Taro kei na Kena iSau

“Ena so na gauna au nanuma ni rau sa dau vakalewai au vakalevu na noqu itubutubu. Meu na sauma vakacava ena vakarokoroko?”

“Ni da sureta na Turaga ena masu me tiko ena noda matabose ni matavuvale ena torocake na noda bula veimaliwai. Sa rawa, ena veivuke ni Tamada Vakalomalagi kei na noda iVakabula, meda dauvosota vakalevu cake, veinanumi, veivukei, veivosoti, ka veikilai vinaka ni da masuta na veivuke.”

Peresitedi M. Russell Ballard, Peresitedi Vakatawa ni Kuoramu ni iApositolo Le Tinikarua, Koniferedi raraba ni Epe. 2016 (Ensign se Liaona, Me 2016, 65).

Dou Vakayagataki Gauna Vata

goneyalewa

Erau dau soli ivakasala kei na veivakadodonutaki na nomu itubutubu baleta ni rau lomani iko ka vinakata me vukei iko mo rawa-ka. Ke rairai vaka me tawadodonu na veivakadodonutaki o ya, taura e dua na gauna mo veivosaki yadudua kei rau na nomu itubutubu ni dou sa yalovinaka kece. E rawa ni o kunea e dua na gauna o drau cakava vata tiko kina e dua na ka drau taleitaka ruarua, me vaka na vakasaqa se vakaukauwa yago. Oqo ena vukea me sureta na Yalo ki na veivosaki.

Repeka M., 17, Maryland, Amerika

Nanuma Erau Lomani Iko

goneyalewa

Kevaka o nanuma tiko ni rau vakadodonutaki iko ka veivakasalataki vata kei iko na nomu itubutubu baleta ni rau lomani iko, ena rawarawa sara me ciqomi na nodrau veivakadodonutaki. Na cavuti ni dua na masu totolo mo kerea na Yalo me vukei iko mo veidokai ka yalomalumalumu tiko, ena vukei iko mo veivosaki vakavinaka cake kei rau.

Lauren M., 16, Texas, Amerika

E Veivakabulai na Yalodina

goneyalewa

Na veivosaki vinaka, ena yalodina e rawa ni walia na veimataqali veisaqasaqa kecega. Dabe vata kei rau na nomu itubutubu ka vosa vei rau. Tukuna vei rau na veika e mosi vei iko, ka vakarorogo ki na veika e vakararawataki rau se rau sega ni taleitaka. Mo dou dau tiko vata vakalevu, ka bucina na veilomani kei na veisaututaki ena nomudou veimaliwai ka vakakina e loma ni matavuvale. Ni ko sa cudru, kerea vua na Tamada Vakalomalagi me vakamaravutaka na lomamu.

Rafaella P., 17, São Paulo, Brazil

Tukuna Vei Rau Ni O Lomani Rau

goneyalewa

E rawa ni o sauma ena vakarokoroko, kevaka sara mada ga e dredre. Tukuna vei rau na nomu itubutubu ni o lomani rau, ni o kauwaitaki rau, ka o kila ni rau lomani iko. Tukuna vei rau ni veika erau tukuna e vakamosia na lomamu, yalomu, kei na ituvaki ni nomu vakasama. Masu vakawasoma. Ena vukei iko vakaidina na Tamada Vakalomalagi.

Wellie S., 13, Luanda, Angola

Erau Raica Na Ka O Rawa Ni Rawata

goneyalewa

Sa namaka tiko na Kalou na noda vinaka duadua ka rawa ni raica na veika dina eda rawa ni rawata. Oqo na vuna sa gadreva vakalevu sara kina o Koya e levu na ka mai vei keda. Erau raica talega na nomu itubutubu na veika o rawa ni rawata ka vinakata mo vinaka o iko ka mo rawa ka kina! Ena sega beka ni taucoko sara na nodrau veivakauqeti mo torocake, ka o na sega beka ni taucoko sara mo na rawata. Veivosaki kei rau na nomu itubutubu ena loloma kei na yalodina, ka na dusimaki iko na Yalo mo kunea na veivakararamataki.

Brooke T., 18, Arizona, Amerika

Dauvakarorogo ena Yalomalumalumu

Wale tikoga oqo, au sa dau tovolea meu dau vakarorogo vakavinaka cake. Au tovolea meu vakarogoca vakamalua na ka e rau via tukuna na noqu itubutubu ka sega ni veiba se vosa kaukauwa vei rau. Ena taura na vosota kei na yalomalumalumu levu, ia na kena vakayacori ena rawa ni vaqaqacotaka na kemu isema vei rau na nomu itubutubu ka vakatara na veikilai e matata cake ena yasana ruarua.

Kami K., 18, Utah, Amerika

Na vei isau ni taro sa kena inaki me veivuke ka veivakararamataki, ka sega ni ivakaro vakadonui ni ivunau ni Lotu.

Na Cava na Nomu Nanuma?

“Au gadreva na ivakasala meu veivuke ena tuvanaki ni itaviqaravi ni itabagone. Na cava eso na vakasama vinaka?”

Vakauta mai na nomu isaunitaro kei na itaba ni bera nai ka 15 ni Feperueri, 2023.

Imeli mai ki na [e-mail], se lako ki na ftsoy.ChurchofJesusChrist.org ka kiliki ena ‘Submit Your Work.” Curu ena nomu Akaude ni Lotu ka digitaka na “For the Strength of the Youth” ena ruku ni “Choose Magazine.” Kiliki ena “Add File” mo digitaka na nomu faile kei na itaba, ka qai kilikitaka na “Submit” mo vakavodoka ka vakauta mai na nomu faile.

Ena rawa ni moici na nomuni itukutuku me baleta na kena balavu se kena matata.