga gustong magpabunyag. Siya mibunyag niadtong kinsa naghinulsol. Ang ngalan niini nga tawo mao si Juan Bautista.
Usa ka adlaw, samtang si Juan mibunyag sa mga tawo didto sa Suba sa Jordan, si Jesukristo miabot ug mihangyo nga magpabunyag. Nasurprisa si Juan. Siya nasayod nga si Jesus kanunayng nagtuman sa mga sugo sa Dios ug wala magkinahanglan sa paghinulsol. Sa pagkatinuod, siya nagtudlo nga si Jesus ang angay nga mobunyag kaniya (tan-awa sa Mateo 3:14)! Mipasabot si Jesus nga ang Dios nagsugo sa tanang katawhan sa pagpabunyag, busa Siya usab kinahanglan nga mabunyagan aron sa pagpakita og ehemplo. Miuyon si Juan ug mibunyag ni Jesus didto sa Suba sa Jordan.
Ang bunyag ni Jesus nagtudlo kanato nga kita, usab, kinahanglan bunyagan. Sa dihang kamo gibunyagan, kamo mihimo og pakigsaad ug mipakita sa inyong kaandam sa pagsunod sa ehemplo sa Manluluwas, dili lang sa inyong bunyag kondili sa kanunay.
Mga Saad ug mga Oportunidad
Sa bunyag, kamo mohimo og usa ka pakigsaad uban sa Dios ug mosaad sa pagdala diha sa inyong kaugalingong sa ngalan ni Jesukristo (tan-awa sa Mosiah 5:8–10). Kamo usab mosaad sa pagtuman sa Iyang mga sugo, mobarog isip usa ka saksi sa Dios “sa tanan nga mga panahon, ug sa tanan nga mga butang, ug sa tanan nga mga dapit” (Mosiah 18:9), ug moserbisyo Kaniya (tan-awa sa Mosiah 18:8–10; Doktrina ug mga Pakigsaad 20:37).
Matag semana sa simbahan, kamo mobag-o niining pakigsaad kon kamo moambit sa sakramento (tan-awa sa Doktrina ug mga Pakigsaad 20:77, 79). Kamo dayon “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo” (2 Nephi 31:20).
Sa pagpadayon, kamo makabaton og daghang oportunidad sa pagsunod sa ehemplo sa Manluluwas ug aron ipakita ang inyong gugma alang Kaniya ug alang niadtong anaa sa inyong palibot. Si Elder Jeffrey R. Holland sa Kurom sa Napulog Duha ka Apostoles miingon: “Kita adunay mga silingan nga panalanginan, mga bata nga proteksyonan, kabus nga ibayaw, ug kamatuoran nga panalipdan. Kita adunay mga sayop nga korihian, mga kamatuoran nga ipaambit, ug kaayohan nga buhaton. Sa ato pa, kita adunay kinabuhi sa mapahinungurong pagka-disipulo nga ihatag.”1
Usa ka Kahayag Niadtong Nagkinahanglan
Ang atong hingpit nga ehemplo, ang Manluluwas kanunayng nagmahal ug nagserbisyo sa uban ug “Miadto siya sa tanang dapit ug naghimog mga maayong butang” (Mga Buhat 10:38).
Sa malisod nga mga panahon, si Jesukristo mao ang Kahayag nga “nagdan-ag sa kangitngit” (Juan 1:5). Siya nagtudlo usab kanato aron mamahimong kahayag. Siya nag-ingon, “Tan-awa Ako mao ang kahayag diin kamo mopakita—nga diin kamo nakakita kanako nga mihimo” (3 Nephi 18:24).
Isip kabahin sa inyong pakigsaad sa bunyag, kamo nagsaad nga “andam sa pagtambayayong sa usag usa nga mga alantuson, nga sila mahimo nga magaan” ug “sa pagbangutan uban niadto nga nagbangutan … ug sa paghupay niadto nga nagkinahanglan sa kahupayan” (Mosiah 18:8–9).
Kon kamo makahinagbo og tawo nga gibati og kaguol og nawad-an og kadasig, kini tingali dayag kaayo kon unsaon sa pagtabang. Adunay ubang mga panahon, hinoon, kon kamo dili makahibalo kon unsa ang isulti o buhaton. Nianang mga higayona, inyo gihapong ablihan ang inyong kasingkasing. Kamo makapaminaw ngadto kanila ug mosuporta kanila.
Samtang kamo mohigugma ug moserbisyo sa uban, magkadako ang kahayag sa Manluluwas nga mosanag diha kaninyo ug modan-ag sa dalan diha sa inyong atubangan. Kini makadani usab sa uban kinsa nangita sa kahayag sa Manluluwas. Pinaagi sa pagpadayon sa unahan ug pagtuman sa mga saad nga inyong gihimo atol sa bunyag, kamo makakaplag og daghang mga paagi nga inyong mahimo niining kalibotan nga mas maayo ug mas hayag.