Mga Gasa sa Ebanghelyo diha sa Guam

Ni Jessica Brousseau

Mga Magasin sa Simbahan

Diha sa usa ka isla sa kadagatan, si Franchesca nakakaplag og panaghigalaay ug kahupay pinaagi sa ebanghelyo.

Mga litrato pinaagi ni Cody Bell

Uban sa mga baybayon, kalma nga katubigan, ug karaan nga mga langob niini, ang isla sa Guam daw usa ka pangandoy nga bakasyon, apan kini usa ka normal nga adlaw sa kinabuhi sa 15 anyos nga si Franchesca N.! Ganahan siya sa matahom nga mga baybayon. “Makalingaw nga mogawas ug mosuhid sa kinaiyahan.”

Natawo ug gipadako sa Guam, ganahan siya mobuhat sa mga butang sa gawas. “Usa ako ka tawo nga ganahan sa gawas, maong dili kaayo ko ganahan nga magpabilin sa sulod sa balay,” miingon siya. Ganahan siya mag-paddle board sa lawod, mag-snorkel, ug mag-hike uban sa iyang mga ginikanan ug duha ka igsoong babaye. Ganahan gayod sila mag-hike sa usa ka dapit nga adunay karaan nga mga langob.

“Suod gyod ko sa akong mga igsoong babaye. Sila ang akong suod nga mga higala,” miingon siya. Ang iyang magulang nga babaye nag-eskwela sa Hawaii. “Ang social media importante kaayo sa pagtabang kanamo nga magkaistorya,” mipasabot si Franchesca. Ganahan siya nga magpabiling duol ug konektado.

Usa ka Ehemplo ngadto sa Uban

Si Franchesca anaa sa iyang ikaduhang tuig diha sa usa ka Katoliko nga eskwelahan nga babaye ra tanan, diini siya lamang ang miyembro sa Ang Simbahan ni Jesukristo sa mga Santos sa Ulahing mga Adlaw. Ang pagkahimong bugtong miyembro sa Simbahan diha sa iyang eskwelahan makapataha sa sinugdanan, apan naanad na siya nga makita nga lahi. Dugang pa, ang uban sa iyang palibot naghunahuna nga murag nindot nga kabahin siya sa lahi nga relihiyon.

Sama pananglit, ang iyang mga higala miinom og kape sa paniudto usa ka adlaw, ug si Franchesca nakapasabot sa Pulong sa Kaalam ngadto kanila.

Mipili usab si Franchesca nga dili mamalikas bisan og gibuhat kini sa ubang tawo sa eskwelahan. Miingon siya, “Kadaghan akong natintal kaniadto, apan ang butang nga nagpabilin nako nga lig-on mao ang akong personal nga relasyon sa Langitnong Amahan pinaagi sa pag-ampo.” Midugang siya, “Kinahanglan dili ko mobuhat niini nga mga butang, tungod kay sayop kini ug tungod gihigugma nako ang Langitnong Amahan ug si Jesukristo.”

Pagpangita og mga Higala

Usahay mingaw ang pagkahimong bugtong nga miyembro sa Simbahan diha sa iyang eskwelahan. Sa dihang siya anaa sa iyang unang tuig, mibati gayod nga nag-inusara si Franchesca atol sa pandemya ug wala kaayoy mga higala. Kulbaan siya nga makig-istorya sa iyang mga ginikanan mahitungod niini, apan sa dihang nag-ampo siya, gibati niya nga giaghat sa pagsulti kanila kon unsa ang iyang gibati.

Isip usa ka pamilya, midesisyon sila nga mag-ampo alang kaniya aron makapangita siya og mga higala nga iyang masaligan. Sa milagroso nga paagi, dihadiha dayon paghuman nila sa ilang pag-ampo, nakadungog sila og tuktok sa ilang pultahan. Kini usa diay sa iyang mga higala gikan sa laing ward, ug nagdala siya og mga biskwit! Nasayod si Franchesca nga ang Langitnong Amahan nakadungog sa ilang pag-ampo.

Ang stake ni Franchesca naglakip sa mga miyembro gikan sa Guam ug sa pipila sa ubang mga isla. Ang iyang ward adunay gamay lamang nga grupo sa kabatan-onan, apan ang iyang ward sama sa usa ka pamilya. Suod ang mga miyembro, ug kini nakapadasig kaniya nga mosimba matag Dominggo. Maayo sila nga mga impluwensiya ug mga ehemplo sa iyang kinabuhi.

Nakakaplag usab og kalig-on si Franchesca sa iyang klase sa seminary. “Ang seminary mao ang usa sa mga importanteng kalihokan sa akong semana,” miingon siya. “Kon motambong ko sa seminary, daw mawala ang akong tanang kabalaka.”

Ganahan siya nga motambong sa seminary, bisan kon online o sa personal, ug dili gayod mapakyas sa pagtambong og klase gawas kon gikinahanglan gayod niya. Miingon siya nga mas maayo gayod ang dagan sa iyang mga semana tungod mipili siya nga motambong og seminary. Kon aduna siyay makapaugtas nga semana, segurohon niya nga moadto sa seminary tungod kay mobati siya og kalinaw didto.

Ang kabatan-onan usab adunay mga kalihokan mga duha hangtod sa tulo ka higayon sa usa ka bulan. Giplano gani ni Franchesca ang usa niini—usa ka gabii sa pagdula nga adunay daghang makalingaw nga mga board game ug usa ka dula sa kasulatan. Wala kaayo sila magkita atol sa pandemya, maong kon magkita sila, aduna gayod silay nindot kaayo nga panahon.

Ang batan-ong mga babaye mihimo gani og music video sa ilang kaugalingon nga nag-lip-sync sa awit sa kabatan-onan sa Simbahan nga “Good Day” ug gi-post kini aron sa pagpaambit og gugma ug sa pagbayaw sa uban. “Ang social media makapahiusa gayod sa tanan, ilabi na atol sa mga panahon kon dili gayod nato makita ang tanan.”

Naglantaw sa Umaabot nga Templo

Niadtong Oktubre 2018 nga kinatibuk-ang komperensiya, gipahibalo ang Yigo Guam Temple. Miingon si Franchesca, “Mahinamon kaayo ang kabatan-onan—kaming tanan nag-ampo alang niini.” Human niana, madasigon siyang nagtan-aw sa konstruksiyon ug nagpaabot alang sa ilang kaugalingon gayod nga templo, nga nakompleto niadtong Mayo 2022.

Kanunay nilang gikinahanglan nga molakbay ngadto sa Pilipinas alang sa mga pagbiyahe sa templo kaniadto. Aron makabayad sa mga pagbiyahe, magtigom sila og kwarta pinaagi sa pagbaligya og mga gi-bake ug paghugas og mga sakyanan. Tungod kay dako kini nga pagbiyahe, planohon nila kini nga molungtad og mga usa ka semana. Mahinamon si Franchesca nga mas makanunayong makaadto sa templo ug makabaton sa mga panalangin nga naggikan sa pagkahimong mabunyagan alang sa iyang mga katigulangan.

Kahupayan pinaagi sa Pag-ampo

Miingon si Franchesca nga sagad siyang mabalaka pag-ayo, apan ang pag-ampo nakatabang kaniya. “Ang pag-ampo gamhanan gayod. Ang pagpakig-istorya sa Langitnong Amahan makapahupay gayod kanako. Maminaw Siya ug makatabang.”

“Kon mag-ampo ako, dili kanunayng sayon ug dali nga moabot ang tubag,” miingon siya. “Kini pagbati lang sa giya nga makatabang kanako; kana nga pagbati sa Iyang presensiya ug sa Iyang gugma. Kini makapahupay kanako ug makapaarang-arang gayod sa akong gibati.”

Ang iyang tambag ngadto sa ubang kabat-onan mao ang: “Pag-ampo ngadto sa Langitnong Amahan. Pakig-istorya Kaniya. Kana dako kaayo og ikatabang.”

Miingon siya nga mabalak-on usab ang iyang mama apan dako usab nga suporta. “Ang akong inahan usa ka panalangin gikan sa Langitnong Amahan, ug migiya gayod siya kanako.”

“Ang pamilya usa ka dako nga panalangin,” miingon siya. “Nagtuo ko nga ang pagpakig-istorya sa inyong pamilya o sa usa ka higala kon makasinati kamo og grabeng pagsulay importante.”

Gusto ni Franchesca nga makakita ang tanan sa mga panalangin sa Ginoo sa matag adlaw. “Mahimong yano lang gayod ang inadlaw nga mga panalangin. Ang pag-eskwela usa ka dako nga panalangin. Adunay daghan kaayong nindot nga mga milagro kon kita mogahin og panahon sa pag-ila niini. Mapasalamaton kaayo ko nga anaa ang ebanghelyo sa akong kinabuhi.”