“Ko Hono Ngāueʻi ha Paʻanga ki he Ngāue Fakafaifekaú,” Ki Hono Fakamālohia ʻo e Toʻu Tupú, ʻEpeleli 2023.
ʻOku ou Faʻa Fai ʻa e Ngaahi Meʻa Kotoa pē ʻia Kalaisi
ʻOku vahevahe ʻe he toʻu tupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻá (vakai, Filipai 4:13).
Ko Hono Ngāueʻi ha Paʻanga ki he Ngāue Fakafaifekaú
ʻI he kamataʻangá, naʻe ʻikai ke u fie ngāue fakafaifekau. Ne u pehē naʻe lahi ha ngaahi meʻa kehe te u lava ʻo fai lolotonga e taimi ko ʻení, hangē ko e ʻalu ki he kolisí pe ngāue mālohi ke fakatau ha kā. Ka ne u fanongo ki ha lea ʻa hotau palōfita ko Palesiteni Lāsolo M. Nalesoní, ʻa ia naʻá ne lea ai fekauʻaki mo e tuí mo lave ki he ngāue fakafaifekaú. Naʻá ku fakakaukau ki he founga ʻoku ou maʻu ai ha ʻilo ki he ongoongoleleí koeʻuhí pē he naʻe fakakaukau ha ongo faifekau ke na ngāue Ko ia ne u talanoa ki heʻeku pīsopé fekauʻaki mo e ʻalu ʻo ngāue fakafaifekaú.
Naʻá ku fakatokangaʻi naʻe fiemaʻu ke u ngāue ke totongi ʻeku ngāue fakafaifekaú, ka naʻe faingataʻa ke kumi ha ngāue lolotonga e mahaki fakaʻauha fakaemāmani lahí. Ne ʻi ai ha ʻaho ne u ongoʻi loto-mafasia kau ki hono ngāueʻi ha paʻangá. Naʻá ku fakakaukau ke u lotu ki he ʻOtuá. ʻI heʻeku fakalaulaulotó, ne haʻu ki heʻeku fakakaukaú ʻa e kupuʻi lea ko e “Fakatau atu ha hina vai.” Naʻe mālohi fau ʻa e ongo [ko ʻení]! ʻI Palāsilá, ʻoku faʻa fakatau atu ʻe he kakaí ha fanga kiʻi fakaneifua pe inu ʻi he maama halá. Naʻe lahi ʻeku ngaahi fehuʻi fekauʻaki mo hono fakatau atu ʻo e vaí, ka naʻe ueʻi fakalaumālie au fekauʻaki mo e founga ke fakahoko ai iá. Naʻá ku fai ha fakatotolo peá u fakakaukau ke fakatau atu ʻa e vaí ʻi ha founga fakapalōfesinale angé.
Naʻe faingataʻa ke fakatau atu e vaí, he naʻe fuʻu vela ʻaupito. ʻI he ʻuluaki ʻaho naʻá ma kamata ngāue aí, naʻe tikilī Fahrenheit ʻe 100 (tikilī Selosiasi ʻe 38) pea fuʻu hauhau ʻaupito, pea naʻe ʻikai ke ma lava ʻo nofo fuoloa ʻi he lalo fakamalú koeʻuhí he naʻá ma tuku ʻa e kula fakamokomokó ʻi lalo ai. ʻI he ʻaho ko iá, naʻá ma ngāue hokohoko ʻi ha houa ʻe nima ʻi he lalo laʻā velá. Lolotonga e ngaahi houa ko iá naʻá ku fakakaukau maʻu pē, “ʻOku fakataumuʻa ʻeni ki heʻeku taumuʻá. Te u ʻalu ʻo ngāue fakafaifekau!” Naʻá ku ʻiloʻi ʻi hoku lotó naʻe ʻiate au ʻa e ʻEikí pea te Ne maluʻi mo tokoniʻi au.
Ko au pē ʻa e mēmipa ʻo e Siasí ʻi hoku fāmilí, ko ia ko e meʻa naʻá ne fakaʻaiʻai aú ko ʻeku tui kia Sīsū Kalaisí. ʻOku ou ʻiloʻi neongo ʻoku ou toko taha ʻi ha ngaahi founga, ka ʻokú Ne ʻi ai maʻaku. Pea kapau te tau fai ʻa e meʻa ʻokú Ne kole maí, ʻo falala kiate Ia, te Ne tokoniʻi kitautolu ke tau aʻu ki he tuʻunga ʻoku fiemaʻu ke tau ʻi aí.
Neongo ʻe lava ke lahi ha ngaahi matangi mālohi ʻi heʻetau moʻuí, ka ʻoku ou ʻilo te u lava ʻo fili ke fakamālohia ʻeku tuí ʻi he ngaahi faingataʻá. ʻOku maʻu ʻe Sīsū Kalaisi ʻa e mālohi ke tokoniʻi au ke u ofi ange kiate Ia mo fakamoʻoniʻi ʻa e ngaahi mana naʻe ʻikai ke u mei mātā tonu ka ne ʻikai ʻa e faingataʻá. Kapau te u muimui kiate Ia mo fakatomala mei heʻeku ngaahi fehalaākí, ko ʻeku ngaahi feilaulau kotoa pē ʻe fai ia koeʻuhí ko ha taumuʻa maʻongoʻonga, pea ʻoku ou maʻu ai ʻa e nongá.
Ítalo O., Palāsila