“Na Ulu ni Cakacaka Mana,” Me iSakisaki ni iTabagone, Janu. 2023.
Lako Mai, Mo Muri Au
Na Ulu ni Cakaca Mana
E tiko e dua na cakacaka mana ka bibi cake sara mai vei ira kece.
Ni sa sega ni dredre vua na Kalou e dua na ka (raica na Luke 1:37; Filipai 4:13). Ia ena rawa beka ni o masulaka e dua ga na ka ka na yaco dina? Na cava na vuna era sotava kina na cakacaka mana eso ka so e sega? Ka cava na ibalebale dina ni veika oqo vei iko?
E tolu na cakacaka mana ni gauna makawa, tolu na cakacaka mana ni gauna oqo, kei na dua na ulu ni cakacaka mana e vakavulici keda cake vakalailai.
1
Cakacaka Mana ni Gauna Makawa
Droini mai vei Camila Gray
A rairai kurabui vakalevu cake o Meri ni tukuna vua na agilosi o Keperieli ni na tinana na iVakabula. E a sega ni dodonu me yaco. Ia a vakamacalataka na agilosi o Keperieli ni o Jisu e Luve ni Kalou ka kaya, “Ni sa sega ni dredre vua na Kalou e dua na ka” (Luke 1:37). Ka dina na agilosi. A vakasucuma dina o Meri na iVakabula kei vuravura.
Na Cakacaka Mana ni Gauna Oqo
Rua na daukaulotu ka veiqaravi tiko e Mexico erau dau takosova tiko e dua na gaunisala osooso e veisiga. Ena so na gauna erau dau wawa me 10 na miniti ni bera ni rau qai takoso rawa, ka vakavuqa me rau dau cici! Rau a qai sotava e dua na lewenilotu qase sara, berabera ka luluqa tu vakalotu. E vinakata me lako mai lotu vata kei rau, ia—oqo na ka e dredre kina—ni na gadrevi vua me takosova na gaunisala osooso. Ka sega, erau sega ni rawa ni keveti koya takoso na daukaulotu (e dina ga ni rau sa vakasamataka tiko!). Ia a qai yaco e dua na cakacaka mana. “Ni keirau yaco ki gaunisala,” a kaya e dua vei rau na daukaulotu, “e a sega na motoka e veilakoyaki tiko. Keitou a rawa ni taubale vakamalua sara ka yaco bula ki tai.”
Dredre? Vakasama Tale!
Vua na Kalou, sa rawarawa na ka kecega (io na veika mada ga e dredre!).
2
Cakacaka Mana ni Gauna Makawa
E dua na tagane a “tauvi wamalai,” se paralase. E vakabauta o koya ni na vakabulai koya na iVakabula. Ia a vakavolivoliti o Jisu mai vei ira e vuqa na tamata, ka dredre sara na yaco yani Vua. Sa qai cava e cakava na tagane o ya? Eratou a tukuci koya sobu na nonai tokani ena nona idavodavo mai dela ni vale ki matana na iVakabula. Sega, a rairai sega beka ni rawarawa o ya. Ia o koya kei iratou na nona itokani a rairai levu sara na nodratou vakabauta. Ka saumi vei iratou—e a vosota na ivalavala ca ni tamata o oya ko Jisu ka vakabulai koya (raica na Luke 5:17–26).
Na Cakacaka Mana ni Gauna Oqo
A qito voli o Ella W. kei iratou na nona itokani ena rara ni gade ka ra vakayalia kina eso na nona itokani na nodra vokai susugi e vale. Oqo ena sega beka ni vaka ni dua sara na ka levu. Ia nanuma tiko, ni vokai era dau veisautaka na kedra i roka me tautauvata kei na veika e vakavolivoliti ira tu. Ni oti e dua na vakasaqaqara lailai, sa lewa o Ella me sa gauna ni masu ena vakabauta. Sa totolo sara na nodratou kunea na vokai ena dua na vunikau! “Ni sa tiko tale ena ligana e dua, keitou a cavuta e dua tale na masu ni vakavinavinaka vua na Tamada Vakalomalagi,” a kaya o Ella.
Na Cakacaka Mana ena Yaco Mai ena Vakabauti Jisu Karisito
Na ka e dredre ena dau rawarawa tu ga vua na Kalou. Ia ena gadrevi me da vakabauta na iVakabula (se gadreva mada ga me da vakadinata!) ka cakacakataka na vakabauta oqori me yaco kina na cakacaka mana.
3
Cakacaka Mana ni Gauna Makawa
Erau veiwatini o Ilisapeci kei Sakaraia ena vuqa na yabaki ia e sega ni dua na luvedrau. Ena so na gauna, ena rairai vaka me sega ni saumi mai na nodrau masu ena yalodina. Ka mani yaco, me rau qase sara ka sega ni rawa ni vakaluveni. Ia a qai rairai mai e dua na agilosi vei Sakaraia ka tukuna vua ni na vakaluveni o Ilisapeci. (Dina lasa: na gonelailai a yaco me ko Joni na Dauveipapitaisotaki!) Kena itinitini, sa vakayacori rawa na veika dredre. Ia o Ilisapeci kei Sakaraia erau a wawa mai vakabalavu sara (raica na Luke 1).
Na Cakacaka Mana ni Gauna Oqo
O Lindsey M. e dau tauvi manumanusoni. “Ena veimataka, au na vakamasuti Tamaqu Vakalomalagi me kauta tani na cuqa,” e kaya o Lindsey. Ia e a sega ni lako tani. Ni waraka tiko o Lindsey me vakabulai, a ciqoma o koya na veivakalougatataki ni matabete, ka kauta mai vua na vakacegu. Ia na vakacegu o ya sa dua na cakacaka mana vakaikoya. “Ni da gole vua na Tamada Vakalomalagi, ena tu e kea o Koya ena vukuda, me vakatetea na cakacaka mana ka solia na veivakacegui,” e kaya o koya. A qai caka vei Lindsey e dua na veisele ka vukea na nona cuqa.
Na Cakacaka Mana e Lako Mai Me Vaka na Loma ni Kalou
Na Kalou e rawa ni cakava na ka kecega. Ena tu beka vei iko na vakabauta levu. Ia na cakacaka mana ena yaco mai me vaka na Nona gauna, lewa kei na Nona sala na Tamada Vakalomalagi. Vakasaqara na cakacaka mana tale eso ena ilakolako oqo, me vaka na vakacegu kei na kaukauwa mo vosota.
Na Ulu ni Cakacaka Mana
Sa levu sara na ka eda veitalanoataka me baleta na cakacaka mana. Ia e tiko e dua na cakacaka mana e levu ka bibi cake mai vei ira kece. Na cakacaka mana oya sai koya na nona lako mai ki vuravura na Luve ni Kalou ni se gonelailai, mai veivakavulici ka veivakabulai, ka qai solia Nona bula vakaikoya. Sa vakacolata o Jisu Karisito vei Koya na noda ivalavala ca, mosi, kei na malumalumu. Na Nona cakacaka mana e oka kina na tolu na siga e loma ni ibulubulu kei na tucake tale ka na kauta mai na bula ni oti na mate kivei keda kece. Na cakacaka mana oqori e veisautaka na ka kecega.
E rawarawa na noda coriti ena noda tovolea me da vakabauta vakatabakidua e dua na cakacaka mana. Ka na rawa ni dredre oqori ni da sega ni kila na loma i Tamada Vakalomalagi. O koya gona me kua ni vakanamata nomu vakabauta ki na dua na cakacaka mana o vinakata, ia mo vakanamata ki na cakacaka mana ni Veisorovaki ni iVakabula. Mo vakabauta tiko ni sega ni dua na ka e dredre vua na Kalou, oka kina na veika o masulaka tiko. Ia vakabauta talega ni Nona lewa e vinaka cake mai na nomu. Kevaka e sega ni saumi mai na nomu masu ena ivakarau ni nomu vakanuinui, ena vaqaqacotaki iko o Koya ka vukei iko mo vosota.
Na iLutua ni Ka me Nanumi
Ni vakanamata na nomu vakabauta vei Jisu Karisito, ko na kila vakavinaka na kena ibalebale ni sa rawarawa na ka kecega vua na Kalou. Ko na vakabauta ni rawa ni sauma na nomu masu na Tamada Vakalomalagi, ka o na nuitaka na Nona lewa ka ciqoma na Nona vakacegu ni sega ni yaco na veika me vaka e nakiti. O koya mo qai vakabauti Jisu Karisito. O Koya ga na cakacaka mana. Ka sa sega ni dua na e dredre vei Koya.