“Sunda ang Tinuod nga Kahayag,” Alang sa Kalig-on sa mga Kabatan-onan, Ene. 2023.
Dali, Sunod Kanako
Sunda ang Tinuod nga Kahayag
Ang kahayag ni Jesukristo kanunayng anaa alang kaninyo—kagahapon, karon, ug sa kahangtoran.
Consider the Lilies [Palandonga ang mga Lirio], ni Haley Miller
Samtang misalop ang adlaw sa laing Dominggo niadtong 1948, nakaplagan nako ang akong kaugalingon nga naglakaw duol sa Suba sa Trent sa Nottingham, England. Usa ako ka 20 anyos nga misyonaryo nianang higayona. Kadto usa ka taas, mabudlay nga adlaw, apan malipayon ko ug natagbaw diha sa buhat.
Samtang naglakaw ko subay sa suba, nag-ampo ko sa akong kasingkasing. Naglaom nga makabati og gamyang giya gikan sa Ginoo, nangutana ko, “Nagbuhat ba ko sa unsay Imong gusto?”
Usa ka makabuntog nga pagbati sa kalinaw ug pagsabot ang kalit nga miabot kanako. Niana gayod nga higayon, nahibaloan nako nga si Jesukristo nakaila kanako ug nahigugma kanako. Wala ako makakita og panan-awon o makadungog og tingog, apan dili unta ako mas gamhanang makahibalo sa reyalidad ug pagkabalaan ni Kristo kay sa kon Siya mibarog sa akong atubangan ug mitawag sa akong ngalan.
Gikan nianang adlawa hangtod karon, ang matag mahinungdanon nga desisyon nga akong gihimo naimpluwensiyahan sa akong kahibalo nga si Jesukristo mao ang Anak sa Dios. Mas lawom ug gamhanan nako Siyang gimahal kay sa unsay mapahayag sa mga pulong. Siya ang akong Ginoo, akong Manluluwas, akong Manunubos, ug akong higala.
Latas sa katuigan ug halos sa tibuok kalibotan, ako mipamatuod sa Manluluwas. Nasayod ako nga Siya ang tinuod ug ang walay kataposang Kahayag nga “nagdan-ag diha sa kangitngit” (Juan 1:5). Usa ka pribilehiyo alang kanato ang pagduol ngadto Kaniya, ang pagsunod Kaniya, ug ang pagbati sa Iyang kahayag sa atong mga kinabuhi.
Ang Kamatuoran mahitungod sa Kahayag
Matag 24 oras, ang adlaw mahimong gabii ug ang gabii mahimong adlaw. Kon atong masinati ang kangitngit sa kagabhion, dili kita mabalaka nga nawala ang adlaw. Nasayod kita nga ang kalibotan motuyok ug ang adlaw mosanag kanato pag-usab. Tingali kita dili kanunayng makakita og makabati sa kahayag, apan kini kanunayng anaa diha.
Tinuod usab kana sa espirituhanong paagi. Napahinumdoman ko niini daghang tuig ang milabay sa dihang ang akong asawa, si Barbara, ug ako nahingangha nga mitutok sa langit sa kagabhion. Ang minilyon ka bitoon nga among nakita daw walay sama ang kahayag ug katahom. Naghunahuna dayon ko uban sa katingala mahitungod ni Jesukristo.
Siya anaa “sa sinugdan … uban sa Dios” (Juan 1:2). Ubos sa direksiyon sa Langitnong Amahan, Siya milalang sa yuta ug sa mga kalibotan nga dili maihap (tan-awa sa Moises 1:33). Siya mao ang gahom nga nagpahayag sa adlaw, sa bulan, ug sa mga bituon (tan-awa sa Doktrina ug mga Pakigsaad 88:7–10). Siya mao ang tinubdan sa kahayag ug kinabuhi sa tanang butang (tan-awa sa Juan 1:3–4; Doktrina ug mga Pakigsaad 93:10). Siya mipahayag, “Ako mao ang kahayag sa kalibotan. Ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi” (Juan 8:12).
Sa atong panahon, naningkamot gayod og maayo si Satanas sa pagsalipod sa kahayag sa Manluluwas. Apan dili gayod kamo mahimong maanaa sa usa ka dapit nga ngitngit kaayo nga ang kahayag ni Jesukristo dili makadan-ag kaninyo kon kamo moduol ngadto Kaniya. Ang Iyang kahayag anaa kanunay.
Mga paghulagway pinaagi ni Adam Nickel
Siya Nagdan-ag sa Atong Dalan
Isip ang Anak sa Dios, si Jesukristo adunay himaya uban sa Dios nga Amahan “sa wala pa buhata ang kalibotan” (Juan 17:5). Hingpit Siyang masulundon sa Iyang Amahan (tan-awa sa Juan 5:30) ug kinaugalingon nga mianhi sa kalibotan. Iyang gibiyaan ang Iyang himaya aron matawo diha sa usa ka mapaubsaon nga kwadra diin ang Iyang inahan “[m]iputos niya ang bata sa panapton ug gipahiluna sa usa ka pasongan” (Lucas 2:7).
Atol sa Iyang kabatan-on, Siya miadto “sa balay sa [Iyang] Amahan” (Lucas 2:49) ug nakapatingala niadtong kinsa nakadungog sa Iyang mga pagtulon-an. Sa Iyang pangalagad, Siya adunay gahom sa paghimo og mga milagro, sa pagpanalangin ug pag-ayo sa masakiton, sa pagpabuhi sa patay, ug sa kataposan sa paghatag sa walay kinutoban nga Pag-ula.
Sa tanang gisulti ug gibuhat sa Manluluwas, ilabi na sa Iyang maulaong sakripisyo, Siya mipakita kanato sa dalan paingon ngadto sa atong Amahan sa Langit. Ang Iyang ehemplo ug mga pagtulon-an nagdan-ag sa agianan nga kinahanglan natong sundon aron makabalik ngadto sa atong langitnong panimalay.
Ipaambit ang Iyang Kahayag
Sa dihang mabati nato ang kahayag sa Anak sa Dios sa atong mga kinabuhi, kinahanglang maningkamot kita sa pagpaambit niana nga kahayag ngadto sa uban. Gimahal ko ang akong pagkamisyonaryo didto sa England. Gimahal ko ang akong pagkapresidente sa misyon didto sa Canada. Ug gimahal ko ang akong kasamtangang calling isip usa ka sakop sa Korum sa Napulog Duha ka Apostoles, nga nagtugot kanako sa pagpamatuod kang Jesukristo sa tibuok kalibotan.
Ang Manluluwas mitudlo, “Tan-awa Ako mao ang kahayag diin kamo mopakita—nga diin kamo nakakita kanako nga mihimo” (3 Nephi 18:24).
Ang kahayag sa Manluluwas modan-ag sa sulod kanato sa matag higayon nga kita mag-ampo ug magtinguha sa Iyang pulong diha sa mga kasulatan. Ang Iyang kahayag modan-ag kon kita mohigugma sama sa Iyang paghigugma, mopaambit sa atong mga pagpamatuod, ug mohatag og dili hinakog nga pagserbisyo. Kini mosalikway sa kangitngit sa atong kinabuhi ug modani sa uban kinsa nagtinguha sa Iyang kahayag.
Ang Iyang Kahayag Molahutay Hangtod sa Kahangtoran
Ang kahayag ni Jesukristo kanunayng anaa alang kaninyo. Walay butang—walay butang gayod—ang makabuntog o makapalong sa Iyang kahayag. Molahutay kini hangtod sa kahangtoran. Si Jesukristo “mao ang kahayag ug ang kinabuhi sa kalibotan; … usa ka kahayag nga walay kataposan, nga dili gayod mahimo nga mongitngit” (Mosiah 16:9).
Mahangtoron akong mapasalamaton alang sa kasinatian nga aduna ako isip usa ka batan-ong misyonaryo sa dihang nahibaloan nako kini alang sa akong kaugalingon. Mas segurado akong nasayod niini karon tungod kay nasinati nako ang kinabuhi uban sa tanang kalisod ug kalipay niini.
Kon kamo wala makahibalo kon asa mopaingon o kon unsa ang buhaton, lantaw ngadto sa tinuod nga kahayag sa Anak sa Dios. Kon kamo andam nga moduol ngadto Kaniya ug mosunod sa Iyang kahayag, Siya modan-ag sa inyong dalan.