“Usahay bation nako nga ang akong mga ginikanan sobra ra ka kritikal kanako. Unsaon nako nga makatubag sa matinahoron nga paagi?,” Alang sa Kalig-on sa mga Kabatan-onan, Ene. 2023.
Mga Pangutana ug Mga Tubag
“Usahay bation nako nga ang akong mga ginikanan sobra ra ka kritikal kanako. Unsaon nako nga makatubag sa matinahoron nga paagi?”
Paggahin og Panahon nga Magkauban
Ang inyong mga ginikanan motanyag og tambag ug pagkorihir tungod kay sila nahigugma kaninyo ug gustong motabang kaninyo nga magmalamposon. Kon kana nga pagkorihir mabati nga dili makiangayon, paggahin og panahon sa paghisgot niini sa tinagsa-tagsa uban sa inyong mga ginikanan sa panahon nga kamong duha kalma. Makapangita kamo og panahon kon kamong duha nagbuhat og butang nga ganahan ninyong buhaton og dungan, sama sa pagluto o pag-ehersisyo. Kini makatabang sa pagdapit sa Espiritu ngadto sa panag-istoryahanay.
Rebekah M., 17, Maryland, USA
Hinumdomi nga Sila Nahigugma Kaninyo
Kon inyong hinumdoman nga ang inyong mga ginikanan mokorihir kaninyo ug motambag kaninyo tungod kay sila nahigugma kaninyo, mas sayon ra gayod nga modawat sa ilang pagkorihir. Ang pagsulti og dali nga mubong pag-ampo aron mohangyo sa Espiritu nga motabang kaninyo nga magpabiling matinahoron ug mapainubsanon makatabang kaninyo nga mas maayong makig-istorya kanila.
Lauren M., 16, Texas, USA
Ang Pagkamatinuoron Makaayo
Ang maayo, matinuoron nga panag-istoryahanay makasulbad sa tanang matang sa panagbingkil. Lingkod uban sa inyong mga ginikanan ug pakig-istorya kanila. Sultihi sila kon unsay makapasakit kaninyo, ug paminaw kon unsay makapaguol o makapasagmuyo kanila. Paggahin og dugang nga panahon nga magkauban, ug pag-ugmad og gugma ug kalinaw diha sa inyong relasyon ug sa panimalay. Kon kamo nasuko, hangyoa ang Langitnong Amahan sa pagkalma sa inyong kasingkasing.
Rafaella P., 17, São Paulo, Brazil
Sultihi Sila nga Kamo Nahigugma Kanila
Makatubag kamo sa matinahorong paagi, bisan kon lisod kini. Sultihi ang inyong mga ginikanan nga kamo nahigugma kanila, nga kamo nagpakabana kanila, ug nga kamo nasayod nga sila nahigugma kaninyo. Pahibaloa sila nga unsay ilang gisulti nakapasakit sa inyong emosyonal, espiritwal, ug kahimtang sa pangisip. Makanunayong pag-ampo. Ang Langitnong Amahan motabang gayod kaninyo.
Wellie S., 13, Luanda, Angola
Nakakita Sila sa Inyong Potensiyal
Ang Dios naglaom sa labing maayo kanato ug makakita sa atong tinuod nga potensiyal. Mao kini ngano nga Siya nagkinahanglan gayod og daghan kanato. Ang inyong mga ginikanan nakakita usab sa inyong potensiyal ug gusto sa labing maayo alang kaninyo ug nga kamo magmalamposon! Sila tingali dili hingpit sa pagdasig sa inyong pag-uswag, ug kamo dili hingpit sa pagkab-ot niini. Pagbaton og matinuoron, mahigugmaon nga panag-istoryahanay uban sa inyong mga ginikanan, ug ang Espiritu mogiya kaninyo aron makakaplag og pagsabot.
Brooke T., 18, Arizona, USA
Magmapainubsanon nga Tigpaminaw
Bag-ohay lang misulay ko nga mahimong mas maayo nga tigpaminaw. Naningkamot ko nga hilom nga maminaw sa unsay isulti sa akong mga ginikanan imbes nga makiglalis o singkahan sila. Magkinahanglan kini og dakong pailob ug kamapainubsanon, apan ang pagbuhat niini makapalig-on sa inyong relasyon sa inyong mga ginikanan ug magtugot og dugang nga pagsabot sa duha ka habig.
Kami K., 18, Utah, USA