ការឆ្ពោះទៅកាន់ថ្ងៃដ៏ភ្លឺថ្លា

ដោយ ម៉ារីស្សា វីដឌីសុន

ទស្សនាវដ្ដីសាសនាចក្រ

សេចក្តីសង្ឃឹម ជំនួយ និងការព្យាបាលមានសម្រាប់អស់អ្នកដែលបានរួចផុតពីការរំលោភបំពាន ។

ពេលមួយខ្ញុំបានជិះយន្ដហោះចេញពីតំបន់ដែលពោរពេញដោយផ្សែងដែលកើតពីការឆេះព្រៃក្បែរនោះ ។ ពេលដែលយន្តហោះចាប់ផ្តើមចេញដំណើរ យើងបានហោះទម្លុះផ្ទៃមេឃដ៏អ័ព្ទអួរ សំដៅទៅកាន់មេឃដែលស្រឡះ ហើយមានពន្លឺថ្ងៃ ។ ខ្ញុំបានដឹងថាពន្លឺព្រះអាទិត្យ និងខ្យល់បរិសុទ្ធបានមាននៅទីនោះរហូតហ្នឹង ប៉ុន្តែខ្ញុំពុំមានលទ្ធភាពក្នុងការរីករាយជាមួយពួកវាទេ ដោយសារតែត្រូវបានរារាំងដោយអ្វីមួយដែលខ្ញុំមិនអាចគ្រប់គ្រងបាន ។ វាមិនមែនជាកំហុសរបស់ខ្ញុំទេ ដែលភ្លើងឆេះព្រៃនោះ ប៉ុន្តែវានៅតែប៉ះពាល់ដល់ជីវិតរបស់ខ្ញុំ ។

ការរំលោភបំពានក៏ដូចគ្នានេះដែរ ។ អស់អ្នកដែលទទួលរងការរំលោភបំពានមិនត្រូវបន្ទោសទេ ប៉ុន្តែពួកគេនៅតែបន្តប្រឈមមុខជាមួយនឹងបញ្ហានោះក្រោយមកទៀត ។ ការបំពានអាចធ្វើឲ្យយើងមិនឃើញពីតម្លៃខ្លួនឯង ហើយធ្វើឲ្យពិបាកក្នុងការទទួលបានអារម្មណ៏នៃសេចក្ដីស្រឡាញ់របស់ព្រះ ។ វាអាចនឹងត្រូវចំណាយពេលមួយរយៈសម្រាប់អ្នកដែលរស់រានមានជីវិតទាំងនោះ ដើម្បីយកឈ្នះលើការកុហករបស់សាតាំង ដើម្បីភ្ជាប់សារឡើងវិញជាមួយនឹងសេចក្ដីពិតដ៏អស់កល្បជានិច្ច ។ ប៉ុន្តែសេចក្តីសង្ឃឹម ជំនួយ និងការព្យាបាលគឺមានគ្រប់ជំហានទាំងអស់ !

ដំណើររឿងមួយ

ឪពុករបស់ស្តេស៊ី^១ គឺជាអ្នករំលោភបំពាន ។ គាត់បានប្រាប់នាងថា នាងនឹងមិនចេះអ្វីទាំងអស់ពេលនាងធំឡើង ។ គាត់បានធ្វើឲ្យនាងមានអារម្មណ៏ថាគ្មានតម្លៃ ។

នៅពេលដែលស្តេស៊ីបានចេញទៅរៀននៅមហាវិទ្យាល័យ នាងអាចគិតឃើញកាន់តែច្បាស់ជាងមុន ។ នាងបានចាប់ផ្តើមទៅព្រះវិហារម្តងទៀត ហើយទទួលបានសេចក្តីស្រឡាញ់ពីព្រះចំពោះរូបនាង និងគ្រួសាររបស់នាង ។ អស់រយៈពេលជាយូរ នាងបានរកឃើញភាពសុខសាន្តនៅក្នុងដំណឹងល្អ និងទំនាក់ទំនងរបស់នាងជាមួយនឹងព្រះអង្គសង្គ្រោះ ។

តាមការប៉ាន់ស្មានកុមារប្រមាណមួយពាន់លាននាក់នៅទូទាំងពិភពលោកនឹងជួបប្រទះការរំលោភបំពានមួយចំនួននៅឆ្នាំនេះ ។^២ ប្រហែលជាអ្នក ឬអ្នកផ្សេងទៀតដែលអ្នកស្គាល់កំពុងឆ្លងកាត់បទពិសោធន៍ដូចជាស្តេស៊ីដែរ ។ ធនធានទាំងឡាយខាងក្រោមនេះអាចជួយបាន ។

ប្រសិនបើអ្នកកំពុងរងការរំលោភបំពាន

ប្រសិនបើអ្នកកំពុងរងការឈឺចាប់ សូមប្រាប់នរណាម្នាក់អំពីអ្វីដែលកំពុងកើតឡើងចំពោះអ្នក ។ សូមដឹងថា ព្រះស្រឡាញ់អ្នក ! ហើយសមាជិកគ្រួសារដ៏សុចរិត មិត្តភក្តិ និងសមាជិកសាសនាចក្រក្នុងជីវិតរបស់អ្នកក៏ស្រឡាញ់អ្នកដែរ ។ ពួកគេនឹងឈរនៅក្បែរអ្នក ហើយជួយអ្នកឲ្យរួចផុតពីការណ៏នេះ ។

ហើយសូមចាំថា « ការរំលោភបំពានគឺមិនបានជា ហើយមិនមែនជាជាកំហុសរបស់អ្នកឡើយ ។ … អ្នកមិនមែនជាអ្នកដែលត្រូវប្រែចិត្តទេ អ្នកមិនមែនជាអ្នកទទួលខុសត្រូវទេ » ។^៣

វេជ្ជបណ្ឌិត សែលដុន ម៉ាទិន ជាគ្រូពេទ្យមួយរូបក្នុងសេវាគ្រួសាររបស់សាសនាចក្រ មានប្រសាសន៏ថា វាអាចជួយសម្រាប់អ្នករស់រានមានជីវិត ក្នុងការផ្តោតទៅលើការពិតដ៏អស់កល្បនៃអតីតកាល បច្ចុប្បន្នកាល និងអនាគតរបស់ពួកគេ ។

អតីតកាល ៖ វេជ្ជបណ្ឌិត ម៉ាទិន មានប្រសាសន៏ថា « មានមនុស្សច្រើនជាងអ្នកបានដឹង កំពុងខ្វល់ខ្វាយពីអ្នក » ដែលចង្អុលបង្ហាញថា អ្នកគឺជាកូនដំបូង និងសំខាន់បំផុតរបស់ព្រះមាតាបិតាសួគ៌ ។ គ្រួសារដ៏អស់កល្បរបស់អ្នកលាតសន្ធឹងហួសពីទំនាក់ទំនងនៅលើផែនដីរបស់អ្នកទៅទៀត ។ ហើយបន្ថែមពីលើកម្លាំង និងការលួងលោមដែលមកពីព្រះវរបិតាសួគ៌ ព្រះយេស៊ូវគ្រីស្ទ និងព្រះវិញ្ញាណបរិសុទ្ធ អ្នកមានបុព្វការីជនជាទីស្រឡាញ់នៅឯម្ខាងទៀតនៃវាំងនន ដែលយកចិត្តទុកដាក់ចំពោះអ្នក ហើយអាចផ្តល់ការងារបម្រើដល់អ្នកផងដែរ ។
បច្ចុប្បន្នកាល ៖ វេជ្ជបណ្ឌិត ម៉ាទិនមានប្រសាសន៏ថា « វាមិនអីទេក្នុងការស្រឡាញ់ខ្លួនឯងពេលនេះ » មិនថាអ្នកនៅចំណុចណានៅក្នុងដំណើរការព្យាបាលនេះទេ ។ វាជារឿងធម្មតាទេដែលមានអារម្មណ៍ខឹង ខូចចិត្ត ឬច្របូកច្របល់ ។ ចូរមានចិត្តអំណត់ជាមួយខ្លួនឯង ។
អនាគត ៖ វេជ្ជបណ្ឌិត ម៉ាទិនមានប្រសាសន៏ថា « អ្វីៗនឹងប្រសើរឡើង » ។ « ខ្ញុំដឹងរឿងនេះ ដោយសារខ្ញុំស្គាល់ព្រះអង្គសង្រ្គោះ ។ ទ្រង់មានព្រះទ័យខ្វល់ខ្វាយពីអ្នក » ។ ចូរធ្វើអ្វីគ្រប់យ៉ាងដើម្បីបាននៅក្បែរទ្រង់ ។ នៅពេលអ្នកធ្វើដូច្នោះ អ្នកនឹងក្លាយជាអ្នកដែលអាចដកខ្លួនឯងចេញពីទំនាក់ទំនងមិនល្អ ហើយអាចធ្វើឲ្យអ្នកមានអារម្មណ៏សុខសាន្ត និងសេចក្តីស្រឡាញ់របស់ទ្រង់កាន់តែច្រើនឡើង ។

ប្រសិនបើអ្នកគិតថា មិត្តម្នាក់កំពុងរងការរំលោភបំពាន

សូមសួរទៅពួកគេត្រង់ៗថា « តើមាននរណាម្នាក់កំពុងធ្វើបាបឯងឬ ? »
សូមស្តាប់ដោយប្រុងប្រយ័ត្ននូវអ្វីដែលពួកគេនិយាយ ។ សូមបង្ហាញចិត្តសប្បុរស និងមេត្តាដល់ពួកគេ ។
សូមប្រាប់នរណាម្នាក់ដែលអាចជួយបាន ដូចជា គ្រូបង្រៀន ឪពុក ឬម្តាយ ទីប្រឹក្សាសាលា ឬអ្នកដឹកនាំសាសនាចក្រ ។
សូមបន្តធ្វើជាមិត្តភក្ដិនឹងពួកគេ ។ សូមរាប់អានពួកគេធម្មតា ។ សូមជួយពួកគេបង្កើតមិត្តភាពដែលល្អផ្សេងៗទៀត ។

បន្តឆ្ពោះទៅមុខ

ថ្ងៃនេះ ស្តេស៊ី គឺជាអ្នកមានជំនាញដ៏ជោគជ័យម្នាក់ ដែលមានគ្រួសារជាទីស្រលាញ់ផ្ទាល់របស់នាង ។ ថ្ងៃខ្លះនៅតែពិបាក ប៉ុន្តែនាងមានអារម្មណ៍រីករាយជាខ្លាំង និងការអភ័យទោសដល់អ្នកដទៃ ។

ស្តេស៊ីនិយាយថា « ខ្ញុំដឹងថា ព្រះយេស៊ូវ គ្រីស្ទអាចព្យាបាលរបួសទាំងអស់របស់យើងបាន » ។ ប្រសិនបើមានរឿងមួយដែលនាងចង់ចែកចាយជាមួយនឹងអ្នកនៅរស់រានមានជីវិតផ្សេងទៀតនោះគឺ បន្តមានក្ដីសង្ឃឹម ។

នាងនិយាយថា « តែងតែមានសង្ឃឹមក្នុងព្រះគ្រីស្ទជានិច្ច ទោះបីជានៅកណ្តាលនៃការសាកល្បងដែលហាក់ដូចជាវាមិនចេះចប់ក៏ដោយ » ។

មិនថាអ្នកកំពុងឆ្លងកាត់ឧបសគ្គអ្វីក៏ដោយ សូមបន្តឆ្ពោះទៅមុខ ។ សូមបំពេញជីវិតរបស់អ្នកជាមួយនឹងសេចក្តីល្អ និងសេចក្តីជំនឿទៅតាមវិធីណាដែលអ្នកអាចធ្វើបាន ។ ថ្ងៃដ៏ភ្លឺថ្លាកំពុងរងចាំអ្នក !