Toso yani ki na Veisiga Vinaka

Mai vei Marissa Widdison

Mekasini ni Lotu

Sa vakarautaki tu na inuinui, veivuke, kei na veivakabulai vei ira era bula mai na veivakalolomataki.

iVakatakilakila

yalewa vata kei Jisu Karisito

Ena dua na gauna au a vuka tani mai na dua na vanua ka sinai ena kubou mai na dua na kama bula voleka. Ni vuka cake na waqavuka, keitou a curuma yani na kubou dravusa ka basika ki na dua na lomalagi makare, ka ramase. Au qai kila ni matanisiga serau kei na cagi savasava e a tu ga e kea, ia na noqu rawa ni marautaka e a vakataotaki mai na dua na ka au sega ni rawa ni lewa. Na kama bula a sega ni noqu cala, ia e a vakayaco ka ki na noqu bula.

Na veivakalolomataki e vaka o ya. O ira era sotava na veivakalolomataki me ra kakua ni beitaki, ia e dodonu me ra vorata tiko na kena revurevu. Na veivakalolomataki e rawa ni vakabuwawataka na noda kila na keda yaga ka dredre kina me da vakila na loloma ni Kalou. Ena rawa ni taura toka e dua na gauna mera sereki rawa mai na o ni lasu nei Setani o ira na vakabulai mai ka me vakaduavatataki tale kei na veidina tawamudu. Ia na inuinui, veivuke, kei na veivakabulai era sa tu ena vei ikalawa yadua ni sala!

Dua na iTalanoa

O tamai Stacie¹ a dau veivakalolomataki. A tukuna vua ni na sega ni dua na ka vinaka e rawata ena gauna e tubu cake kina. E a vakavuna me vakila o koya ni sega ni yaga na nona bula.

Ni toki o Stacie ki na koliji, a rawa me vakasama vakamatata cake. Sa tekivu me lako tale ki lotu ka vakila na loloma ni Kalou vei koya kei na nona matavuvale. Ni toso tiko na gauna, a kunea na vakacegu e levu cake ena kosipeli kei na nona veiwekani kei na iVakabula.

E nanumi me na dua na bilioni na gone e vuravura raraba era na sotava eso na ivakarau ni veivakalolomataki ena yabaki oqo.² E rawa beka ni o iko se so tale o kila era sa lako curuma tiko e dua na ka vaka a sotava o Stacie. Sa rawa ni veivuke na vei ivurevure oqo.

Kevaka O Sotava Tiko na Veivakalolomataki

Kevaka o vakararawataki tiko, yalovinaka tukuna vua e dua na ka e yaco tiko vei iko. Mo kila tiko ni lomani iko na Kalou! Kei ira talega na lewe ni matavuvale, itokani kei ira na lewe ni Lotu yalododonu, ena nomu bula. Era na tu e yasamu ka vukei iko mo lako curuma rawa na ka oqo.

Ka yalovinaka nanuma tiko, “Na veivakalolomataki a sega, ena sega, ka na sega vakadua ni nomu cala. … E sega ni o iko e dodonu mo veivutuni; e sega ni nomu cala.”³

E kaya o Dr. Sheldon Martin, e dua na daunivakasala ena Tabana ni Veiqaravi Vakamatavuvale ni Lotu, ni rawa ni veivuke vei ira na bula me ra vakanamata ki na dina tawamudu ni nodra veigauna sa oti, na gauna oqo, kei na veisiga ni mataka.

Sa Oti: “E levu cake na tamata era kauwaitaki iko ka o sega ni kila ,” e kaya o Dr. Martin, ka dusia ni o iko e imatai ka taumada o dua na luvedrau na itubutubu vakalomalagi. Na nomu matavuvale tawamudu e sivia yani nai yalayala ni nomu veiwekani vakavuravura. Me ikuri ni kaukauwa kei na vakacegu mai vua na Tamada Vakalomalagi, o Jisu Karisito, kei na Yalo Tabu, era tiko na nomu qase e liu dauloloma ena yasa kadua ni ilati ka ra kauwaitaki iko ka rawa ni qaravi iko.
Ena gauna oqo: “E dodonu mo lomana na nomu bula ena gauna oqo,” e kaya o Dr. Martin, se vanua cava ga o sa yacova ena cakacaka ni veivakabulai. Sa kena ivakarau me da vakila na cudru, na soro, se veilecayaki. Mo vosoti iko vakai iko.
Veisiga ni mataka: “Ena vinaka cake na veika kece,” e kaya o Dr. Martin. “Au kila oqo baleta niu kila na iVakabula. E kauwaitaki iko o Koya.” Cakava na ka o rawata mo tiko voleka ga Vua. Ni o vakayacora vakakina, ena rawa mo vakayawaki iko mai na veiwekani ca ka vakalevutaka cake na nomu rawa ni vakila na Nona vakacegu kei na loloma.

Kevaka o Nanuma ni Dua na iTokani e Sotava tiko na Veivakalolomataki

Tarogi ira vakadodonu, “E dua beka e vakararawataki iko tiko?”
Vakarogoca matua na veika era kaya. Vakaraitaka vei ira na yalovinaka kei na yalololoma.
Tukuna vua e dua e rawa ni veivuke, me vaka e dua na qasenivuli, itubutubu, daunivakasala ni koronivuli, se iliuliu ni Lotu.
Tomana tiko nomudrau veitokani. Dau kauwaitaki ira me vaka ga na kena ivakarau matau. Vukei ira me ra cakava eso tale na veitokani bulabula.

Toso Tiko ga ki Liu

Nikua, o Stacie sa dua tu na kenadau gugumatua ka tiko na nona matavuvale dauveilomani. Eso na siga era se dredre tikoga, ia e dau vakila o koya na levu ni marau kei na veivosoti mai vei ira na tani.

“Au kila ni rawa ni vakamavotaka na noda mavoa kecega o Jisu Karisito,” e kaya o Stacie. Kevaka e dua na ka me na wasea vei ira era sa vakabulai mai, o ya mera vakanuinui tiko ga.

“Sa dau tu ga na inuinui vei Karisito,” e kaya o koya, “ena loma sara mada ga ni veivakatovolei ka vaka me ra na sega ni oti rawa.”

Se cava ga na bolebole o sotava tiko, toso tikoga ki liu. Vakasinaita na nomu bula ena vinaka kei na vakabauta ena sala cava ga o rawata. Sa tu e matamuni na veisiga vinaka!