“Sesalia, Filipai,” Ki Hono Fakamālohia ʻo e Toʻu Tupú, ʻEpeleli 2023.
Ngaahi feituʻu mei he Folofolá
Sesalia, Filipai
Ako fekauʻaki mo e feituʻu naʻe fehuʻi ai ʻe he Fakamoʻuí, “Ka ʻoku pehē ʻe kimoutolu ko hai au?”
ʻOku Tuʻu Ia ʻI Fē?
ʻOku ʻi he veʻe Moʻunga Heamoní ʻi he fakatokelau ʻo ʻIsilelí.
Ko E Hā ʻOku ʻI Aí?
Ko e kolo fakakuongamuʻa ko ʻení ʻa e feituʻu ʻoku tafe mei ai ha anovai mei he Moʻunga Heamoní.
Ko e anovai ko ʻení ko e taha ia ʻo e ngaahi matavai (pe ko ha tupuʻanga) ʻo e Vaitafe Soataní.
Ko E Hā Naʻe Hoko Hení?
Naʻe fehuʻi ʻe he Fakamoʻuí ki Heʻene kau ākongá: “Ka ʻoku pehē ʻe kimoutolu ko hai au?”
Pita: “Ko koe ko e Kalaisí, ko e ʻAlo ʻo e ʻOtua moʻuí.”
Sīsū: “…, ʻokú ke monūʻia, he naʻe ʻikai fakahā ia kiate koe ʻe he kakano mo e toto, ka ko ʻeku Tamai ʻoku ʻi he langí. …
“Ko Pita koe, pea te u langa hoku siasí ki he maká ni; pea ʻe ʻikai lavaʻi ia ʻe he ngaahi matapā ʻo hētesí.
“Pea te u ʻoatu kiate koe ʻa e [ngaahi] kī ʻo e puleʻanga ʻo e langí: pea ko ia kotoa pē te ke nonoʻo ʻi māmaní, ʻe nonoʻo ia ʻi he langí; pea ko ia te ke veteki ʻi māmaní ʻe veteki ia ʻi he langí.” (Mātiu 16:13–19.)