« ការល្បួងឲ្យផឹកតែ » ដើម្បីកម្លាំងនៃយុវជន ខែ មករា ឆ្នាំ ២០២៣ ។
គ្រឹះដ៏មាំមួន
ការល្បួងឲ្យផឹកតែ
ថ្ងៃមួយក្នុងរដូវរងា ខ្ញុំបានដើរក្នុងបរិវេណសាលាជាមួយមិត្តភក្តិរបស់ខ្ញុំឈ្មោះ អាលិស និង ត្រាវើ ពេលដែលយើងបានឃើញផ្លាកសញ្ញាមួយដែលសរសេរថា « តែមានហើយ » ។ ដោយក្តីរំភើបចិត្ត ត្រាវើបានសុំទិញតែឲ្យពួកយើងម្នាក់មួយពែង ។ ខ្ញុំបានឆ្លើយថា « អត់ទេ សូមអរគុណ » ។
ត្រាវើបានឲ្យតែមកខ្ញុំរៀងរាល់ថ្ងៃ ហើយខ្ញុំនៅតែបន្តបដិសេធ ។ ទីបំផុត គាត់បានសួរខ្ញុំថា ហេតុអ្វីខ្ញុំមិនផឹកតែ ។ ខ្ញុំបានប្រាប់គាត់អំពីពាក្យសម្ដីនៃប្រាជ្ញាវាងវៃ ដោយសង្ឃឹមថាគាត់អាចយល់ ។ ប៉ុន្តែគាត់បានធ្វើវាទៅជារឿងលេងសើចទៅវិញ ។ គាត់ព្យាយាមឲ្យខ្ញុំធ្វើខុសនឹងពាក្យសម្ដីនៃប្រាជ្ញាវាងវៃ ។
គាត់បាននិយាយថា « វាមិនមែនដូចឯងផឹកគ្រឿងញៀននោះទេ » ។ « តែមួយពែង គឺមិនអីនោះទេ ! »
នៅសប្តាហ៍បន្ទាប់ទៀត គាត់ និងមិត្តរបស់គាត់បានចាប់ផ្តើមចំអកឲ្យខ្ញុំកាន់តែខ្លាំងឡើង ។ ខ្ញុំបានព្យាយាមមិនមានអារម្មណ៏ខ្មាសអៀន ប៉ុន្តែវាមិនងាយស្រួលទេ ។
យូរៗទៅ ពួកគេមានអារម្មណ៍មិនល្អចំពោះទង្វើរបស់ពួកគេ ហើយឈប់និយាយចំអកខ្ញុំទៀត ។ ថ្ងៃមួយ គ្រូរបស់ខ្ញុំបានប្រាប់ខ្ញុំថា ៖ « ប្អូនតែងតែធ្វើជាគំរូនៃសេចក្តីជំនឿ និងសាសនារបស់ប្អូន ។ ខ្ញុំមានមោទនភាពចំពោះប្អូនណាស់ » ។
ខ្ញុំមានមោទនភាពចំពោះខ្លួនឯងផងដែរ ។ វាមិនងាយស្រួលជានិច្ចនោះទេ ប៉ុន្តែខ្ញុំដឹងថា ខ្ញុំនឹងទទួលបានពរជ័យក្នុងការក្រោកឈរឡើងសម្រាប់បទដ្ឋានរបស់ខ្ញុំ ។
នីកូល អិម វេសមីតលែន ចក្រភពអង់គ្លេស