“Hugot nga Patuo diha sa Kalisdanan,” Alang sa Kalig-on sa mga Kabatan-onan, Ene. 2023.
Hugot nga Pagtuo diha sa Kalisdanan
Ania ang pipila ka mga sugyot nga nakatabang nako sa mga pangutana ug mga pagduha-duha.
Litrato gikan sa Getty Images
Sa dihang gamay pa ko nga bata, ang akong pamilya kasagaran mobisita sa Great Basin National Park sa Nevada, USA. Usa ka talagsaong butang diha sa parke mao ang Lehman Caves.
Usa ka tour guide mangulo kaninyo didto sa lawom nga langob ug, sa usa ka piho nga dapit, gipalong ang tanang suga. Inyong masinati ang hingpit nga kangitngit. Usa kadto ka bug-at nga pagbati, ug ang paghunahuna sa pagpangita sa inyong agianan paggawas sa langob nga walay bisan unsa nga suga makapaluya. Salamat nalang, ang giya kanunayng mopasiga og balik sa suga ug mogiya kaninyo sa paggawas nga luwas.
Usahay kita mag-atubang og mga pangutana ug gani mga pagduha-duha kabahin sa Simbahan ug sa atong mga pagpamatuod. Kini mahimong makapabug-at sa pagbati ug kawalay kasigurohan, sama nga mahimutang diha sa ngitngit nga langob.
OK lang ang magbaton og mga pangutan ug mga kabalaka. Ang butang nga makahimo og labing dako nga kalainan mao kon unsaon ninyo kini sa pagsulbad.
Ania ang pipila ka mga sugyot nga nakatabang nako.
Pagpakita og Hugot nga Pagtuo
Akong nasuta nga kon akong sulbaron ang mga pangutana ug mga kabalaka gikan sa posisyon sa hugot nga pagtuo, ako kanunayng makapangita og usa ka paagi nga makapadayon. “Ang hugot nga pagtuo dili ang pagbaton sa hingpit nga kasayuran sa mga butang” (Alma 32:21). Ug “bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo” (Alma 32:27).
Ang kalibotan mosulti kaninyo nga kon kamo dili makapamatuod og usa ka butang pinaagi sa siyentipikong sumbanan, kini dili mahimong tinuod. Dili kana ang paagi sa Ginoo. Sama sa gisulti sa Manluluwas kang Tomas, kinsa dili motuo gawas nga siya mismo makabati sa mga samad sa Manluluwas, “Tuo ug ayaw na pagduhaduha” (Juan 20:27).
Pangayo, Pangita, Panuktok
Ang mga pulong nga “pangayo, pangita, panuktok” mao ang gibalik-balik diha sa mga kasulatan (tan-awa sa Mateo 7:7; Doktrina ug mga Pakigsaad 88:63). Ang paagi sa Ginoo sa pagtabang kanato sa atong mga pangutana mao nga kita mangutana Kaniya.
“Apan kon diha kaninyo may nakulangan ug kaalam, papangayoa siya sa Dios” (Santiago 1:5). Diretsoha pag-adto ang tinubdan sa tanang kamatuoran. Ang Dios nahigugma kaninyo ug motabang kaninyo.
Magmahimong usa ka Tigpangita sa Kamatuoran
Akong nasuta nga kadtong kinsa matinuoron ug mapainubsanon nga nagpangita sa kamatuoran kasagaran makakaplag og mga tubag sa ilang mga pangutana sa kataposan. Sa laing bahin, kadtong kinsa nagpangita lang og sayop magpadayon lang sa pag-anam og kalayo gikan sa kamatuoran.
Magmahimong usa ka tigpangita sa kamatuoran. Ang kamatuoran anaa, ug kamo makakaplag niini.
Paghimo og usa ka “Mahimong Tubagon sa Kaulahian” nga Kahon
Busa unsa ang inyong buhaton kon kamo mapainubsanon ug sinsero nga nangita og mga tubag ug kini ingon og dili moabot?
Usab, ako mopili sa pagsulbad niini gamit ang hugot nga pagtuo. Naghimo ko og gamay nga kahon diha sa tipiganan sa akong hunahuna—sama sa usa ka matahom nga kaban sa bahandi. Nahisulat niini mao ang mga pulong “Mahimong Tubagon sa Kaulahian nga Petsa.”
Sa higayon nga ako adunay pangutana o kabalaka nga dili nako maresolba, akoa kining isulat diha sa usa ka piraso nga papel sa emahinasyon, ayohon kini sa pagpilo, ug ibutang kini diha sa kahon. Dayon ako kining ibutang og balik sa tipiganan.
Sa pagbuhat sa ingon, ako milihok diha sa hugot nga pagtuo nga usa ka adlaw ang Ginoo motubag niini. Tingali Siya motubag, tingali Siya dili motubag. Kana sumala na Kaniya sa Iyang walay kinutuban nga kaalam.
Lain pa diay, ang uban sa akong mga pangutana aduna nay tubag. Apan daghan pa gihapon ang anaa sa kahon. Ug ako OK ra niana.
Minahal kong mga higala diha ni Kristo, magmahimong tigpangita sa kamatuoran.
Samtang ang inyong hugot nga pagtuo magkadako, ang Ginoo magauban kaninyo. Ug samtang kamo moduol Kaniya diha sa hugot nga pagtuo, Iyang ibutyag diha kaninyo ang mga butang nga inyong gikinahanglan nga masayran sa hustong panahon.