“Noqu Vanua … Taleitaki ni Vakanananu Vakatitobu” Me iSakisaki ni iTabagone, Janu. 2023.
Noqu Vanua …
Taleitaki ni Vakanananu Vakatitobu
E tiko beka e dua na vanua taleitaki o dau taleitaka mo vakanananu kina vakatitobu?
Ni ko vakanananu vakatitobu, o na rawata e dua na rai tawamudu. Ena rawa talega ni vukei iko mo vakatorocaketaka na bula ni nomu vakasama ena nomu vagalalataka mai kina na veilecayaki kei na lomaocaoca ka dau yaco mai ena veitemaki kei na veivagolei tani ni bula ena veisiga. Eso na tamata e tiko e dua na vanua digitaki era dau via vakanananu kina vakatitobu. Raica eso na vanua ni vakanananu vakatitobu era wasea na itabagone tale eso!
Vakanananu Vakatitobu: Na vakanananu vakatitobu sai koya na nomu dolava na nomu vakasama kei na yalomu ki na veivakauqeti ni Yalo Tabu ni ko vulica ka vakasamataka tiko na kosipeli. Na vakanananu vakatitobu dina, ka rawa ni yaco ena dua ga na vanua, e gadrevi kina mo cakacaka vakaukauwa vakayalo ni o vakasaqara na ivakatakila.
E dela ni Wai
Na vanua au dau taleitaka meu vakanananu kina vakatitobu sai koya e dela ni wai cava ga, me vaka ena dua na drano se wasawasa. Ena itaba oqo au a tiko ena waqa nei tukaqu. Au taleitaka meu tiko e kea baleta niu vakila niu voleka vua na Yalo, vakabibi ena cadra se dromu ni matanisiga. Au dau ciqoma na veivakauqeti kei na veivakasama vivinaka e kea.
Macey M., 16, Texas, Amerika
Kunea na Gauna Taudua
Na vanua vinaka duadua meu vakanananu kina vakatitobu sai koya na gauna au tiko taudua kina. Au dau vakanananu vakatitobu e veigauna, e valenisili se ena dua na vanua vakanomodi me vaka e vale ena gauna ni noqu vuli ivolanikalou. Au dau vodo basikeli, kau dau vakarorogo ena so na gauna ki na dua na kakaburaki ni Lako Mai, Mo Muri Au. Au dau solia noqu gauna taudua meu dabe maliwai ira na veika bula totoka ka vakanananu vakatitobu talega e kea.
Grant R., 14, Texas, Amerika