“Ngaahi Lelei Pulipulia ʻe 7 ʻo e Akó,” Ki Hono Fakamālohia ʻo e Toʻu Tupú, ʻEpeleli 2023.
Tokoni ʻo e Moʻuí
Ngaahi Lelei Pulipulia ʻe 7 ʻo e Akó
ʻOku ʻi ai ha ngaahi lelei lahi ʻo e akó ʻi he kotoa ʻo e moʻuí—mahalo ʻoku ʻi ai ha niʻihi ʻoku ʻikai ke mou teitei fakakaukau ki ai!
“Hoi!” ʻE ʻa fē nai ha taimi te u fiemaʻu ai ke fakaʻaongaʻi e founga fika ko ʻení?” Kuo tau aʻusia kotoa ia. Tatau ai pē pe ko e fika, tohi, pe paiolosī, ʻoku tau faʻa fifili he taimi ʻe niʻihi pe ʻe tokoniʻi kitautolu ʻamui ange ʻe ha taha ʻo e ngaahi meʻa ko ʻeni ʻoku tau ngāue mālohi ke akó.
ʻOku mahino ki hotau tokolahi ʻa e fehokotaki ʻa e akó mo e ngaahi faingamālie fakaengāué. Ka neongo ia, ko e taimi ʻoku fekauʻaki ai mo e akó, ʻoku maʻu ha ngaahi tāpuaki ʻi ha ngaahi founga ʻoku ʻikai ke tau ʻamanaki ki ai. Ko ha ngaahi lelei ʻeni ʻo e akó ʻoku siʻisiʻi ange hono ʻiloʻí.
1. Te ke lava ʻo maʻu ha meʻa lahi ange ke talanoa ki ai ʻi hoʻo fetaulaki mo e kakaí.
ʻOku ʻikai fekauʻaki ʻeni ia mo hono talanoaʻi pē ʻo ha ngaahi moʻoniʻi meʻa ʻoku ʻikai ʻiloʻi. Ko e lahi ange hoʻo ako ʻi he moʻuí, ko e lahi ange ia e ngaahi founga te ke fehokotaki ai mo ha taha foʻoú.
2. Te ke lava ʻo fakahaofi ha paʻanga.
Ko e lahi ange hoʻo ʻilo ki he foungá, ko e siʻisiʻi ange ia hoʻo fiemaʻu ke totongi ha taha kehe ke ne fai ia maʻaú.
3. Te ke lava ʻo tokoniʻi lelei ange ai e niʻihi kehé.
Kapau ʻoku faingataʻaʻia ho kaungāmeʻá ʻi he veʻehalá ko e pā e vaʻe ʻene meʻalelé, peá ke ʻiloʻi e founga ke fetongi pe ngaohi e foʻi vaʻé, te ke hoko koe ko ʻenau helo! Naʻe akoʻi ʻe Palesiteni Nalesoni ʻo pehē, “Ko e faikehekehe ʻo e fakaʻamu ke ke lava ʻo tokoniʻi ha kakaí mo e malava ke tokoniʻi kinautolú, ko e akó.”1
4. ʻE lava ke iku hono ako ha meʻa foʻoú ki ha meʻa te ne fakatupulaki ha meʻa fakamānako ki he moʻuí.
Ako lahi ange ki ha meʻa ʻokú ke fieʻilo ki ai—hangē ko e sio ki he founga ngaohi ʻo e sioʻatá ʻi hono puke ʻo puhí—ʻe lava ke iku ia ʻo hoko ko ha meʻa fakamānako fakafiefia foʻou kiate koe. Pea ʻoku lelei ʻa e ngaahi meʻa fakamānakó ki he moʻui lelei fakaeʻatamaí!
5. ʻE lava ke ʻi ai ha ngaahi meʻa kehekehe lahi ange ʻi hoʻo moʻuí.
ʻI he taimi ʻokú ke fakatau mā aí, ʻoku fakangatangata pē ʻa e ngaahi meʻa te ke ala fili mei aí ki he meʻa ʻoku fakatau atu ʻi he falekoloá. Ka ke ako ke ke poto he taʻo pē hoʻo maá pea he ʻikai ke teitei ʻosi ʻa e ngaahi meʻa foʻou te ke ala fili mei aí!
6. Ko e lahi ange hoʻo akó, ko e lahi ange ia hoʻo hoko ʻo hangē ko e ʻOtuá.
Vakai, Tokāteline mo e Ngaahi Fuakava 93:36; ʻĒpalahame 3:19.
7. ʻOkú ke foaki kiate koe tuʻunga fakalaka ange ʻi he moʻui ka hokó.
He ʻikai te ke lava ʻo ʻave hoʻo koloá mo koe hili ʻa e moʻui ko ʻení (vakai, ʻAlamā 39:14). Ka ʻoku ʻaʻau ʻa e ʻilo kuó ke ngāueʻi he kotoa hoʻo moʻuí ke tauhi ʻo taʻengata (vakai, Tokāteline mo e Ngaahi Fuakava 130:19).