សេចក្តីជំនឿ នៅក្នុងភាពងងឹត

ដោយ ជេន អ៊ី នូមែន

ទីប្រឹក្សាទីពីរនៅក្នុងគណៈប្រធានសាលាថ្ងៃអាទិត្យទូទៅ

ទាំងនេះគឺជាយោបល់មួយចំនួនដែលបានជួយខ្ញុំ នៅពេលមានចម្ងល់ និងការសង្ស័យ ។

កាលខ្ញុំជាក្មេងប្រុសម្នាក់ គ្រួសាររបស់ខ្ញុំជានិច្ចជាកាលទៅលេងបាសាំងដ៏ធំមួយរបស់ឧទ្យានជាតិនៅក្នុងរដ្ឋណេវ៉ាដា ស.រ.អា. ។ អ្វីដែលគួរឲ្យកត់សម្គាល់មួយនៅក្នុងឧទ្យាននោះគឺ រូងភ្នំ លីមិន ។

មគ្គុទេសក៏ម្នាក់នាំយើងចូលទៅក្នុងរូងជ្រៅ ទៅដល់កន្លែងមួយ បិទភ្លើងទាំងអស់ ។ យើងនៅក្នុងភាពងងឹតស្លុប ។ វាជាអារម្មណ៍មួយដ៏ពិបាក ហើយគំនិតនៃការស្វែងរកផ្លូវចេញពីរូងភ្នំដោយគ្មានពន្លឺគឺស្មុគស្មាញយ៉ាងខ្លាំង ។ សំណាងល្អ មគ្គុទ្ទេសក៍នោះតែងតែបើកភ្លើងវិញជានិច្ច ហើយនាំយើងចេញដោយសុវត្ថិភាព ។

ពេលខ្លះយើងប្រឈមមុខជាមួយនឹងសំណួរ ព្រមទាំងការសង្ស័យនានាអំពីសាសនាចក្រ និងទីបន្ទាល់របស់យើងផងដែរ ។ វាអាចមានអារម្មណ៏ពិបាក និងមិនជាក់លាក់ ដូចនៅក្នុងរូងភ្នំដ៏ងងឹតនោះដែរ ។

វាមិនថ្វីទេក្នុងការមានចម្ងល់ និងកង្វល់នានានោះ ។ ការណ៏ដែលនឹងធ្វើឲ្យមានភាពខុសគ្នាខ្លាំងបំផុតនោះគឺរបៀបដែលប្អូនធ្វើវា ។

ទាំងនេះជាយោបល់មួយចំនួនដែលបានជួយខ្ញុំ ។

អនុវត្តសេចក្តីជំនឿ

ខ្ញុំបានដឹងថា ប្រសិនបើខ្ញុំដោះស្រាយចម្ងល់ និងកង្វល់ចេញពីសេចក្តីជំនឿ នោះខ្ញុំតែងតែអាចដឹងពីអ្វីដែលត្រូវធ្វើជានិច្ច ។ « សេចក្ដីជំនឿគឺពុំមែនជាតម្រិះដ៏ឥតខ្ចោះនូវអ្វីៗទាំងឡាយនោះទេ » ( អាលម៉ា ៣២:២១ ) ។ « បើសិនជាអ្នករាល់គ្នាពុំអាចធ្វើអ្វីក៏ដោយ ក្រៅពីការចង់ជឿ នោះសូមឲ្យចំណង់នេះមាននៅក្នុងខ្លួនអ្នក » ( អាលម៉ា ៣២:២៧ ) ។

លោកិយនឹងប្រាប់ប្អូនថា បើប្អូនមិនអាចបញ្ជាក់អ្វីមួយតាមស្តង់ដាវិទ្យាសាស្ត្រទេ វាមិនអាចជាការពិតនោះទេ ។ នេះមិនមែនជាវិធីរបស់ព្រះអម្ចាស់ទេ ។ ដូចដែលព្រះអង្គសង្គ្រោះបានប្រាប់ថូម៉ាស ជាអ្នកដែលមិនជឿលុះត្រាតែគាត់បានស្ទាបស្នាមរបួសរបស់ព្រះអង្គសង្រ្គោះដែលមានព្រះជន្មរស់ឡើងវិញសិន ថា « កុំឲ្យមានចិត្តមិនជឿឡើយ ត្រូវឲ្យជឿចុះ » ( យ៉ូហាន ២០:២៧ ) ។

ចូរសូម ចូររក ចូរគោះ

ឃ្លា « ចូរសូម ចូររក ចូរគោះ » ត្រូវបាននិយាយម្តងហើយម្តងទៀតនៅក្នងព្រះគម្ពីរ ( សូមមើល ម៉ាថាយ ៧:៧; គោលលទ្ធិ និង សេចក្ដីសញ្ញា ៨៨:៦៣ ) ។ វិធីរបស់ព្រះអម្ចាស់ក្នុងការជួយយើងជាមួយនឹងចម្ងល់ទាំងឡាយ គឺឲ្យយើងទូលសួរសំណួរដល់ទ្រង់ ។

« បើអ្នករាល់គ្នាណាមួយខ្វះប្រាជ្ញាមានតែសូមដល់ព្រះ »( យ៉ាកុប ១:៥ ) ។ សូមទៅឲ្យចំប្រភពនៃរាល់សេចក្ដីពិត ។ ទ្រង់ស្រឡាញ់ប្អូន ហើយនឹងជួយដល់ប្អូន ។

ធ្វើជាអ្នកស្វែងរកសេចក្តីពិត

ខ្ញុំបានឃើញថា អស់អ្នកដែលស្វែងរកសេចក្ដីពិតដោយស្មោះត្រង់ និងដោយបន្ទាបខ្លួន ជាញឹកញាប់នឹងរកឃើញចម្លើយចំពោះសំណួររបស់ពួកគេ ។ ម៉្យាងវិញទៀត អស់អ្នកដែលគិតតែរកកំហុស នឹងចេះតែដើរទៅមុខ កាន់តែឆ្ងាយទៅៗពីសេចក្ដីពិត ។

ធ្វើជាអ្នកស្វែងរកសេចក្តីពិត សេចក្តីពិតមានពិតមែន ហើយប្អូនៗអាចរកវាឃើញ ។

បង្កើតប្រអប់ « នឹងឆ្លើយនៅពេលក្រោយ » មួយ

ដូច្នេះតើប្អូនធ្វើយ៉ាងណា ប្រសិនបើប្អូនបានស្វែងរកចម្លើយដោយចិត្តរាបទាប និងដោយស្មោះ ហើយវាហាក់ដូចជាគ្មានចម្លើយនោះ ?

ខ្ញុំសូមនិយាយម្តងទៀតថា ខ្ញុំជ្រើសរើសដោះស្រាយវាដោយសេចក្ដីជំនឿ ។ ខ្ញុំបានបង្កើតប្រអប់តូចមួយដាក់លើធ្នើរមួយនៅក្នុងគំនិតរបស់ខ្ញុំ—ដូចជាហិបកំណប់ដ៏ស្រស់ស្អាតមួយ ។ ហើយបានសរសេរពាក្យនៅលើនោះថា « នឹងឆ្លើយនៅពេលក្រោយ » ។

នៅពេលណាខ្ញុំមានចម្ងល់ ឬកង្វល់ដែលខ្ញុំមិនអាចដោះស្រាយបាន ខ្ញុំសរសេរវានៅលើក្រដាសស្រមើស្រមៃមួយ បត់វាយ៉ាងស្អាត ហើយដាក់វាក្នុងប្រអប់នោះ ។ បន្ទាប់មកខ្ញុំដាក់វានៅលើធ្នើរវិញ ។

ការធ្វើដូច្នេះ ខ្ញុំកំពុងធ្វើដោយមានជំនឿថា ថ្ងៃណាមួយព្រះអម្ចាស់នឹងឆ្លើយវា ។ ប្រហែលទ្រង់នឹងឆ្លើយ ប្រហែលទ្រង់នឹងមិនឆ្លើយ នោះគឺស្ថិតនៅលើទ្រង់នៅក្នុងព្រះបញ្ញាញាណដ៏អស់កល្បរបស់ទ្រង់ ។

និយាយអញ្ចឹង សំណួរមួយចំនួនរបស់ខ្ញុំ បាន ឆ្លើយតបហើយ ។ ប៉ុន្តែមួយចំនួនទៀតមានក្នុងប្រអប់នៅឡើយទេ ។ ខ្ញុំគ្មានបញ្ហាទេចំពោះរឿងនេះ ។

មិត្តជាទីស្រឡាញ់នៅក្នុងព្រះគ្រីស្ទរបស់ខ្ញុំ សូមធ្វើជាអ្នកស្វែងរកសេចក្តីពិត ។

នៅពេលដែលសេចក្តីជំនឿរបស់ប្អូនកើនឡើង នោះព្រះអម្ចាស់នឹងគង់នៅជាមួយប្អូន ។ ហើយពេលប្អូនខិតទៅជិតទ្រង់ដោយសេចក្តីជំនឿ ទ្រង់នឹងបង្ហាញដល់ប្អូន នូវអ្វីៗដែលប្អូនត្រូវដឹងនៅពេលដែលត្រឹមត្រូវ ។