“4 Na Sala Eso E Vaqaqacotaki Iko kina o Jisu Karisito,” Me iSakisaki ni iTabagone, Janu. 2023.
4 Na Sala E Vaqaqacotaki Iko kina o Jisu Karisito
Au sa rawata na ka kecega ena vuku i Karisito.
Filipai 4:13
Era rekitaka na lotu Vakarisito e vuravura taucoko ena ivolanikalou oqo: “Au sa rawata na ka kecega ena vukui Karisito o koya sa vakaukauwataki au” (Filipai 4:13).
Ni ra rogoca oqo na tamata, eso vei ira era na nanuma ni kena ibalebale ni rawa ni ra rawata na veitarogi, qaqa ena qito cava ga, ka vakayacori na veika era diva tu. Ia oqori e sega ni ka e vakavulica tiko na ivolanikalou oqo.
E a volai mai vua na iApositolo o Paula ni a curu tiko e vale ni veivesu. Me vaka e dua na kaivesu, e levu na ka e a sega ni rawa ni cakava o Paula, ia e kila o koya ni rawa ni vaqaqacotaki koya o Jisu Karisito me cakava na veika e bibi cake.
Sa dina vakakina me baleti iko!
1 Sa Vaqaqacotaki Iko o Karisito mo Kila
Sa solia vei iko o Jisu Karisito e vica na sala bibi mo rawa ni kila kina na veika e dina. Sa vakavulici keda kece o Koya me da dau masu tikoga (raica na 3 Nifai 18:18) ka kerea meda kila na veika e dina (raica na Moronai 10:4–5). E rawa talega ni o kunea ka kila na veika e dina ena nomu vulica na ivolanikalou.
Na masu kei na vuli ivolanikalou e kauta mai na Yalo ki na nomu bula. Ena rawa ni vosa na Yalo “ki na nomu vakasama kei na … vu ni yalomu” (Vunau kei na Veiyalayalati 8:2), “vakasinaita na yalomu ena reki,” ka “vakararamataka na nomu vakasama” (Vunau kei na Veiyalayalati 11:13).
Ena vei sala oqo, sa rawa mo “rogoci Koya”—rogoca na vosa ni iVakabula ka muria na veika sa tukuna o Koya. E vakatavulica o Peresitedi Russell M. Nelson ni oqo “na ivakarau ni rawa-ka, marau, kei na reki ena bula oqo.”1
2 E Vaqaqacotaki Iko o Karisito mo Cakava
Ena yaco mai vei iko na kaukauwa ni o segata mo maroroya na ivakaro ka vakayaco digidigi vinaka ka na veimuataki ki na vakacegu kei na marau. E vaqaqacotaki iko o Jisu Karisito mo cakava oqo ena gauna mada ga e dredre kina vei iko mo cakava na vei digidigi oqori. Ena so na gauna o na cakava beka e dua na digidigi cala. Eda vakavinavinaka, ni Veisorovaki ni iVakabula sa rawa kina na veivutuni. Ena vuku i Jisu Karisito, sa rawa mo savasava ka kunea na reki. E rawa ni vaqaqacotaki iko o Koya mo “caka vinaka ka mo vinaka cake”2 ena veisiga yadua.
3 E Vakaukauwataki Iko o Karisito mo Vorata
Ni tiko e vale ni veivesu, a vola o Paula: “Niu sa vakatavulici meu vakacegu tiko, ena ka kecega sa yaco vei au.
“Au sa kila na vakadravudravuataki, kau sa kila talega na vakavutuniyautaki: ena veiyasana kei na ka kecega kau sa vakatavulici kina” (Filipai 4:11–12).
Ena dua tale na kena itukutukuni, a vulica o Paula ni, ena vukui Karisito, sa rawa vua me ulabaleta ka vuli mai na nona vakatovolei kei na veibolebole eso. E rawa ni vaqaqacotaki iko o Jisu Karisito mo vakayacora vakakina.
A sotava na iVakabula “na mosi kei na veivakararawataki kei na veivakatovolei kecega.” A taura vei Koya na noda malumalumu me rawa ni “kila kina ko koya … na sala [me vukei] ira kina na nona tamata me vaka na nodra malumalumu” (Alama 7:11–12). Se cava ga na ka o sotava, e rawa ni vaqaqacotaki iko o Jisu Karisito mo vosota ka rawata na veika o na sega ni cakava rawa vakai iko.
4 E Vaqaqacotaki Iko o Karisito Mo Yaco Mo Vakataka
Ko Jisu Karisito sa mai tucaketale ka meda na tucaketale kece talega, ka sa vakarautaka o Koya na bula tawamudu vei ira era veivutuni, ciqoma na cakacaka vakalotu e gadrevi, ka cakava ka maroroya na veiyalayalati era salavata kaya. Ke sega o Karisito, eda na sega ni rawa ni cakava rawa na veika e vinakata vakalevu duadua na Tamada Vakalomalagi vei keda—meda vakataki Koya vakalevu cake kei na Luvena, o Jisu Karisito, ka bula vata kei Rau me tawamudu.
Sa rawa mo vakataki Jisu Karisito vakalevu cake ni o vuli vei Koya, vakararavi ka nuitaki Koya, ka muria na Nona ivakaraitaki. Oqo ena muataki iko mo bula ena vakabauta, inuinui, loloma uasivi, na vosota, yalomalumalumu, savasava, kei na talairawarawa e levu cake. Oqo era itovo kece ni bula ni iVakabula.
Ni ko sasaga mo muri Jisu Karisito, o Koya ena nomu inuinui kei na nomu rarama ka na tuberi iko mo yacova na veika kece e kila o Koya ni o rawa ni yaco mo vakataka. Ka, na rawa, ni o kaya vata kei Paula, “Au sa rawata na ka kecega ena vukui Karisito o koya sa vakaukauwataki au.”