Yavu Tudei Eso

Kune Reki ena Veiqaravi ena Sereivakatagi

Droini mai vei Emily Jones

Au a tekivu tauri lesoni ni taba piano niu se qai yabaki vitu. Taumada, a dredre meu wilika na ivakatagi se vakarorogo matua ena gauna ni noqu lesoni. Au a sega ni dau via vakatovotovotaka na taba piano.

A qai kerei au o tinaqu meu vakatagitaka na “Vaqara Drodrolagi Ni Bula Vesu No” (iVolanisere ni Gonelalai, 53) ena noqu papitaiso. Oqori na imatai ni gauna meu taba piano kina ena lotu. Au a tavaiyaya ia au a cibitaki au niu cakava vakakina.

Sega ni dede au sa osooso ena veikavakavuli ka vinakata meu vakasuka mai na vuli taba piano, ia rau a vakayaloqaqataki au na noqu itubutubu meu vuli tiko ga. Erau kaya ni kevaka au na taba piano tikoga, au na rawa ni kunea na reki ena noqu qarava na Turaga.

Mai na gauna oya, au sa dau taleitaka na taba piano. Au a tekivu taba piano ena soqoni ni sakaramede, niu yabaki 12, au a kacivi meu dautabapiano ni tabanalevu. Au a marau dina! Au a taba piano ena nodra vakaitavi na Lalai ka vakatarataka na matasere ni noqu tabanalevu ena koniferedi ni tabanalevu kei na lotu eso. Au a kacivi talega meu dautabapiano ni matasere ni iteki ka taba piano ena koniferedi ni iteki.

Au vakavinavinaka vei rau na noqu itubutubu ni rau vakayaloqaqataki au meu solia na noqu vinaka kece. Au na dau vakavinavinaka tu ga vua na Tamada Vakalomalagi ena vuku ni taledi sa solia mai vei au ko Koya. Au kila niu na rawa ni vakayagataka na noqu taledi ena noqu kaulotu kei na veiqaravi tale eso ena dua na siga. Au kunea dina na reki ena noqu qarava na Turaga.

Jyle S., National Capital Region, Yatu Filipaini