“Muria na Rarama Dina,” Me iSakisaki ni iTabagone, Janu. 2023.
Lako Mai, Mo Muri Au
Muria na Rarama Dina
Na rarama i Jisu Karisito e dau tu ga me baleti iko—e nanoa, nikua, ka tawamudu.
Vakasamataka na Lili, mai vei Haley Miller
Ni dromu na matanisiga ena dua tale na Sigatabu ena 1948, au kunei au niu a taubale tiko e yasa ni uciwai na Trent e Nottingham, Igiladi. Au a dua na daukaulotu yabaki 20 ena gauna oya. Sa dua dina na siga balavu, ka veivakaocai, ia au a marau ka yalovakacegu ena cakacaka oqo.
Niu taubale tiko e yasa ni uciwai, au a cavuta e dua na masu e yaloqu. Ena noqu nuitaka meu vakila eso na veidusimaki mai vua na Turaga, au a taroga, “Au sa cakava tiko beka na ka Ko ni vinakata?”
A curumi au vakasauri e dua na yalo ni vakacegu kei na kilaka. Ena gauna sara ga oya, au mai kila kina ni o Jisu Karisito e kilai au ka lomani au. E dina niu a sega ni raica e dua na raivotu se rogoca e dua na domo, ia a rawa vei au meu kila na dina kei na ituvaki vakalou i Karisito ka tautauvata ga ke a tu e mataqu o Koya ka kaciva na yacaqu.
Mai na siga oya ki na siga nikua, sa vakauqeti na veivakatulewa bibi kece au sa cakava ena noqu kila ni o Jisu Karisito na Luve ni Kalou. Au lomani Koya vakatitobu ka kaukauwa cake mai na vosa e rawa ni cavuti. O Koya na noqu Turaga, na noqu iVakabula, noqu Dauveivueti, ka noqu itokani.
Ena veiyabaki sa oti au sa dau vakadinadinataka na iVakabula, ena vuqa na veiyasai vuravura. Au kila ni sai Koya na Rarama dina ka tawamudu ka sa “cilava na butobuto” (Joni 1:5). Sa ka dokai vei keda meda lako mai Vua, ka muri Koya, ka vakila na Nona rarama ena noda bula.
Na Dina me baleta na Rarama
Ena veiya 24 na auwa, e vuki na siga me bogi kei na bogi me siga. Ni da sotava na butobuto ni bogi, eda sega ni leqataka ni sa yali na matanisiga. Eda kila ni na cowiri tiko na vuravura ka na cilavi keda tale na matanisiga. Eda na sega beka ni rawa ni raica se vakila na rarama, ia ena dau tu ga e yasada.
Sa dina vakakina vakayalo. A vakananumi vei au ena vuqa na yabaki sa oti, ena neirau dagova cake kei Barbara, na watiqu, na lomalagi ena bogi ena qoroqoro. E vaka mera ramase sara ka rairai totoka na milioni na veikalokalo keirau raica. Sa qai vuki na noqu vakanananu ena qoroqoro vei Jisu Karisito.
Sa “tiko vata ko Koya oqo kei na Kalou mai na ivakatekivu” (Joni 1:2). Ena veidusimaki nei Tamada Vakalomalagi, a bulia kina ko Koya na noda vuravura kei na vuqa na vuravura e sega ni wili rawa (raica na Mosese 1:33). O Koya na kaukauwa ka vakararamataka na matanisiga, na vula, kei na veikalokalo (raica na Vunau kei na Veiyalayalati 88:7–10). O Koya na ivurevure ni rarama kei na bula ki na veika kecega (raica na Joni 1:3–4; Vunau kei na Veiyalayalati 93:10). A kaya o Koya, “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula” (Joni 8:12).
Ena noda gauna, sa cakacaka tiko ena nona igu o Setani me tabonaka na rarama ni iVakabula. Ia e sega ni rawa ni o tiko ena dua na vanua e rui butobuto sara me na sega ni rawa ni cila yani kina vei iko na rarama i Jisu Karisito kevaka o lako mai Vua. Na Nona rarama sa dau tiko voli ga e yasada.
Droini mai vei Adam Nickel
O Koya E Vakararamataka na Noda Sala
Me vaka ni Luve ni Kalou, o Jisu Karisito e a vakarokorokotaki vata kei na Kalou na Tamada “ni sa sega ni caka ko vuravura” (Joni 17:5). A talairawarawa vakavinaka sara Vua na Tamana (raica na Joni 5:30) ka tadu mai ki vuravura ena lomasoli. E a biuta tu yani na Nona lagilagi me mai sucu ena dua na vale ni manumanu beci ka “viviraka vua” o Tinana “nai sulu ni gone, ka vakadavora ena nodra tikina na manumanu” (Luke 2:7).
Ena gauna ni Nona itabagone, a lako voli “me baleta na cakacaka nei Tamana” (Luke 2:49) ka vakurabuitaki ira era rogoca na Nona ivakavuvuli. Ena Nona cakacaka vakalotu, a tu Vua na kaukauwa me vakayacora na cakamana, me vakalougatataki ira ka vakabulai ira na tauvimate, me vakalesui ira mai na mate mera bula, ka kena ilutua me vakarautaka na Veisorovaki tawayalani.
Ena veika kece sa tukuna ka cakava na iVakabula, vakabibi ena Nona solibula ni veisorovaki, sa vakaraitaka kina vei keda o Koya na sala vua na Tamada mai Lomalagi. Na Nona ivakaraitaki kei na ivakavuvuli e vakararamataka na salatu e dodonu meda muria meda lesu tale kina ki na noda itikotiko vakalomalagi.
Wasea na Nona Rarama
Ni da sa vakila na rarama ni Luve ni Kalou ena noda bula, sa dodonu meda segata me wasea yani na rarama o ya vei ira na tamata. Au a taleitaka meu daukaulotu e Igiladi. Au a taleitaka noqu a peresitedi ni kaulotu e Kenada. Kau taleitaka na noqu veikacivi ena gauna oqo vaka lewe ni Kuoramu ni iApositolo Le Tinikarua, ka vakatarai au meu vakadinadinataki Jisu Karisito e vuravura taucoko.
Na iVakabula e vakavulica, “Raica sa i Au ga na rarama mo ni dulaka cake—me vaka ko ni sa raica niu a kitaka” (3 Nifai 18:24).
Na rarama ni iVakabula ena cila e lomada ena veigauna kece eda masu ka vakasaqara na Nona vosa ena ivolanikalou. Na Nona rarama ena cila ni da loloma me vaka na Nona loloma, wasea na noda ivakadinadina, ka veiqaravi ena yalo sega ni nanumi koya ga. Oqo ena vakasava tani na butobuto mai na noda bula ka dreti ira mai na tamata era vakasaqara tiko na Nona rarama.
Na Nona Rarama ena Tudei ka Sega ni Mudu
Na rarama i Jisu Karisito e tu ga me baleti iko. Sega ni dua na ka—e sega sara ga ni dua na ka—me na rawa se bokoca na Nona rarama. Ena tudei ka sega ni mudu. Ko Jisu Karisito “Sa ikoya na rarama kei na bula kei vuravura; … io na rarama sa tawacava, ka sega ni vakabutobutotaki rawa” (Mosaia 16:9).
Au vakavinavinaka tawamudu ena vuku ni ka au a sotava niu se daukaulotu gone niu sa mai kila vakataki au na ka oqo. Au kila vakaidina oqo ni kua niu sa sotava oti na bula kei na kena veivakatovolei kei na kena reki kecega.
Kevaka o sega ni kila na vanua mo lako kina se na ka mo cakava, rai ga ki na rarama dina ni Luve ni Kalou. Kevaka o sa tuvakarau mo lako mai Vua ka muria na Nona rarama, ena vakararamataka na nomu sala ko Koya.