“Vakabauta ena Butobuto,” Me iSakisaki ni iTabagone, Tise. 2022.
Vakabauta ena Butobuto
Oqo e vica na vakatutu ka sa vukei au ena noqu lomatarotaro kei na vakatitiqa.
iTaba mai na Getty Images
Niu se gonetagane lailai, e dau sikova na noqu matavuvale na Great Basin National Park e Nevada, Amerika. E dua na ka vakasakiti ena rara ni gade o ya na qaravatu na Lehman Caves.
E dua na dau veivakagadetaki ena kauti iko yani ki loma ni qaravatu, ka na qai bokoca na cina kece ena dua na gauna. Ka na sega ni kunei edua tale na rarama. Sa dau vei vakalomabibitaki, kei na vakanananu mo vaqara nomu sala ki taudaku ni qaravatu ka sega ni dua na cina sa veivakayalolailaitaki dina. Ena vakavinavinaka, e dau waqaca tale na cina o dau ni veivakasarasarataki ka tuberi iko bula yani ki tautuba.
Ena so na gauna eda dau sotava na vakatataro kei na vakatitiqa me baleta na Lotu kei na noda ivakadinadina. E rawa ni veivakalomabibitaki ka veilecayaki, me vaka na tiko ena loma ni qaravatu butobuto.
E vinaka me tiko na vakatataro kei na kauwai eso. Na ka ena vakayacora na duidui levu duadua sai koya na sala o torovi ira yani kina.
Oqo e vica na vakatutu ka sa vukei au.
Cakacakataka na vakabauta
Au raica ni kevaka meu na torova na lomatarotaro kei na kauwai mai na dua na itutu ni vakabauta, au na rawa ni kunea e dua na sala ni toso ki liu. “Na vakabauta e sega ni noda kila taucoko vakavinaka na ka” (Alama 32:21). Io “kevaka mada ga ko ni gadreva mo ni vakabauta, mo ni laiva na gagadre oqo me kadre e lomamuni” (Alama 32:27).
O vuravura ena tukuna vei iko ni kevaka o sega ni rawa ni vakadinadinataka e dua na ka ena vakadidike, ena sega ni rawa ni dina o ya. Oqo e sega ni nona sala na iVakabula. Me vaka a kaya na iVakabula vei Tomasi, o koya ka sega ni via vakadinata vakavo kevaka e a vakila vakataki koya na mavoa ni iVakabula sa tucaketale, “Ia mo kakua ni vakatitiqa, mo vakadinata ga” (JoniJoni 20:27).
Kerekere, Vakasaqara, Tukituki
Na malanivosa “kerekere, vakasaqara, tukituki” e tokaruataki ena ivolanikalou (raica na Maciu 7:7; Vunau kei na Veiyalayalati 88:63). Na sala ni Turaga me vukei keda ena noda taro sai koya me da taroga Vua na taro.
“Ia kevaka sa lailai na vuku vua e dua vei kemudou, me kerea vua na Kalou” (Jemesa 1:5). Gole vakadodonu sara ki na ivurevure ni dina kecega. Na Kalou e lomani iko ka na vukei iko.
Dau Vakasaqara na Dina
Au sa raica ni o ira era vakasaqara ena yalodina kei na yalomalumalumu na dina era dau kunea na isau ni nodra taro ena dua na gauna. Ena yasana kadua, o ira era vakasaqara tiko me ra kunea na cala era na toso ga yani ka yawa tani mai na dina.
Mo dau vakasaqara na dina. E tiko na dina, ka rawa ni o kunea.
Cakava e dua na Kato ni “Me Qai Saumi Malua”
Na cava o na cakava kevaka o vakasaqara ena yalomalua kei na yalodina na isaunitaro ka vaka me sega ni yaco mai?
Vakadua tale, au sa digitaka meu torova yani ena vakabauta. Au sa bulia e dua na kato lailai ena dua na vatavata ena noqu vakasama—me vaka e dua na kato ni iyautalei totoka. Volai toka kina na vosa “Me Qai Saumi ena dua na Tikinisiga mai Muri.”
Ena veigauna e tiko kina e dua na noqu taro se kauwai au sega ni rawa ni walia, au dau raitayaloyalotaka niu vola ena dua na tiki ni pepa, lobika vakamaqosa, ka biuta ki na kato. Au qai biuta lesu tale ena tavata.
Niu cakava vakakina, au sa cakacaka tiko ena vakabauta ni dua na siga ena sauma mai na Turaga. E rairai ena cakava beka o Koya, de na sega beka. O ya sa vakatau vua ena Nona vuku tawayalani.
Ia, eso na noqu taro sa saumi mai. Ia e vuqa era se tiko ga ena kato. Ka sa donu vei au o ya.
Kemuni na noqu itokani lomani ena Karisito, dau vakasaqara na dina.
Ni tubu cake na nomu vakabauta, ena tiko vata kei iko na Turaga. Ni o torovi Koya ena vakabauta, ena vakatakila vei iko o Koya na veika o gadreva mo kila ena kena gauna donu.