iSolisoli ni Kosipeli e Guam

Mai vei Jessica Brousseau

Mekasini ni Lotu

Ena dua na yanuyanu e loma ni wasawasa, a kunea o Franchesca na veitokani kei na veivakacegui ena kosipeli.

iTaba mai vei Cody Bell

Ena kena veimatasawa, veiwai maravu, kei na veiqaravatu makawa, na yanuyanu o Guam e vaka e dua na vanua ni gade ni tadra, ia e dua ga na siga matau ena bula ni goneyalewa yabaki 15 o Franchesca N.! E taleitaka o koya na veimatasawa totoka. “E ka marautaki na lako yani ka vakadikeva na veika bula.”

A sucu ka susugi e Guam, e dau taleitaka o koya na cakava na ka e tautuba. “Au dau taleitaka na tiko e tautuba, kau sega soti ni dau taleitaka na tiko e lomanivale,” e kaya o koya. E dau taleitaka na vakatavovoce e waitui, na nunu, kei na taubale vata kei rau na nona itubutubu kei rau na tacina yalewa. Eratou taleitaka vakabibi me taubale ena dua na vanua ka tiko kina na veiqaravatu makawa.

“Au voleka sara vei rau na taciqu yalewa. Erau noqu itokani vinaka duadua,” e kaya o koya. E vuli tiko mai Awai o tuakana yalewa. “Na itukutuku raraba e dua na ivurevure levu me vukei keitou ena veitaratara,” e vakamacalataka o Franchesca. E dau taleitaka me tiko voleka ka veitaratara tiko.

E Dua na iVakaraitaki Vei Ira Na Tani

O Franchesca e dua na gonevuli ena vuli torocake ena dua na koronivuli ni goneyalewa va-Katolika, ka lewe duadua ga ni Lotu i Jisu Karisito ni Yalododonu Edaidai. Taumada e vaka me dau veivakarerei ni o koya e lewe ni Lotu duadua ga ena nona koronivuli, ia sa matau vua me raici ni o koya e duatani. Kena ikuri, o ira era tu wavoliti koya era nanuma ni vaka e talei ni o koya e duatani na nona lotu.

Me ivakaraitaki, era a gunu kofi tiko na nona itokani ena vakasigalevu ena dua na siga, ka rawa kina vei Franchesca me vakamacalataka vei ira na Vosa ni Vuku.

E digitaka talega o Franchesca me kakua ni vosa ca e dina ga ni ra dau cakava o ira tale eso e koronivuli. E kaya o koya, “Au a dau temaki vakavuqa e liu, ia e dua na ka e vakaukauwataki au tiko sai koya na noqu veiwekani kei na Tamada Vakalomalagi ena masu.” E tomana o koya, “E sega ni dodonu meu cakava tiko na veika oqo, baleta ni cala ka baleta niu lomana na Tamada Vakalomalagi kei Jisu Karisito.”

Kunei ni iTokani

Ena so na gauna e rawa ni dau galili baleta ni lewe ni Lotu duadua ga e nona koronivuli. Ni se qai curu vou yani, a vakila o Franchesca na galili ena gauna ni matedewa ka sega ni levu na nona itokani. A lomaleqa o koya me vosa vei rau na nona itubutubu baleta na ka o ya, ia ni masu, a vakauqeti me tukuna vei rau na veika e vakila tiko.

Eratou a digitaka vakamatavuvale, me masu me rawa ni kunea o koya eso na itokani e rawa ni nuitaki ira. E veivakurabuitaki, ni oti ga vakalailai nodratou masu, eratou a rogoca e dua na tukituki e katuba. A yaco me dua vei ira na nona itokani mai na dua tale na tabanalevu, ka kauta tiko mai eso na keke lalai! A kila kina o Franchesca ni sa rogoca na Tamada Vakalomalagi na nodratou masu.

Na iteki nei Franchesca e okati kina o ira na lewenilotu mai Guam kei na vica tale na yanuyanu. Na nona tabanalevu e tiko ga kina e dua na ilawalawa lailai ni itabagone, ia na nona tabanalevu e vaka e dua na matavuvale. Era veivolekati sara na lewenilotu, ka oqo e vakauqeti koya me gole ki lotu ena vei Sigatabu yadua. Era sa veivakayarayarataki levu ka dau ivakaraitaki vinaka ena nona bula.

Sa kunea talega o Franchesca na veivaqaqacotaki ena nona kalasi ni semineri. “Na semineri e dua na ka cecere ena noqu macawa,” e kaya o koya. “Niu dau lako ki semineri, e vaka me yali kece na noqu lomaleqa.”

E dau taleitaka na tiko ena semineri, ena initaneti se e matanavotu, ka sega ni calata e dua na kalasi vakavo ke sega ni rawa ni levea. E kaya ni dau toso vinaka na nona veimacawa baleta ni digitaka me tiko ena semineri. Kevaka e dau curuma e dua na macawa ni lomaocaoca, e dau vakadeitaka me tiko ena semineri baleta ni vakila e kea na vakacegu.

E tiko talega na nodra itaviqaravi na itabagone vaka rua se vaka tolu ena dua na vula. A tuvanaka sara mada ga o Franchesca e dua vei ira—e dua na bogi ka levu na kena qito lasa ena papa kei na dua na qito vakaivolanikalou. Era a sega ni sota rawa vakalevu ena gauna ni matedewa, ia ni yaco mera sota, sa dua na gauna cecere vei ira.

Era a cakava sara mada ga na goneyalewa e dua na vidio ni sereivakatagi ki na sere ni itabagone ni Lotu “Siga Vinaka” ka vakavodoka ki na wasea loloma ka laveti ira cake na tani. “Na itukutuku raraba e rawa ni kauta vata mai na tamata kecega, vakabibi ena gauna eda sega ni rawa ni veiraimata kece kina.”

Vakanamata me dua na Valetabu

Ena koniferedi raraba ni Okotova 2018, a kacivaki kina na valetabu na Yigo Guam Temple. E kaya o Franchesca, “Sa dua na ka na nodra marau na itabagone—keimami a masulaka kece.” Ni oti oya, a sarava o koya na kena tara ka waraka na nodra valetabu vakai ira, ka a vakacavari ena Me ni 2022.

Era dau gole ki na Yatu Filipaini me baleta na ilakolako ni valetabu ena veigauna sa oti. Me saumi na ilakolako oqo, era dau kumuni ilavo ena volitaki keke kei na sava motoka. Baleta ni dau ilakolako levu, era na dau tuvanaka me rauta ni dua na macawa. Sa nanamaki tiko o Franchesca me rawa ni lako vakawasoma ki valetabu ka rawata na veivakalougatataki e yaco mai ena nona papitaisotaki ena vukudra na nona qase e liu.

Veivakacegui ka basika ena Masu

E kaya o Franchesca ni dau lomaleqa vakalevu, ia na masu e dau vukei koya. “E ka kaukauwa dina na masu. Noqu vosa tiko mada ga vua na Tamada Vakalomalagi sa dau veivakacegui dina. O Koya e vakarorogo ka rawa ni veivuke.”

“Niu masu, na kena isau e sega ni dau yaco mai vei au vakatotolo,” e kaya o koya. “Sai koya ga na vakilai ni veidusimaki e dau vukei au; na vakilai ni Nona iserau kei na Nona loloma. E vakacegui au ka vakavuna meu vakila niu vinaka cake sara.”

Na nona ivakasala vei ira na itabagone tale eso o ya mo: Masu vua na Tamada Vakalomalagi. Vosa Vua. Oqori e veivuke vakalevu.”

E kaya ni o tinana e dua talega na daulomaleqa ia e dau veitokoni vakalevu. “O tinaqu e dua na veivakalougatataki mai vua na Tamada Vakalomalagi, ka dau tuberi au vakalevu o koya.”

“Na matavuvale sa dua na veivakalougatataki levu,” e kaya o koya. “Au nanuma ni bibi mo dolavi iko ki na nomu matavuvale se dua na itokani kevaka o lako curuma tiko e dua na ka.”

E vinakata o Franchesca me ra raica na veivakalougatataki ni Turaga e veisiga na tamata kece. “Na veivakalougatataki ni veisiga e rawa ni rawarawa sara. Na lako ki vuli sa dua na veivakalougatataki levu. E tu e vuqa sara na cakamana talei ka da rawa ni raica kevaka eda taura na gauna meda raici ira kina. Au vakavinavinaka ni tiko ena noqu bula na kosipeli.”