“Fakaava Ho Lotó ki he Laumālie Māʻoniʻoní,” Ki Hono Fakamālohia ʻo e Toʻu Tupú, ʻEpeleli 2023.
Lea Fakaʻosí
Fakaava Ho Lotó ki he Laumālie Māʻoniʻoní
Mei ha lea ʻi he konifelenisi lahi ʻo ʻEpeleli 2018.
ʻI he faʻahitaʻu Toetuʻu ko ʻení, ʻoku ou fakamālō ki heʻetau Tamai Hēvaní ko e meʻaʻofa ʻo Hono ʻAlo ʻOfaʻangá, ʻa ia naʻe hāʻele loto-hōifua mai ki he māmaní ke hoko ko hotau Huhuʻí. ʻOku ou houngaʻia ke ʻiloʻi naʻá Ne fakalelei maʻa ʻetau ngaahi angahalá pea toe tuʻu hake ʻi he Toetuʻú. ʻOku tāpuekina au ʻi he ʻaho kotoa pē ke ʻiloʻi, ʻe malava ke u toetuʻu ʻi ha ʻaho ke nofo ʻo taʻengata ʻi ha fāmili ʻofa, koeʻuhí ko ʻEne Fakaleleí.
ʻOku ou ʻiloʻi e ngaahi meʻa ko iá ʻi he founga pē ʻe taha ʻoku tau lava ʻo ʻilo aí. Kuo fakahā mai ʻe he Laumālie Māʻoniʻoní ki hoku ʻatamaí mo e lotó ʻoku moʻoni ia—ʻo ʻikai tuʻo taha pē kae tuʻo lahi.
ʻOku tau maʻu ʻa e talaʻofa mahuʻinga fau ʻo e Laumālie Māʻoniʻoní ʻi heʻetau hoko ko e takauá. Ko hotau fatongiá ke fili ke fakaava hotau lotó ke maʻu maʻu pē ha fakahinohino fakalaumālie mo ha fakafiemālie ʻo fakafou ʻi he Laumālie Māʻoniʻoní ʻi he moʻuí kotoa.
Ngaahi tā fakatātā ʻa Emily E. Jones
Ko e ʻuluaki filí ke loto-fakatōkilalo ʻi he ʻao ʻo e ʻOtuá.
Ko hono uá ke lotu ʻi he tui ki he ʻEiki ko Sīsū Kalaisí.
Ko e fika tolú ke talangofua moʻoni.
Pea ko hono faá ke lotu ke ʻiloʻi ʻa e ngaahi fiemaʻu mo e loto ʻo e niʻihi kehé mo e founga ke tokoniʻi ai kinautolu maʻá e ʻEikí.
ʻOku ou lotua ʻaki hoku lotó kotoa te mou fakafanongo ki he leʻo ʻo e Laumālié, ʻa ia kuo fekauʻi mai kiate kimoutolú. Pea ʻoku ou fakatauange te ke fakaava maʻu pē ho lotó ke maʻu ʻa e Laumālié koeʻuhí ke ke maʻu ʻa e fiefia ʻo hono maʻu Ia ko ho takaua maʻu peé.