“Natukod sa Lig-on nga Yuta,” Alang sa Kalig-on sa mga Kabatan-onan, Ene. 2023.
Lig-on nga mga Pundasyon
Natukod sa Lig-on nga Yuta
Paghulagway pinaagi ni Emily Jones
Nagtan-aw ko, nga naglibog, samtang gibuboan og tubig sa akong pamilya ug nako ang semento nga pundasyon sa among balay. Mibati ko nga binuang gayod kini. Kinsa bay nakadungog sukad sa pagbubo og tubig sa usa ka balay? Sa dihang mibalhin kami sa Texas, USA, ang among silingan mipasabot nga nianang piho nga dapit gikinihanglan namong buboan og tubig ang pundasyon sa among balay aron ang panahon dili makapahinabo nga molubog ang balay ug magliki-liki. Maong gibuboan nako og tubig ang balay, bisan og mibati ako nga binuang ang pagbuhat niini.
Ang pagbubo nakatabang sulod sa mubong panahon, apan sa kataposan, miliki na og sugod ang among balay. Sa wala madugay among nadiskobrehan nga ang among balay wala matukod sa lig-on nga yuta. Natukod kini sa usa ka dapit nga tinambakan, nga maoy nakaingon nga milubog ang among balay samtang nalata ang gilubong nga basura sa ilawom sa paglabay sa panahon. Gibuboan namo ang pundasyon, apan moliki gihapon ang among balay. Maong sa kataposan mibalhin kami.
Kini nga kasinatian nagpahinumdom kanako sa importansiya sa pagtukod sa akong espirituhanon nga pundasyon diha sa lig-on nga yuta sa ebanghelyo ni Jesukristo. Dihay mga higayon nga wala ako mibati og igong kalig-on sa kombiksiyon mahitungod sa ebanghelyo. Pinaagi sa pagpili nga motuo, akong “gibuboan ang pundasyon” sa akong hugot nga pagtuo hangtod nga ako makaugmad og pagpamatuod diha sa lig-on nga yuta sa ebanghelyo. Samtang gipili nako nga mosunod sa ebanghelyo ni Jesukristo, nakatukod ako og lig-on nga pundasyon nga dili moliki.
Ann J., Maryland, USA