“Me Vakataki Karisito Vakalevu Cake,” Me iSakisaki ni iTabagone, Janu. 2023.
Me Vakataki Karisito Vakalevu Cake
E dua na tiki ni parokaramu ni Gonelalai kei na iTabagone sai koya me da segata me da vakataki Karisito vakalevu cake ena tubu vakayalo, vakaveimaliwai, vakayago, kei na vakasama (raica na Luke 2:52). O vakadinata se sega, na cakacakataki ni takete e sega ni gadrevi me dredre sara me vaka o nanuma. Vulica na sala era sa tubu cake tiko kina na itabagone e vuravura raraba mera vakataki Karisito vakalevu cake!
Vakayalo
Yacana: Catalina
Vanua: Chile
Takete: Wilika na ivolanikalou ka masu e veisiga
“Au dau tovolea meu voleka tikoga vua na Yalo ena masu. Au dau masu e veibogi ni bera niu moce ka qai wilika na noqu ivolanikalou. Au sa cakacaka tiko vakaukauwa meu kilai ira vakavinaka cake. Niu dau wiliwili ka masu ena veisiga yadua, au vakila na vakacegu ka voleka vua na Kalou.”
Veimaliwai
Yacana: Raisa
Vanua: Samoa
Takete: Me kilai ira vakavinaka cake na goneyalewa ena nona kalasi
“Au na kila beka na yacadra kece na goneyalewa ena noqu tabanalevu, ia au sega ni kila se o cei o ira se na veika era taleitaka. Au sa mani tekivu kei ira na goneyalewa yadua, ia me vaka niu dau mamadua, au marautaka na noqu kunea e levu na ka keimami tautauvata kina. Na levu ga ni gauna au solia meu kilai ira kina, na levu ni noqu raici ira na goneyalewa totoka oqo ena ivakarau e raici ira kina na Tamada Vakalomalagi.”
Veika vakayago
Yacana: Eugene
Vanua: Kenya
Takete: Vakavinakataka cake noqu qitora na veicaqe polo (soka)
“Au a tekivu vakatovotovo vata kei na dua na timi itokani ena vula sa oti. Na veika au sotava e sa vukei au meu kila ni sega ni vinakata na Kalou me da cakava duadua na ka oqo. E rawa ni ra duavata kei keda na noda itokani ena noda takete me da vaka na iVakabula. E kila o Koya ni da veigadrevi vakaikeda me da rawa-ka kina. Kevaka eda masu, ena solia mai o Koya eso na tamata ki na noda bula mera vukei keda me da vinaka sara.”
Vaka vakasama
Yacana: Jackson
Vanua: Ceva kei Carolina, Amerika
Takete: Qai caka-malua: Dua noqu lori ni volitaki kakana ena dua na siga; Me caka-oqo: Vulica me baleta na caka kakana
“Au a tukuna vua e dua na noqu iliuliu ni Cauravou me baleta e dua na lalawa me dua na noqu lori ni volitaki kakana. A kaya, ‘Ena veiyabaki au dau cakava e dua na vakatakakana baleta na lesu ki vuli. Vaka cava mo mai vakasaqa vei keimami?’ Au mani cakava vakakina. Au a cakava e rauta ni 50 na bani vakasoseti katakata kei na bani vakasoso ena loma ni 45 na miniti. Au taleitaka na noqu tiko vata kei ira na tagane mai na noqu kuoramu, au a ciqoma eso na itukutuku talei mai na veika au sotava kei na so na veivakacaucautaki. Kau vulica e levu sara na ka.”