Direkta sa Punto

Kinsa ang mga Mago?

Ang mga kasulatan nagsulti kanato nga “dihay mga mago gikan sa Sidlakan” (Mateo 2:1) nga nagtinguha sa Manluluwas. Ang termino nga mago naggikan sa usa ka Persian nga pulong nga, magi. Bisan og wala kita gisultihan kon kinsa gayod kining mga tawhana, adunay pipila ka butang nga atong maingon nga atong nahibaloan mahitungod kanila gikan sa unsay gisulti kanato.

Ang mga tawo kasagarang naghunahuna nga adunay tulo ka Mago tungod kay nagdala sila og tulo ka gasa. Apan kini dili klaro gikan sa kasulatan kon pila gayod kabuok ang mga Mago. Nasabtan usab nato nga sila mibisita ni Jesus isip usa ka gamayng bata kay sa isip usa ka masuso (tan-awa sa Mateo 2:11).

Klaro nga matarong ang mga Mago ug nakahibalo og pipila ka panagna mahitungod sa pagkatawo sa Mesiyas. Tingali gikan sila sa usa ka sanga sa katawhan sa Ginoo. Makugihon silang nagtinguha sa Anak sa Dios ug nagiyahan ngadto Kaniya pinaagi sa Espiritu. Gidad-an nila Siya og mga gasa ug dayon mipauli aron sa pagpamatuod sa Iyang pagkatawo ngadto sa ilang katawhan. Gipasidan-an usab sila diha sa usa ka damgo nga dili sultihan si Herod kon hain nahimutang ang bata.

Ang ilang kamatinud-anon ug kakugi mahimong usa ka makapadasig nga ehemplo kanato sa atong personal nga mga panaw nga mas magpaduol ngadto sa Manluluwas.