“Ang Kataposang Milagro,” Alang sa Kalig-on sa mga Kabatan-onan, Ene. 2023.
Dali, Sunod Kanako
Ang Kataposang Milagro
Adunay usa ka milagro nga mas importante kay sa niining tanan.
Sa Dios, ang tanang butang posible (tan-awa sa Lucas 1:37; Mga Taga-Filipos 4:13). Apan makaampo ba gayod kamo og bisan unsang butang ug mahimo kining matinuod? Nganong ang pipila ka mga tawo makasinati og mga milagro samtang ang uban ingon og wala? Ug unsa man gayod ang gipasabot niining tanan alang kaninyo?
Ang tulo ka karaang mga milagro, tulo ka milagro sa modernong panahon, ug usa ka kataposang milagro nagtudlo kanato og gamay pa.
1
Karaan nga Milagro
Mga paghulagway pinaagi ni Camila Gray
Si Maria tingali mas nasurprisa og gamay sa dihang ang anghel nga si Gabriel misulti niya nga siya mahimong inahan sa Manluluwas. Dili gayod unta kini posible. Apan si anghel Gabriel mipasabot nga si Jesus mahimong Anak sa Dios ug miingon, “Kay alang sa Dios walay dili mahimo” (Lucas 1:37). Ug husto ang anghel. Si Maria mihimugso gayod sa Manluluwas sa kalibotan.
Milagro sa Modernong Panahon
Duha ka mga misyonaryo nagserbisyo didto sa Mexico milabang sa bisi nga kadalanan matag adlaw. Usahay maghulat sila og 10 minutos sa dili pa sila makahigayon sa paglabang, ug sila kasagaran kinahanglan nga modagan! Dayon ilang nahimamat ang tigulang kaayo, hilabihan ka hinay dili aktibo nga miyembro. Gusto siyang mosimba uban kanila, apan—ania ang imposible nga bahin—siya kinahanglan nga molabang sa bisi nga kadalanan. Ug dili, ang mga misyonaryo dili makaaswat kaniya sa paglabang (bisan og sila naghunahuna gayod bahin niini!). Apan dayon sila nakabaton og usa ka milagro. “Sa dihang kami miabot sa karsada,” ang usa sa mga misyonaryo miingon, “walay sakyanan nga nagsingabot. Makahimo kita sa paglakaw nga hinay kaayo ug luwas nga makalabang.”
Imposible? Hunahunaa Pag-usab!
Sa Dios, ang tanang butang posible (bisan ang imposible nga mga butang!).
2
Karaan nga Milagro
Adunay usa ka tawo nga “paralitiko,” o paralisado. Mituo siya nga ang Manluluwas makaayo kaniya. Apan si Jesus nalibotan sa daghan kaayong tawo, ug lisod ang pag-adto Kaniya. Busa unsay gibuhat sa tawo? Ang iyang mga higala mitonton sa iyang gihigdaan agi sa atop sa balay aron makaabot sa Manluluwas. Dili, kana dili gayod tingali sayon. Apan siya ug ang iyang mga higala kinahanglan gayod nga makabaton og dakong hugot nga pagtuo. Ug maayo ang resulta niini—si Jesus mipasaylo sa mga sala sa tawo ug miayo kaniya (tan-awa sa Lucas 5:17–26).
Milagro sa Modernong Panahon
Si Ella W. nagdula uban sa iyang mga higala diha sa parke sa dihang ang pipila sa iyang mga higala nawad-an sa ilang binuhi nga chameleon. Tingali dili kini ingon niana ka dako nga problema. Apan hinumdomi, ang mga chameleon mag-usab-usab og kolor aron mosagol sa ilang mga palibot. Human sa taud-taud nga pagpangita, si Ella mihukom nga panahon na aron mag-ampo ubanan sa hugot nga pagtuo. Sa wala madugay nakit-an nila ang chameleon diha sa usa ka punoan sa kahoy! “Sa higayon nga kini diha na sa mga bukton sa tawo, militok kami og pag-ampo sa pasalamat ngadto sa Langitnong Amahan,” miingon si Ella.
Ang Milagro Moabot pinaagi sa Hugot nga Pagtuo diha ni Jesukristo
Ang imposible kanunayng posible ngadto sa Dios. Apan kita kinahanglan magbaton og hugot nga pagtuo diha sa Manluluwas (o bisan usa ka tinguha nga motuo!) ug sa pagbuhat diha niana nga hugot nga pagtuo aron mahitabo ang mga milagro.
3
Karaan nga Milagro
Sila si Elisabeth ug Zacharias naminyo sulod sa daghang katuigan apan wala makabaton og mga anak. Usahay, tingali ang pagbati niini sama ra nga ang ilang mga matinud-anong mga pag-ampo wala gitubag. Ug sa kataposan, sila natigulang og maayo una pa nakabaton og mga anak. Apan unya ang usa ka anghel mipakita ngadto ni Zacarias ug misulti kaniya nga si Elisabeth makabaton og anak. (Lingaw nga kamatuoran: ang bata nahimong si Juan Bautista!) Sa kataposan, ang imposible nahimong posible. Apan sila si Elisabeth ug Zacarias kinahanglan pa magpaabot og hilabihan ka taas nga panahon (tan-awa sa Lucas 1).
Milagro sa Modernong Panahon
Si Lindsey M. nag-antos gikan sa patol [epilepsy]. “Matag buntag, mohangyo ko sa akong Langitnong Amahan nga mawagtang na ang pag-atake sa patol,” miingon si Lindsey. Apan wala kini mawagtang. Samtang nagpaabot si Lindsey nga maayo, nakadawat siya og panalangin sa pagkapari, nga nakahatag kaniya og kalinaw. Ug kana nga kalinaw mao ang usa ka milagro mismo. “Kon kita modangop sa atong Langitnong Amahan, Siya sa walay pagduhaduha anaa alang kanato, nagpakatap og mga milagro ug nagtanyag og kahupayan,” miingon siya. Si Lindsey sa kadugayan nakadawat og pag-opera nga nakatabang sa iyang mga pag-atake sa patol.
Mga Milagro Moabot Sumala sa Kabubut-on sa Dios
Ang Dios makahimo sa tanang butang. Kamo mahimong makabaton og talagsaong hugot nga pagtuo. Apan ang mga milagro moabot sumala sa tukmang panahon ug kabubut-on sa Langitnong Amahan ug sa Iyang pamaagi. Pangita og laing mga milagro sa pagpadayon, sama sa kalinaw ug kalig-on sa paglahutay.
Ang Kataposang Milagro
Kita naghisgot og daghan kabahin sa mga milagro. Apan adunay usa ka milagro nga mas dako ug mas importante kay sa niining tanan. Kana nga milagro nahitabo sa dihang ang Anak sa Dios mianhi sa yuta isip usa ka bata, sa kadugayan nagtudlo ug miayo, ug dayon mihatag sa Iyang kaugalingong kinabuhi. Gidala ni Jesukristo diha sa Iyang kaugalingon ang atong mga sala, mga kasub-anan, ug mga kahuyang. Ang iyang milagro naglakip sa tulo ka adlaw diha sa lubnganan ug dayon ang pagkabanhaw nga nagpahitabo sa kinabuhi human sa kamatayon alang kanatong tanan. Kana nga milagro nakapausab sa tanang butang.
Sayon ra nga maungot diha sa pagpaningkamot sa pagbaton og hugot nga pagtuo diha sa usa ka piho nga milagro. Ug kana mahimong lisod kon kita wala masayod sa kabubut-on sa Langitnong Amahan. Busa imbis motutok sa inyong hugot nga pagtuo diha sa milagro nga inyong gusto, itutok kini diha sa milagro sa Pag-ula sa Manluluwas. Pagbaton og hugot nga pagtuo nga walay imposible alang sa Dios, lakip sa unsay imong gipangamuyo. Apan pagbaton usab og hugot nga pagtuo nga ang Iyang kabubut-on mao ang mas maayo kay sa inyoha. Kon ang inyong mga pag-ampo natubag sa paagi nga inyong gilaoman, Siya molig-on kaninyo ug motabang kaninyo nga makalahutay.
Ang Labing Mahinungdanong Pahinumdom
Samtang inyong itutok ang inyong hugot nga pagtuo diha ni Jesukristo, masabtan ninyo kon unsa ang gipasabot niini nga ang tanang butang posible sa Dios. Kamo motuo nga ang Langitnong Amahan makatubag sa inyong mga pag-ampo, ug kamo makasalig sa Iyang kabubut-on ug modawat sa Iyang kalinaw kon ang mga butang mahitabo nga wala mahisubay sumala sa plano. Busa ibutang ang inyong hugot nga pagtuo diha ni Jesukristo. Siya mao ang milagro. Ug ang tanang butang posible diha Kaniya.