“Ko cei ko iratou na tamata vuku?,” Me iSakisaki ni iTabagone, Janu. 2023.
Ki Utona
Ko cei ko iratou na Tamata Vuku?
E tukuna vei keda na ivolanikalou ni o iratou na “tamata vuku eratou a [lako mai] na tui cake (Maciu 2:1) me ratou vakasaqara na iVakabula. Na vosa na tamata vuku e tauri mai na dua na vosa vaka-Perisia, na daucakamana. E dina ni sega ni tukuni vakadodonu vei keda se o cei o iratou na turaga oqo, e vica na ka eda rawa ni kaya ni da kila me baleti iratou mai na veika era tukuni vei keda.
Era nanuma dei tu na tamata ni ratou a lewe tolu na Tamata Vuku baleta ni ratou a kauta mai e tolu na iloloma. Ia e sega ni matata mai na ivolanikalou se lewe vica sara mada na Tamata Vuku e tukuni tiko kina. Eda kila talega ni ratou a sikovi Jisu ni se gone ka sega ni se qai sucu vou (raica na Maciu 2:11).
Eratou a yalododonu dina na Tamata Vuku ka kila eso na parofisai me baleta na sucu ni Mesaia. E rairai eratou vu mai na dua na kawa ni nodra tamata na Turaga. Eratou a vakasaqara vagumatua na Luve ni Kalou ka tuberi vei Koya mai vua na Yalo. Eratou a kauta mai Vua na iloloma ka lesu tale me vakadinadinataka na Nona sucu kivei ira na nodratou tamata. Eratou a vakasalataki talega ena tadra me ratou kakua ni tukuna vei Eroti na vanua e tiko kina na gone.
Na nodratou yalodina kei na gugumatua sa rawa me dua na ivakaraitaki veivakauqeti kivei keda ena noda dui ilakolako yadua me da toro voleka yani vua na iVakabula.