“Mas Sama ni Kristo,” Alang sa Kalig-on sa mga Kabatan-onan, Ene 2023.
Mas Sama ni Kristo
Usa ka bahin sa programa sa Kabataan ug Kabatan-onan mao ang pagpaningkamot nga mahimong mas sama ni Kristo pinaagi sa paglambo sa espiritwal, sosyal, pisikal, ug intelektwal nga paagi (tan-awa sa Lucas 2:52). Motuo kamo o dili, ang pagpaningkamot sa mga tumong dili kinahanglang sama ka lisod kay sa inyong gihunahuna. Susiha kon sa unsang paagi ang kabatan-onan sa tibuok kalibotan naglambo nga mahimong mas sama ni Kristo!
Espirituhanon
Ngalan: Catalina
Lokasyon: Chile
Tumong: Mobasa sa mga kasulatan ug mag-ampo kada adlaw
“Naningkamot akong magpabiling duol sa Espiritu pinaagi sa pag-ampo. Mag-ampo ako matag gabii sa dili pa matulog ug dayon magbasa sa akong mga kasulatan. Naningkamot gayod ko nga mas makasabot niini. Kon magbasa ug mag-ampo ako matag adlaw, mobati ako og kalinaw ug mas duol ngadto sa Dios.”
Sosyal
Ngalan: Raisa
Lokasyon: Samoa
Tumong: Mas ila-ilahon ang batan-ong mga babaye diha sa iyang klase
“Tingali nakaila ko sa ngalan sa matag batan-ong babaye sa akong ward, apan wala ko makaila kon kinsa gayod sila o kon unsa ang ilang ganahan. Maong nagsugod ko tagsa-tagsa sa matag batan-ong babaye, ug alang sa usa ka maulawon [introvert] sama nako, nalingaw ko nga nakahibalo og daghan kaayong butang nga komon kanamo. Sa paggahin nako og dugang panahon sa pag-ila-ila kanila, mas nakita nako kining matahom nga batan-ong mga babaye sa paagi nga ang Langitnong Amahan nakakita kanila.”
Pisikal
Ngalan: Eugene
Lokasyon: Kenya
Tumong: Molambo sa football (soccer)
“Nagsugod ko sa pagbansay uban sa usa ka grupo sa mga higala sa miaging bulan. Ang kasinatian nakatabang nako nga makasabot nga dili ganahan ang Dios nga buhaton nato kini nga mag-inusara. Mahimong paapilon nato ang atong mga higala sa atong mga tumong nga mahimong sama sa Manluluwas. Siya nasayod nga gikinahanglan nato ang usag usa aron molampos. Kon mag-ampo kita, magbutang Siya og mga tawo sa atong kinabuhi nga motabang kanato nga mahimo nga atong labing maayo.”
Intelektwal
Ngalan: Jackson
Lokasyon: South Carolina, USA
Tumong: Taas og tagal: Makapanag-iya ugma damlag og trak sa pagpamaligya og pagkaon; mubo og tagal: Magkat-on mahitungod sa pagluto og pagkaon
“Gisultihan nako ang usa sa akong mga lider sa Young Men mahitungod sa usa nako ka tumong nga makabaton og trak sa pagpamaligya og pagkaon. Miingon siya, ‘Matag tuig magpahigayon ko og parti sa pagbalik og eskwela. Unsa kaha kon magluto ka uban kanamo?’ Busa akong gihimo. Nakaluto ko og 50 ka hot dog ug mga burger sulod sa 45 minutos. Ganahan ko nga ikauban ang mga lalaki sa akong korum, ug nakakuha ko og nindot nga feedback gikan sa kasinatian ug pipila ka pasidungog. Ug daghan ko og nakat-onan.”