“Noda Yalayala Meda Dua na Rarama,” Me iSakisaki ni iTabagone, Janu. 2023.
Lako Mai, Mo Muri Au
Noda Yalayala Meda Dua na Rarama
Sai Jisu Karisito na Rarama kei Vuravura. Meda cakava na ka kece eda rawata meda wasea na Nona rarama.
Era lewevuqa na tamata mai na veiyasana era lako mai me raica na tamata ena lekutu ka daramaka tu na isulu vuti ni kameli ka kena kakana na vodre kei na oni. Era taleitaka me ra rogoca na nona ivakavuvuli me baleta na iVakabula, na veivutuni, kei na papitaiso. Ni oti na nodra rogoci koya, e vuqa na tamata era sa vinakata mera papitaiso. A papitaisotaki ira era sa veivutuni. Na yaca ni turaga oqo ko Joni na Dauveipapitaisotaki.
Dua na siga, ni sa papitaisotaki ira tiko na tamata o Joni ena Uciwai na Joritani, a lako mai o Jisu Karisito ka kerea me papitaiso. A kurabuitaka o Joni. E kila tu o Joni ni sa dau talairawarawa o Jisu ki na ivakaro ni Kalou ka sega ni gadrevi me veivutuni. Na ka dina, e nanuma o koya ni dodonu me papitaisotaki koya o Jisu (raica na Maciu 3:14)! E vakamacalataka o Jisu ni vakarota na Kalou vei ira na tamata kecega me ra papitaiso, ka o Koya talega e gadrevi me papitaisotaki me biuta kina e dua na ivakaraitaki. A vakadonuya ka papitaisotaki Jisu o Joni ena Uciwai na Joritani.
Na papitaiso i Jisu e vakavulica vei keda, ni o keda talega, e dodonu me da papitaisotaki. Ena gauna o a papitaiso kina, o a cakava e dua na veiyalayalati ka vakaraitaka na nomu lomasoli mo muria na ivakaraitaki ni iVakabula, sega walega ena gauna ni nomu papitaiso ia ena veigauna kecega.
Yalayala kei na Madigi
Ena papitaiso, o a cakava e dua na veiyalayalati kei na Kalou ka yalataka mo taura vei iko na yaca i Jisu Karisito (raica na Mosaia 5:8–10). O yalataka talega mo muria na Nona ivakaro, ka mo dou tu ka vakadinadinataka na Kalou “ena veigauna kecega, ena veika kecega, kei na veivanua kecega” (Mosaia 18:9), ka qaravi Koya (raica na Mosaia 18:8–10; Vunau kei na Veiyalayalati 20:37).
Ena veimacawa ena lotu, o dau vakavouya na veiyalayalati oqo ena gauna o vakayagataka kina na sakaramede (raica na Vunau kei na Veiyalayalati 20:77, 79). Mo dou qai “toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega” (2 Nifai 31:20).
Ena ilakolako oqo, ena yaco mai e vuqa na madigi mo muria kina na ivakaraitaki ni iVakabula ka vakaraitaka na nomu lomani Koya kei ira era tu wavoliti iko. E kaya o Elder Jeffrey R. Holland ena Kuoramu ni iApositolo Le Tinikarua: “Ia era tu na wekada mera vakalougatataki, gonelalai mera taqomaki, dravudravua mera vukei, kei na dina me taqomaki. Era tu eso na cala meda vakadodonutaka, dina me wasei, kei na vinaka me vakayacori. Me vakalekalekataki, e tiko vei keda e dua na bula ni yalodina vakatisaipeli me da solia.”1
Meda Dua na Rarama vei Ira Na Vakaleqai Tu
Na noda ivakaraitaki uasivi duadua, na iVakabula sa dau lomani ira ka qaravi ira tu ga na tani ka “lako voli ka daucaka vinaka” (Cakacaka 10:38).
Ena veigauna dredre, o Jisu Karisito na Rarama sa “cilava na butobuto” (Joni 1:5). Sa vakavulici keda talega o Koya meda dua na rarama. E tukuna, “Raica sa i au ga na rarama mo dou dulaka cake—me vaka dou sa raica niu kitaka” (3 Nifai 18:24).
Me tiki ni nomu veiyalayalati ni papitaiso, o yalataka mo “lomasoli mo dou colata vata na nomudoui colacola me mamada kina” ka “rarawa vata kei ira sa rarawa … ka vakacegui ira era sa gadreva na veivakacegui” (Mosaia 18:8–9).
Ni ko sota kei na dua e vakila tiko na rarawa se yalolailai, ena rairai matata beka na sala mo veivuke kina. Ia , e dau tiko eso tale na gauna, o dau sega ni kila na ka mo tukuna se cakava. Ena veigauna vaka o ya, e rawa ni o dolava tikoga na yalomu. E rawa ni o rogoci ira ka tokoni ira.
Ni ko lomani ira ka qaravi ira na tamata, ena ramase cake na rarama ni iVakabula e lomamu ka na vakararamataka na sala e matamu. Ena dreti ira talega mai na tani era vakasaqara tiko na rarama ni iVakabula. Ena nomu toso ki liu ka maroroya na yalayala o vakayacora ena papitaiso, o na kunea e vuqa na sala o rawa ni cakava kina na vuravura oqo me vinaka ka rarama cake kina.