Lig-on nga mga Pundasyon

Pagkaplag og Kalipay sa Musikanhon nga Pagserbisyo

Paghulagway pinaagi ni Emily Jones

Nagsugod ko sa pagkuha og mga leksiyon sa piano sa dihang siyete anyos ako. Sa sinugdanan, lisod ang pagbasa sa mga nota sa musika ug maminaw atol sa akong mga leksiyon. Dili lang gayod ako ganahan nga magbansay sa piano.

Dayon ang akong mama mihangyo kanako sa pagtugtog sa “Kon Ako Bunyagan” (Songbook sa mga Bata, 53) sa akong bunyag. Mao kadto ang unang higayon nga nakatugtog ko sukad diha sa simbahan. Gikulbaan ako apan mapasigarbohon sa akong kaugalingon sa dihang nabuhat nako kini.

Sa wala madugay nabisi ko sa pag-eskwela ug gustong moundang sa pag-piano apan ang akong mga ginikanan miawhag kanako sa pagpadayon sa pagkat-on. Miingon sila nga kon magpadayon ko sa pagtugtog, makakaplag ako og kalipay diha sa pagserbisyo sa Ginoo.

Sukad niadto, gimahal nako ang pagtugtog sa piano. Nagsugod ko sa pagtugtog sa panagtigom alang sa sakramento, ug sa dihang nag-12 anyos ko, opisyal akong gitawag nga mahimong piyanista sa ward. Nalipay kaayo ko! Mitugtog ako sa mga pasundayag sa Primary ug miduyog sa choir sa among ward atol sa mga komperensiya ug mga debosyonal sa ward. Gitawag gani ko isip piyanista sa choir sa stake ug mitugtog atol sa komperensiya sa stake.

Mapasalamaton ko sa akong mga ginikanan sa pag-awhag kanako sa pagbuhat sa akong labing maayo. Mahangtoron akong mapasalamaton sa Langitnong Amahan alang sa talento nga Iyang gihatag kanako. Nasayod ako nga akong magamit ang akong mga talento sa akong misyon ug sa ubang pagserbisyo ugma damlag. Tinud-anay akong nakakaplag og kalipay sa pagserbisyo sa Ginoo.

Jyle S., National Capital Region, Philippines