« ដើរតាមពន្លឺដ៏ពិត » ដើម្បីកម្លាំងនៃយុវជន ខែ មករា ឆ្នាំ ២០២៣ ។
ចូរមកតាមខ្ញុំ
ដើរ តាម ពន្លឺ ដ៏ពិត
ពន្លឺរបស់ព្រះយេស៊ូវគ្រីស្ទគឺ តែងតែ មានជានិច្ចសម្រាប់ប្អូន—ម្សិលមិញ ថ្ងៃនេះ និងជារៀងរហូត ។
ចូររំពឹងគិតពីផ្កាឈូក ដោយ ហាលី មីលលើរ
នៅពេលដែលព្រះអាទិត្យលិចនៅថ្ងៃអាទិត្យមួយក្នុងឆ្នាំ ១៩៤៨ ខ្ញុំបានដើរនៅតាមមាត់ទន្លេត្រិនថ៍ នៅក្នុងទីក្រុង ណតទីងហាំ ប្រទេសអង់គ្លេស ។ កាលនោះ ខ្ញុំមានអាយុ ២០ ឆ្នាំជាអ្នកផ្សព្វផ្សាយសាសនាម្នាក់ ។ វាគឺជាថ្ងៃដ៏យូរ ហត់នឿយមួយ ប៉ុន្តែខ្ញុំសប្បាយចិត្ត និងពេញចិត្តក្នុងការងារនោះ ។
ពេលដែលខ្ញុំដើរតាមមាត់ទន្លេ នោះខ្ញុំបានអធិស្ឋាននៅក្នុងចិត្តរបស់ខ្ញុំ ។ ដោយសង្ឃឹមថាទទួលបានអារម្មណ៍ដឹកនាំមកពីព្រះអម្ចាស់ ខ្ញុំបានទូលសួរថា « តើទួលបង្គំកំពុងធ្វើអី្វដែលទ្រង់សព្វព្រះទ័យទេ ? »
អារម្មណ៍សន្តិភាពដ៏លើសលប់មួយ និងការយល់ដឹងភ្លាមៗបានគ្របដណ្តប់មកលើខ្ញុំ ។ នៅពេលដ៏ជាក់លាក់នោះ ខ្ញុំបានដឹងថា ព្រះយេស៊ូវគ្រីស្ទស្គាល់ខ្ញុំ ហើយស្រឡាញ់ខ្ញុំ ។ ខ្ញុំពុំបានឃើញការនិមិត្ត ឬស្ដាប់ឮសំឡេងអ្វីមួយឡើយ ប៉ុន្តែខ្ញុំអាចស្គាល់នូវភាពពិត និងទេវភាពរបស់ព្រះគ្រីស្ទ ប្រកបដោយអានុភាពខ្លាំងក្លា មិនចាំបាច់ទាល់តែទ្រង់បានគង់នៅចំពោះមុខខ្ញុំ ហើយហៅឈ្មោះខ្ញុំនោះទេ ។
ចាប់តាំងពីថ្ងៃនោះរហូតមកដល់សព្វថ្ងៃនេះ រាល់ការសម្រេចចិត្តសំខាន់ៗដែលខ្ញុំបានធ្វើ បានទទួលរងឥទ្ធិពលពីចំណេះដឹងរបស់ខ្ញុំដែលថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។ ខ្ញុំស្រឡាញ់ទ្រង់កាន់តែជ្រាលជ្រៅក្រៃលែង ហើយរកពាក្យអ្វីថ្លែងប្រាប់ពុំបានឡើយ ។ ទ្រង់គឺជាព្រះអម្ចាស់ ព្រះអង្គសង្គ្រោះ ព្រះប្រោសលោះ និងជាមិត្តរបស់ខ្ញុំ ។
អស់ជាច្រើនឆ្នាំ និងនៅភាគច្រើនទូទាំងពិភពលោក ខ្ញុំបានថ្លែងទីបន្ទាល់អំពីព្រះអង្គសង្គ្រោះ ។ ខ្ញុំដឹងថាទ្រង់គឺជាពន្លឺដ៏ពិត និងអស់កល្បជានិច្ចដែល « ពន្លឺនោះក៏ភ្លឺមកក្នុងសេចក្តីងងឹត » ( យ៉ូហាន ១:៥ ) ។ វាជាឯកសិទ្ធិសម្រាប់យើងដើម្បីមករកទ្រង់ ដើម្បីដើរតាមទ្រង់ ហើយដើម្បីទទួលអារម្មណ៍នៃពន្លឺរបស់ទ្រង់នៅក្នុងជីវិតរបស់យើង ។
ការពិតអំពីពន្លឺ
គ្រប់រយៈពេល ២៤ ម៉ោង យប់ប្រែទៅជាថ្ងៃ ហើយថ្ងៃប្រែទៅជាយប់ ។ នៅពេលភាពងងឹតនៃពេលយប់ចូលមកដល់ យើងពុំបារម្ភថាព្រះអាទិត្យរលត់នោះទេ ។ យើងដឹងថា ផែនដីនឹងវិលជុំវិញ ហើយព្រះអាទិត្យនឹងចាំងពន្លឺមកលើយើងម្តងទៀត ។ យើងប្រហែលជាមិនអាចមើលឃើញ ឬមានអារម្មណ៍នៃពន្លឺ ប៉ុន្តែវា តែងតែ នៅទីនោះ ។
វាគឺជារឿងពិតដូចគ្នាចំពោះខាងវិញ្ញាណ ។ ខ្ញុំត្រូវបានគេរំឭកពីរឿងនេះកាលពីប៉ុន្មានឆ្នាំមុន នៅពេលដែលភរិយារបស់ខ្ញុំ បាបារ៉ា និងខ្ញុំបានគយគន់មើលមេឃពេលយប់ដោយភាពស្ញប់ស្ញែង ។ មានផ្កាយរាប់លានដែលយើងឃើញហាក់ដូចជាមានពន្លឺភ្លឺស្រស់ស្អាតខុសប្លែកពីធម្មតា ។ បន្ទាប់មកគំនិតរបស់ខ្ញុំបានបែរទៅរកព្រះយេស៊ូវគ្រីស្ទដោយការងឿងឆ្ងល់ ។
ទ្រង់ « គង់នៅជាមួយនឹងព្រះ តាំងអំពីដើមមក »( យ៉ូហាន ១:២ ) ។ នៅក្រោមការដឹកនាំរបស់ព្រះវរបិតាសួគ៏ ទ្រង់បានបង្កើតផែនដី និងពិភពលោកដ៏ច្រើនឥតគណនា ( សូមមើល ម៉ូសេ ១:៣៣ ) ។ ទ្រង់គឺជាថាមពលដែលបំភ្លឺព្រះអាទិត្យ ព្រះចន្ទ និងផ្កាយទាំងឡាយ ( សូមមើល គោលលទ្ធិ និង សេចក្ដីសញ្ញា ៨៨: ៧–១០ ) ។ ទ្រង់គឺជាប្រភពនៃពន្លឺ និងជីវិតនៃគ្រប់ទាំងអស់ ( សូមមើល យ៉ូហាន ១:៣–៤; គោលលទ្ធិ និង សេចក្ដីសញ្ញា ៩៣:១០ ) ។ ទ្រង់បានប្រកាសថា « ខ្ញុំជាពន្លឺលោកីយ៍ អ្នកណាដែលតាមខ្ញុំ នោះមិនដែលដើរក្នុងសេចក្តីងងឹតឡើយ គឺនឹងមានពន្លឺនៃជីវិតវិញ » ( យ៉ូហាន ៨:១២ ) ។
នៅក្នុងសម័យរបស់យើង សាតាំងកំពុងព្យាយាមធ្វើការមិនឈប់ដើម្បីបិទបាំងពន្លឺរបស់ព្រះអង្គសង្គ្រោះ ។ ប៉ុន្តែប្អូនមិនអាចនៅក្នុងកន្លែងដែលងងឹតបំផុតដែលពន្លឺរបស់ព្រះយេស៊ូវគ្រីស្ទមិនអាចចាំងដល់ប្អូន ប្រសិនបើប្អូនមករកទ្រង់នោះទេ ។ ពន្លឺរបស់ទ្រង់គឺ តែងតែ មាននៅទីនោះ ។
រចនារូបភាពដោយ អ័ដាម នីកែល
ទ្រង់បំភ្លឺផ្លូវរបស់យើង
ជាព្រះរាជបុត្រារបស់ព្រះ ព្រះយេស៊ូវគ្រីស្ទបានមានសិរីល្អជាមួយនឹងព្រះជាព្រះវរបិតា « កាលដែលលោកីយ៍មិនទាន់បានកើតនៅឡើយ » ( យ៉ូហាន ១៧:៥ ) ។ ទ្រង់បានគោរពប្រតិបត្តិយ៉ាងឥតខ្ចោះចំពោះព្រះវរបិតារបស់ទ្រង់ ( សូមមើល យ៉ូហាន ៥:៣០ ) និងស្ម័គ្រព្រះទ័យមកកាន់ផែនដី ។ ទ្រង់បានលះបង់សិរីល្អរបស់ទ្រង់ ដើម្បីបានប្រសូតនៅក្នុងក្រោលដ៏រាបទាបមួយ ដែលមាតារបស់ទ្រង់ « រុំទ្រង់នឹងសំពត់ ហើយផ្តេកក្នុងស្នូក » ( លូកា ២:៧ ) ។
អំឡុងពេលកុមារភាពរបស់ទ្រង់ ទ្រង់ « នៅក្នុងព្រះវិហាររបស់ព្រះវរបិតា [ នៃទ្រង់ ] »( លូកា ២:៤៩ ) ហើយបានធ្វើឲ្យមានការភ្ញាក់ផ្អើលដល់អស់អ្នកទាំងឡាយដែលបានឮការបង្រៀនរបស់ទ្រង់ ។ ក្នុងការបម្រើរបស់ទ្រង់ ទ្រង់មានអំណាចដើម្បីធ្វើនូវអព្ភូតហេតុទាំងឡាយ ប្រទានពរ និងព្យាបាលដល់អ្នកឈឺ ប្រោសអ្នកស្លាប់ឲ្យរស់ឡើងវិញ ហើយនៅទីបំផុតបានប្រទាននូវដង្វាយធួនដ៏អស់កល្ប ។
ក្នុងគ្រប់អ្វីៗទាំងអស់ដែលទ្រង់បានមានបន្ទូល និងធ្វើ ជាពិសេសនៅក្នុងការលះបង់ដ៏ធួនរបស់ទ្រង់ ទ្រង់បានបង្ហាញផ្លូវទៅកាន់ព្រះវរបិតាសួគ៌របស់យើង ។ គំរូ និងការបង្រៀនរបស់ទ្រង់បំភ្លឺផ្លូវដែលយើងត្រូវដើរតាមដើម្បីត្រឡប់ទៅកាន់ផ្ទះសួគ៌ារបស់យើងវិញ ។
ចែកចាយពន្លឺរបស់ទ្រង់
នៅពេលដែលយើងមានអារម្មណ៍នៃពន្លឺរបស់ព្រះរាជបុត្រានៃព្រះនៅក្នុងជីវិតរបស់យើង នោះយើងគួរតែព្យាយាមខិតខំចែកចាយពន្លឺនោះជាមួយអ្នកដទៃ ។ ខ្ញុំរីករាយធ្វើជាអ្នកផ្សព្វផ្សាយសាសនានៅក្នុងប្រទេសអង់គ្លេស ។ ខ្ញុំរីករាយធ្វើជាប្រធានបេសកកម្មនៅក្នុងប្រទេសកាណាដា ។ ហើយខ្ញុំរីករាយនឹងការហៅបម្រើបច្ចុប្បន្នរបស់ខ្ញុំក្នុងមានជាសមាជិកក្នុងកូរ៉ុមនៃពួកសាវកដប់ពីរនាក់ ដែលអនុញ្ញាតឲ្យខ្ញុំថ្លែងទីបន្ទាល់អំពីព្រះយេស៊ូវគ្រីស្ទនៅទូទាំងពិភពលោក ។
ព្រះអង្គសង្គ្រោះបានបង្រៀនថា ៖ « មើលចុះ យើងជាពន្លឺដែលអ្នករាល់គ្នានឹងលើកឡើង—គឺនូវអ្វីដែលអ្នករាល់គ្នាបានឃើញយើងធ្វើ » ( នីហ្វៃទី ៣ ១៨:២៤ ) ។
ពន្លឺរបស់ព្រះអង្គសង្គ្រោះជះពន្លឺនៅក្នុងយើងគ្រប់ពេលដែលយើងអធិស្ឋាន ហើយស្វែងរកព្រះបន្ទូលរបស់ទ្រង់នៅក្នុងព្រះគម្ពីរទាំងឡាយ ។ ពន្លឺរបស់ទ្រង់ភ្លឺចែងចាំង នៅពេលយើងស្រឡាញ់ដូចជាទ្រង់ស្រឡាញ់ ចែកចាយទីបន្ទាល់របស់យើង និងផ្តល់នូវការបម្រើដោយមិនគិតប្រយោជន៍ផ្ទាល់ខ្លួន ។ ការណ៏នេះបណ្តេញភាពងងឹតចេញពីជីវិតរបស់យើង ហើយទាក់ទាញអ្នកដទៃដែលកំពុងស្វែងរកពន្លឺរបស់ទ្រង់ ។
ពន្លឺរបស់ទ្រង់ស្ថិតស្ថេរជារៀងរហូត
ពន្លឺរបស់ព្រះយេស៊ូវគ្រីស្ទគឺតែងតែមានសម្រាប់ប្អូនជានិច្ច ។ គ្មានអ្វី—គ្មានអ្វីទាល់តែសោះ—ដែលអាចមានអំណាចលើ ឬពន្លត់ពន្លឺរបស់ទ្រង់បានទេ ។ វានឹងស្ថិតស្ថេរជារៀងរហូត ។ ព្រះយេស៊ូវគ្រីស្ទ « ជាពន្លឺ ហើយជាជីវិតនៃពិភពលោក …ជាពន្លឺមួយដែលមិនចេះចប់មិនចេះហើយ ដែលពុំអាចធ្វើឲ្យងងឹតបានឡើយ » ( ម៉ូសាយ ១៦:៩ ) ។
ខ្ញុំមានអំណរគុណជារៀងរហូតសម្រាប់បទពិសោធន៍ដែលខ្ញុំមានក្នុងនាមជាអ្នកផ្សព្វផ្សាយសាសនាវ័យក្មេង ពេលខ្ញុំបានដឹងអំពីរឿងនេះដោយខ្លួនខ្ញុំផ្ទាល់ ។ ថ្ងៃនេះខ្ញុំដឹងកាន់តែច្បាស់ ពេលដែលខ្ញុំបានឆ្លងកាត់ជីវិតជាមួយការសាកល្បង និងសេចក្តីរីករាយទាំងអស់ ។
ប្រសិនបើប្អូនពុំដឹងថាត្រូវទៅណា ឬធ្វើអ្វីទេ សូមសម្លឹងមើលទៅកាន់ពន្លឺដ៏ពិតរបស់ព្រះរាជបុត្រានៃព្រះ ។ បើប្អូនសុខចិត្តចូលមករកទ្រង់ ហើយធ្វើតាមពន្លឺរបស់ទ្រង់ នោះទ្រង់នឹងបំភ្លឺផ្លូវរបស់ប្អូន ។